” Putao Jau Gwørwang mèo Nønggøm Lìpong “
Putao Jau Gwørwang mèo Noqngøm Lìpong svng Shvrúngshú pè Fr. John Byin Tu Awng í shøl we vdòng, Putao Jau Gwørwang, Pvngkaí mvring taq, Mvring v-rvm kèní Mongkà Svra rì, La pòng, Num pòng rì, Zilangré mvdò nvng Sasvna Cvmré mvdò, vrá nø dvgvng vrvm kèní Kømngø’m nø (10-11,10, 2025)ni, v-ní (2) døp wáshì bø’ì.Wè Nønggøm Lìpong me taq Mvring v-rvm kèní (2025)nøng vdòng dvnúngshì bø’ì we Sasvna bvnlìrì nvng (2026)nøng taq dvtut wàlvm Sasvna bvnlì mvnggá rì svng gø dvtánshì we wáshì bø’ì.
Vrá nø, Putao Jau Gwørwang kaq Catholic Sasvna gòng we (75)nøng Nønggøm Jubilee bóy me svng gø (2026)nøng December shvlá taq wàlvm rvt dvdù shì bø’ì we taq, Gvmsung, Nangwà, Waq ,Nina rì angpvnpvn taqkèní gø vlu zíshì we wáshì bø’ì. Wèwa mvtaq, Putao Jau Gwørwang mèo bvnlì angkang (8)nøng rvzé vpnóngshì nø rí bø’ì we Svra gvba . Anthony Ban Awng tvle Putao Jau Gwørwang mèo Bvnlì angkang àngshvr Svra Pè. Bosco Sut Awng kaq svng rvzv’ng we gø wáshì bø’ì.
Vrá nø, Mongkà Svra rì nvng La pòng mvdò, Num pòng mvdò rì Polong dō we tvyø rì svng gø wáshì bø’ì nø, Tuqdaq we (2026)nøng taqkèní nø Jau Gwørwang Polong pvlā bóy rì svng gø wàlvm rvt dvdù shì bø’ì dang shálúnshìe. 2025 nøng Nønggøm Lìpong me taqø Mvring rvwá v-rvm kèní Svra rì nvng dvgvng vrvm kèní shølshú rì shvngbe (70 ) gø’ rvzé lúm bø’ì nø mongzøl dø wálún bø’à dang shálúnshìe.
