Vjú røt we Kà shvbóng nvng Vjú røt weò kūnga vzàm rì dvtán nø shvngøt dvtú shvdøm we
Angwa Nár (29) lvban
Ya lvban, tashì lúnlvm Gvray gvsang mongkà (3)ciq taq, Vjú røt we Kà shvbóng nvng Vjú røt weò kūnga vzàm rì dvtán nø shvngøt dvtú shvdøm we dang tálúnshìe.
Mongkà (1)ciq;-
Bungvm 17:8-13 …. taq, Moshi í tiqni shø:ngdø vjú røt dvbvngò rvt, Yoshú nvng Israel vsvngrì nø, Amelet cìl vsvngrì kaq jór lúnòe, wànø Mongkà taq tá lúnìe.
Mongkà (2) ciq;-
2 Timoti 3:14- 4:2 ….
Dvzvr Polo í shvdøm we móngkà taq Cvmréce dvgvp kèní Shànshér we móngkà svng èsháò rvt, Døngman dø mvng dvtut cvndvgøm lèqlúnò, wā shvdøm we tvrà tálúnshìe.
Mongkà (3)ciq;-Luka 18:1-8
Yesuí cvncoqrì svng dvkv’m we taq, yv’ng mà dvt vjú røtshì lvm nvng Nønt mvcvm lvm, Gvray gvsang nø vjú røt Kà rì svng táā nø Shvmv’nà, zílún pè íe, wā dvkv’m dang tálúnshìe.
Vpø’ íwe vnvmchvngmaq, Vkangpè Yesuí shvngøt we nø, Rvtø v-rvm Kvmnøntní vjú røtshì lvm lòng íe. Nøngmaq rvzvngcerìí wàì we mvdøng vchvk lòng svng vrá tiqkvt dvdvm vjáng dvzvrè. Wè lòng nø “Vjú røtshì lvm” lòngni íe. Vjú røtshìe walòng nø pà svng wàe mà? Shvngbeí nø vsháshaq íe. Íni gø, vrá tiqkvt dvdvm nàjáng lúngò ni jèjú yú:mè wàwe mà-vl. Gvray gvsang nvng Shóngnøntní ‘v-toq v-tìp, dvmanì we tvrà’ gø íe. Nøngmaq Bāsha rvzvngcerì nø , àngdeò angpè angmèmaq, àngnvm angchvngrì , Rvmja rì nvng v-toq v-tìp tvrà taqkèní mvdøng vzøm vzapmì nø vtoqshàì we íe.
“Yesu shøn we Kàshvbóng “taq;
“Wamà tiq lòng taq, Gvray kaq gø màsvre, vsvng kaq gø màpǿò we dvrá vjì tiq pè v̄le. Wamà welòng taqni, memà tiq mè gø v̄le. Ang nø dù wepè yv́ng svng nv̀nnv̀n di nø, ‘Ngà svng vtù pè nvng ngà dvhø̀ dvrá dø kàngé dèbv̄ngà,’ wa røtshìe. Nv̀mlat dvgvp nø, wepèí mvtáāò. Iwe mèpvng nø ang nøt taq dvdā:mòe, ‘Ngà nø Gvray kaq gø màsvreng, vsvng kaq gø màpǿngònøng gø, Memà yamèí nø ngà svng bø̀nlu èmv̄n rvt, ngàí ang dvpvt dvrāalv́m íe. Wedø mø̀í nìnø ang vrø̄shi rā weí mvzán lóngò pà íe wa dvda:mò nø,” lvngdøm taq Memà me lvp kèní rìp nø dvráālvm Nønt vrá dang yv’nglúnshìe.
Yalòng Kà shvbóng svng shvlá wace dvdvmì, mø-í ninø vjú røtshàì tvrà taqø vléshì sháshìe.
Gvray gvsang kaq tiqlvng màlé bønlu ì lòng svng vjú røtshà ìe wā dvdvm sháìe. Gvray gvsang nø mvdøng mvmàn we Dvrá Vji mø-í. Memà me yv’ngmàdvt røtnímshì rvt wā , Ra vchvk lòng svng dvgø’à pè gø mø-í. Vkangpè Gvray gvsangí nø kádvgvp gø vjú røt Kà svng táāè. Angí nø nøngmaq Ra vchvk lòng svng Tá mvyø’, shá mvyø’ we nvng Nønt yv’nggú:ngí, shóngnøntní, vrá Shvmv’nà mvyø’è, walòng svng yv’nglúnshìe.
” Nvnnvn røtním shìe”
Kà shvbóng mvshøl taq, Yesu shøn we nø, Memà me nø ang nvng vtu kè pè dvhø bøn lòng taq Dvrá dø shø’nà lvm rvt, mvmèboq røtnímshìe. Yalòng nø nvnnvn (persistence) røtnímshì tvleshì lòng íe. Gvray gvsangí nø, wè Memà meò vjang laqyà rì svng yv’ngshì sórí, Gvray gvsangí nø nøngmaq vjúrøt Kà rì svng táā lúnè, walòng svng Kv’m lvm rvt shvngøt dvtúe.
