Pope Leo XIV Italy President kaq svng zaqlè wàng vriq lvm íe waw shvngkà

Italy president Sergio Matarella nø 6 June 2025 ni taq Pope Leo XIV yvng svng dinø pàmvrà wa vtoqshì nø vhøm we wáshì bøì wegø íe.We mèpvng tiqkvt vrá tuqrawe October 14 ni taq Pope Leo XIV taqkèní President Sergio Matarella kaq svng vhø nø dvmvn lvm íwe dang shálún shìe.

Svrabín koqkvmpè Leo XIV nø àngò Svrabín koqkvm vya svng kámshì bøì mèpvng móng gvmzørì nvng vhøm nø dvmvnwe 3 boq waboq gø íráì. Àngò Svrabín koqkvm vya rúngtàng svng vtoshì we bóy tvyø taq gø móng gvmzørì mvme tuqráì nø pàmvra wanø vtoq shìwe, dvhøm we vl bøì we íe.

Pope Leo XIV Svrabín koqkvm vya svng kámshì bøì mèpvng 8 ni wani taq Italy móng gvmzøpè Sergio Matarella taqkèní Pope Leo XIV svng dvgùng shvring we gø wáshì bøì we íe. Wewa mvtaq Pope Leo XIV kaq svng mònggvn móngdàn, gvmzørì taqkèní mònggvn mòngzøl lvm tvrà, svngpvn dvcìrì vháng vlún lvm tvrà rì nvng mònggvn wulaq tvrà rì taq téwa vháng vlún lvm dvlà, tvyø rì taq tubúm dvbangā lúnlvm svng gø vløm shìwe dvng shvri kàru rì taqkèní vtoqshì we gø wáshì bøì.

Italy móng gvmzø róng svng Svrabín koqkvm rì taqkèní nvmlat boq vriq nø vhøm ráà wenø Pope Pius 14 ínø 28 December 1939 nø taq íyvngì.

Pope Leo XIV Italy móng gvmzø róng svng vriq lvm íwe zaqlè tvrà nø tasvng vpø shvring, dvgùng vzí kewe mvtú kèní vzøm we tvrà tiqlòng gø íe.