Angwa Nár (27) Homily (5 Oct 25) C nøng.

Mongkà (1)ciq, Habaku 1:2-3, 2:2-4. Kàdvtutshú Habaku í yà:ngò we dvtānkà kàciq Mongkà taqkèní íē.

Eyv̀ngnøng, dvshv́ngshì pè ang dāng èshø̀:nò nìnø, ang dòngnøt mvsø̀n nø màmvdóng. Iwe døngmān vsa:ngí nø, ang kv́mnøt taq kèní mv̀ng cúnshì lún lú:ngòe, wā dvkv’mè.

Mongkà (2)ciq, 2 Timohti 1:6-8, 13-14.
Dvzvr Polo í Timoti kaq shvriò we kàrù Mongkà taqkèní íē. Polo ínø Timoti kaq svng shø’n we móngkà taq, Na mvdvmø Wur hvpshi ra dvgvp, Gvrayí Na kaq svng zí we jèjú gønpaq nø, ngà dvpvt vché vzut dø dèzǿngāng bǿngà. Gvray gvsangí zi we jèjú gønpaq nø, shvre sháò we Nønt mà-vl; nònggùn kūnga vl we Nønt, shóngshì sháò we Nønt, àngde tiqgóng svng øpkang lún we Nønt mvsøn laqya rì íē, wā shvdømè.

Mongkà (3)ciq, Luka 17:5-10.
Vkangpè Yesuí Dvzvr rì kaq svng ‘ Kv’m we Nønt’ nvng ‘Gvray kaq Noqngøm dang’ ya v-ní lòng nø gvzàni vchvkngè wā shvngøt dvtúe.Kristu vdòng taq Vpø’ íwe pèmè vnvmchvngmaq,

“Nøngmaqò kvmnønt svng sheluqā daqshà” wā Kà vgo zø’m nø dvshat mvyø’nge we taq;-

Dvzvr rì nø angmaqò Kvmnønt kūnga shvluqālvm rvt, Vkangpè Yesu kaq røtnímshìe. Wèkvt Vkangpè Yesuí àngmaq svng vtánshì we taq: Namaq taqø mvngàkashí tiqchvng dv’ngte Kvmnønt èvlnøng nìnø, bvlø̄ngyì shǿngtøng yagùng svng namaqí, ‘Yayv́ng kèní rø nvng tvpwa èpúlshì nø, nvmukdvra taq èyovm,’ èv̄lnøng nìgø, ang nø jø’ngjøngni namaq kà svng tā longe,” a:lòe. Kvmnønt taqø Zun mvdv’ngshì we Gvray gvsangò jór kūnga vzàm vlē walòng svng shvdømè.

Vpø’ íwe vnvmchvngmaq,
“Dvzømshú tiqgø’ò Kà shvbóng”
taqkèní gø vkvtdø shvdømè.

Kona tvmu wàòe, mø-í ni vyvng dvngche rì svng rì:mò we dvzømshú, bvnlì kèní Chøm kaq lo dvgvp, dvtut àng svng Chøm angkang pè í vmlvm shølkùng dvgø’ dvzá:ròe. Chøm angkang pè kaq vmlvm dvgø’āòe, wáàòe. Welòng dv’ngí vrá, bvnlì wá dvzømshú pè ínø vm-aq lúnshì bø’ì, wā vtánshì nø shø’n bø’à.

Wè dvzømshú pè ínø, Chøm angkang pè í dvtú we Kà shvngbe svng cvndvgømo lòng nø, àng nø Kv’m vm v-rvm lòng svng dvtánò lòng íe. Angí wá v-du we bvnlì shvngbe svng wàò lòng nø, Àng nø Kv’m vm v-rvm we bvnlì svng vpø’ò lòng svng dvtánò lòng gø íe. Vrá nø, Angí rí v-du lòng svng cvndvgømo lòng goy íe. Wervt wè dvzømshú pè svng Angò angkang pè í shvgùn shvringò ni ma? Yalòng Ka shvbóng taqkèní, lvngdøm lvpshi nø shø’n mvyø’ we nø, shvla we, Kv’m vm v-rvm we dvzømshú wàwe taq, Angò bvnlì døngja lòng svng shvlá wace wàò lòng svng shø’n mvyø’ we íe.