” Nøngmaq vjúrøt shàìe”
Nøngmaq nø Pà rvt vjúrøt shàì mà? Vjúrøt shàì lòng nø;-
(i) Gvray gvsang kaq Noqngøm shvgùn shvring shvta lvm dvpvt,
(ii) Vtoshì lúnì we jèjú ìshøt rì dvpvt, Oqā é wàì nø shvgùn shvring lvm rvt íē.
(iii) Vlé shàì we Mvrà rì svng vroqshìlvm rvt íē.
(iv) Àngde taq Ra vchvk dang rì dvpvt røtnímshì lvm… Yadang rvt nø vjúrøt shàì lòng íe.
Vjúrøt we taq; Ra vchvk we Nønt mvsøn laqyà rì vl lvm gø dvkv’mè.
(i) Cìpshì we Nønt mvsøn í røtshì ràe.(Lk 18:10-14) ( Yalòng nø vjúrøt shì we taq mvdøng vchvk lòng íe.)
(ii) Kvmnøntní røtnímshì ràe.(Mt 17:20)
(iii) Nønt dvt, Nønt tin we mø-í dø, dvtut vjúrøt shì ràe.
(Lk 11:5-18, Lk 18:1-8)
Vrá nø, “Vhø’m v-du we mvbø’n rì ” mvmè vl yv’ngkèní tiqmaq svng dvtan mvyø’ we taq,
Vjú røt we taq Nønt lúm, Góng lúm dø røtshì lvm rvzaq we mvtú rì gø mvmè vl sháòe.
Wè rì nø;-
(i) Nønt mv-lúm, Nønt v-gwáshì sháòe,
(ii) Nønt mvjór dømshì we nvng vzing ra dø sháòe,
(iii) Vzing e… Ya rì svng shvlē lún ra íē, wā shvdømè.
Vrá nø,
“Vjúrøt shì we Dvla pvn rì ” mvmè vlē.
Vjú røtshì dvgvp,
(i) Noqngøm shvgùn we,
(ii) Shvmv’n jèjú ìshøt Kømzøp dø røtnímshì we,
(iii) Tiqdvng vsvng rì dvpvt vjúrøt dvbvng we,
(iv) Oqā wa jèjú vtánngshì we,
(v) Jèjú shvgùn we… hang Dvla rì íē.
Vrá nø,
” Tiqgóng hang vjángshì we “
Vjú røtshì dvgvp, Góng hang v-ngvt shì lvm gø gvzà vchvkngè. Nøngmaqò Nønt mvsøn vjang laqyà rì shvngbe
nvng tiqdø Gvray gvsang mvrdvng yv’ng svng gòngì we í rvt nøngmaq tiqgóng shò-vngvt shàì lòng í gø àng lvjøm svng dvtánshìe. Nøngmaq wáshàì we Hang Dvla tiqmaq nø:-
(i) Wur mvzøqshàìe,
(ii) Bvnciq tū shàìe.
(iii) Rip mìe.
(iv) Rúngìe.
(v) Vgo v-ngø:mshàìe… Yarì svng ang lvjøm vl dø shvláwace wáshì lúnlvm gvzà vchvkngè.
Vrá nø, Vjúrøt we tvrà taq shvbø’nà lún we kūnga vzàm rì vl lòng svng ká:m rà íe. Mongkà (1)ciq taq, Moshi í tiqni shø:ngdø vjúrøt dvbvngò rvt, Yoshú nvng Israel vsvngrì nø, Amelet cìl vsvngrì svng jór lúnòe, wànø Mongkà taq tá lúnìe.
Mongkà (2)ciq taq, Dvzvr Polo í Timoti kaq svng shvrìo we, shvdøm we móngkà taq Cvmréce dvgvp kèní Shànshér we móngkà svng èsháò rvt, Døngman dø cvndvgøm lèqlúnò, wā shvdøm nø dvkv’m dang tálúnshìe.
Vpø’ íwe pèmè vnvmchvngmaq Dèni Gvray gvsang kaq Kv’mì we rvzvngcerì nøngmaq gø’ vrvm gø Gvray gvsangí gō we jèjú vdòng taq mongzøl dø cúnshì lúnì pàdø Gvray gvsangí dvkv’m we Jèjú Dvrá vdòng taq Cìpshì Nøntní cvndvgøm nø cúnshì lúnlvm, dvtan lúnlvm gø gvzà vchvkngè wàdang svng dvdvmì taqsórí Pvlàcè kvmnønt nònggùn kūnga lùshì laqlúnì. Shvngbe svng oqā.
“ Vsvng Angcè pè Tuqdaq we Angni taq, yalòng Mònggvn rvgaq yachang mvdvm Kvmnønt vl lòng nø, yv’ng lúnshì daq mà?” (Lk 18:8).
