Røt nø lún we
Dèni tashì lvm, mv-ngú nø nònggùn lùshì lvm Gvray móngkà nø Luka 11:5-13 ciq vdòng taqkèní íē.
Yesuí rá angmaq svng, “Namaq dvhø̀ kèní tiq gǿ nø, ang rv̀mnvng tiq gǿ yv́ng svng yaqdø̀ng mvlù:ngí di nø, ‘Jàá ngà svng zidòng vshø̀m chv̀ng èrumà; 6 pawá wani ngà rv̀mnvng tiq pè tuq ráì we, ang svng zílv́m pàgø màvlá:mì,’ wa lā a:lò nìnø, 7 a:ngí chø̀m vdòng kèní nàtv̀ngvt nø, ‘Ngà svng mèbø̀nlōngànøng; akvt nø bv́ngkà gø kvlaqshaq íe, ngàcè rì gø ngà nvng tiqdø yøp dv́rshà. Nà svng zidòng zílv́m ngà kungshì màshvla,’ èv̄lvtne. c 8 Ngàí namaq svng v̄la:tnìni, nv̀mlat dvgvp ang nø mvkungshì we ínìgø rv̀mnvng wepèí mànar rø:tnò nìnø, kadø ínìgø ang kungshì nø rà dv́ngte ang svng zíòe.wàe.
Gvray móngkà taq, angdèo shvraqshì lvm tvrà rì svng màshì nø àngde Chøm kaq dì ra zaqle gø’ dvpvt, Cìpshì Nøntní tiqdvng vsvngò Chøm kaq yaqdøng rvwe í di nø bvngka vkok røtnímshì lòng nø, Angò Nønt mvsøn vjang laqya kèní Døngman dø Vjúrøt shì lòng íe, wā vtoshì lúnòe.
Vpø’ íwe vnvmchvngmaq, Zaqle ang dvpvt, dvshá zā røtním dvbvngshìe, àngde dvpvt mà dvdvmshì, àngde Chøm kaq svng tuqráì zaqle gø’ dvpvt màlún ma-daq, wā dvshá kámshì rø:tnà we Nønt mvsøn vjang laqyà nø gvzàni shvgùn shvring vpø’ rà íe. Wervt Gvray gvsang kaq nøngmaq vjú vra rø:tnímshì lúngì dvgvp angdèo mà:pnønt , hø:pnønt, Shø’mnønt, dvshvngshì nønt rì svng gúr nø Gvray gvsang kaq nvmlat tiq taq mvdøng gvl nø, dvshá vhø’mò dvgá vsvng í vjú lúnlvm dvpvt vjúrøt dvbvnga lvm rvt gø gvzà vchvkngè.
Vjúrøt we taq; vjúrøt gø’ ò Dòngnønt mvsøn nø Gvray gvsang kaq tuq lúnì vjúrøt lòng, wā mvsat nø shø’n shvlàe. Gvray gvsang nvng v-toq v-tìp dvman lòng, Gvray gvsang shvrúng lòng svng lámv’nshì lòng, Tiqdvng vsvng mvrà chutnà lòng, tùbùm dvbvngshì lòng gø vjúrøt shì lòng íe. Vjúrøt we taq, Dāwun je vjúrøt we mø-í lvm, Kvmnøntní, Cìpshì Nøntní, Nønt mvsøn màgwáshì dø, mà zìng dø, Nønt mvsøn tiqgóng shvngbe tvleshì nø Gvray kaq røtnímshì lúnlvm gvzà vchvkngè, wàdang svng shedømì we móngkà íe. Shvngbeí Gvray gvsang mongzøl lòng vtoshì laqlúnì.
