Myitkyina Sasvna, Vdùng Gvray bvnlì taq dvzaqshì we mòngkà Svra/ mèrì dvpat Jubilee bóy wáàò we shvngka

10 shvlá 23 ni 2025, lvbán vbini taq Kachina móngwál myitkyina Sasvna vdùng, Gvray bvnlì taq dvzaqshì we mòngkà Svra/ Svra mèrì dvpat Jubilee bóy svng Myitkyina Svrado John Mòng ngawn Laq Sam í, shøl nø St.Luke Edin yvng pàmvracè wálún bø’à.

Jubilee bóy nø myitkyina Sasvna, BaMaw Sasvna nvng Lashú Sasvna vdùng taq Gvray bvnlì taq dvzaqshì we mòngkà svrarì dvpvt wáàò we íe.

Svrado gvbà John La Samí, missa kàgvp nóng vjúrøt we rvtø taq vpø’ we Svra, Svra mèrìé Jubilee bóy nø nøngmaq shvngbe dvpvt ínø, mvrà roqārà we íe. Tāsvng tāle mvrà roqā lvm vchvk mvdøng íwe dang svng shvdúme.

Gvray bvnlì taq dvzaqshì we mòngkà Svra/ Svramèrì nø lvpat shvngbe Gvray kaq apnóngshì we írvt, Gvrayí shvmán jèjú ìshøt gømpaq zílvm ídaqe. Nøngmaq móngdan taq dvshà mvhøtlvm vhømshì we rvtø írvt, Gvray bvnlì taq dvzaqshì we Svra/Svramèrì nø Pvlacè nvnggùn kungà gvza rà we dø, shvngømré mèò dvpvt gø gvza vchvk we tvrà taq apnóngshì rì íe.

Vkvt dø gvza yat we dvhø taq té Gvray bvnlì taq dvzaqshìlvm shvdúme.Jubilee bóy taq svradorì kàgvp nóngshú jaùrì, sister rì nvng mòngkà Svra/Svramèrì shvngbe (400) mvdvm, Shvngømré vsvngrì gvza kømráì nø pàmvracè wálún bø’shà.

Jubilee bóy wádáng bø’à mèpvng, zvn dvtut Gvray bvnlì taq dvzaqshì we mòngkà Svra/Svramèrì shvngbe dvpvt kadø dvbvnglvm nvng kadø rvsànglvm wa nø vràshì we lipòng gø waòe.