Dvrá svrarì ngā:nò we
Namaq nø mèhøt lóngnønge. Kadø íe wani nvkop nvkàng maqí shvt yà:ngà we kàdvtutshúri dvgv̀m rì nø namaqí ni dècøpnønge, wā Dvrá Svrarì svng ngā:nò we móngkà mvshøl taqkèní íē.
Vpø’ íwe pèmè vnvmchvngmaq,
Shvla we shánønt Paqzi ínø vsvng kaq svng døvdòng kèní shvlut lúnè. Wè mvdvmø, welòng shánønt Paqzi í nø, àngde tiqgóng cúnshì nø vsvng kaq svng cvnà lúnìnø, àngde lutshì wewà mvtaq, vsvng mvmè dvpvt gálòng pàdø wáshì lúnlvm íē.
Parishi rì tiqmaq nvng Mongkà Dvrá Svra rì tiqmaq nø Yuda Vsvngrìo Kvmnønt dvrá hang Upvdi nvng Tong laqyà rì svng tøpnī tøprāng shálúnòe. Angmaqí sháò we shánønt Paqzi rì nø vsvng kaq svng shvngøt dvtú lvm rvt wā íe. Angmaq àngde tiqgóng taqkèní cvndvgøm nø dvzaq dvkvngshìe wàwe mà-vl. Wervt Vkangpè Yesu Kristu ínø ” Namaq ínø Muqlang móngdànò shvmzoq puq èlvngnøng taqsórí angde ni megòngnøng, gòng lvm rvt dvgø’shì rì kaq svng gø Namaqí nø nàgv’mnøngè, wā dvkv’m yangà. Àngmaqò mvbø’n nø kvlángpòng mvdvmø vyit pàdø íe, wàe. Kvláng vm mvyø’ nø dì ra we Nangwà svng jūòe. Zí mà mvyø’. Angmaq dvpvt gø kvláng nø Pà vjú gø mà-vl. Rvzvngcerìo tvrà nø, Vkangpè Yesu Kristu Gvray pàdø, angdèo lvpat svng vsvng mvmè dvpvt vpnóngshì nø, Kà í wā shvngøt dvtú shø’n we, dvkv’m we wa mø-í nø, bvnlì nvng vjang laqyà Mvkok dvdí shóngnøntní chutchvng we tvrà svng dvtánshì lòng íe.
Vpø’ íwe pèmè vnvmchvngmaq,
Vkangpè Yesu Kristu Gvrayò dvkv’m Kà me rì svng lvpat taqø vtō nø ká:mì lòng, cvndvgøm nø cúnshàì lòng , Tiqdvng vsvng kaq mvré zā shóngnønt dvtanì lòng nø, Gvray gvsangò Mvkok dvdí shóngnønt svng vpø’ shvringshì ká:mì lòng íe. Wèwa mvtaq, Vsvng mvmè dvpvt Gvray gvsangò gálòng shvkse wáshàì, dvtanì lòng gø íe. Gvray gvsangí zi we Shánønt Nyan Bvnya Paqzi rì í Døngman we tvrà svng vchvng nø, Gvray gvsang shvrúng we, Døngman we Kvmnønt, shóngnønt tvrà svng cvndvgøm dvtán taqsórí vsvng mvmè dvpvt Kristuò gálòng shvkse wáshì laqlúni, shvngbe svng oqā.