Vrá nø, ‘Ká:mè wàwe Kvmnønt’ nø Pà i mà?

(1) Yalòng Kvmnønt anglvjøm svng bø’nò we mvmè vlē. Angwa dv’nman vsvng tiqgø’ chep ku kèní nø síngràl lún dø èshøn lúngò dvgvp, ‘Kvmnønt’, nø Gvray gvsangí dvpø’ màdá zi we Jèjú gønpaq tiqlòng íe.
(Efesus 2:8.)

(2) Vkangpè Yesuò Mongkà taq vbá dø tiqdvchá èshøn lúngò kvt, Vkangpè àng bøng vdòng taq dvgøqshàì nø Daq v-tu mvdóng dvngwà Kv’mì lòng íe. Angò jór dvgùng, pòngbang kūnga vzàm, pvn vrvm shvngbe nvng Angò Mvkok dvdí shóngnønt taq zø’mshì nø Kv’mì lòng, vlømshàì lòng gø íe. Angí shengøt dètú íwe dvkv’m Kà rì taqø, vlømshàì nø ká:mì lòng gø íe. Nøngmaq taqkèní shvngbe svng síngràl dvtøp lún we mà-vl nigø, kvmnøntní vtō nø Shànshér Pvlàcè í shøl we vdòng taq cvndvgømì lòng íe.

Vrá nø, Mvngākashí Dv’ngte wàwe taq;

Vkangpè Yesuò Mongkà taq, ‘Kvmnønt’ mvngākashí tiqchvng dv’ngte èvlnøng nìnø, shvbø’n lún we kūnga vzàm, nònggùn vl lòng svng shønòe. Àngshíò kūnga vzàm nø, hang cvmè, tēè wàwe taq mvdøng mø-í. Luq lòng taqgø mvdøng mø-í, Shvbø’nà lún we kūnga vzàm svng shø’n mvyø’ dang íe. Vkangpè Yesuí shvdøm we taq, ‘Kvmnønt’ nø Hang Cvm we íni gø, Dā lvm bvnlìrì svng shvbø’nà høq kūnga vzàm zìe, walòng íe. Dvzvr, dvzømshú rì nø angdègóng àngdeni dvdvmshì sháràe, wà Kà gø íē. Angmaq nø Gvray gvsangò dvzømshú cerì íe. Gvray gvsangí nø àngmaq taqkèní Kvmnønt, Mvngākashí tiqchvngce dv’ngte íni gø, Dā lvm bvnlì rì svng shvbø’nòe.

Yadang rvt, shvgùn shvta dang rì svng mv-lá lvm, mvwàlvm lòng svng shø’nè. Nøngmaq ká:mì we ‘Kvmnønt ‘
nønt nvng bvnlì wà lú:ngì dvgvp,
Noqngøm nø Tvleshàì lòng nø angyá dvtvng vmyat svng nøngmaqí lá lúnlvm vlē, wà Kà íē.

_ Eyv̀ngnøng, dvshv́ngshì pè ang dāng èshø̀:nò nìnø, ang dòngnøt mvsø̀n nø màmvdóng. Iwe døngmān vsa:ngí nø, ang kv́mnøt taq kèní mv̀ng cúnshì lún lú:ngòe, wā dvkv’mè. (Habaku 2:2-4)

_“Nøngmaq svng kv́mnøt shèluqashà, wā dvzvrì Vkangpè kaq røtshìe.” (Lk 17:5).

Vpø’ íwe vnvmchvngmaq, Vpè Gvrayí zi we jèjú gønpaq Kvmnønt svng Kàdvtutshú rì taqkèní, Vkangpè Yesuò dvzvr rì taqkèní kv́mnøt shèluqalvm rvt Kvmnøntní røtnímshì yangì pàdø, Nøngmaq taqkèní gø rvtø vrvm Gvray gvsangò Døngman we Kvmnønt tvrà taq mvdóng dvngwà dì lúnlvm, shvzøngshì lúnlvm, Pvlàcè kvmnønt nònggùn kūnga lùshì lúnlvm kvmnøntní røtnímshì laqlúnì, tvleshì laqlúnì wvng dvshat nø nònggùn zí mvyøngè. Shvngbeí Gvray yv’ngkèní Vkangpè Yesu Kristu yv’ngkèní Kvmnønt Mongzøl lòng vtoshì laqlúnì.