“Svrabín Koqkvm Leo (14)nø Kàru Tong laqya nvng Shvngømré vrvm v-toq v-tìp dvman lvm nvng singdø bvnlì dvnúng mvdò svng vtō nø vhøm we “

Svrabín Koqkvm Leo (14)nø Nár tiqni taq Vatican yv’ng Uropaq Bālimanò tvyø tiqlòng í we “Kàru Tong laqya nvng Shvngømré vrvm v-toq v-tìp dvman lvm nvng singdø bvnlì dvnúng mvdò’ svng vtō nø Pamvra wàwe taq vkvtdø shøn bø’ì.

Svrabín Koqkvm ínø vkvtdø íwe tvyø rì rvt gvzà oqā wa Kà shøn bø’ì nø téwa anggshí rì svng yv’ng lúnlvm íe wā vlømshì nø pvngshì bø’ì.

‘ Kàru Tong laqya rì dvhø nvng Shvngømré vrvm dvhø vhø’m mv-ngu dvman lvm lòng svng zidvng hángshì lòng nø rvzvngce móng lvmvng wà rì dvpvt mvdøng mvnggá tiqlòng ínø, Gvray gvsangò jèjú rvt yalòng bvnlì nvng singdø shvlá vtv’ng Shvkse wáshì rì gø mvmè vl dang shøn bø’ì.

Dvbùshang nvng dvbùshang Angò dvpø’ rì taq gvzà rvnaq dø zø’mpshì lúnlvm, v-toq v-tìp dvman nø Kà shøn rì íe wàwe taq, dvbùshang dvrá mongkà taqkèní bung we àng dvpø’ rì nø gvzà rvnaq dø zømshì nø Dø’ngvng lòng svng shø’n mvyø’ dang ínø, wè rvtø taqni àngmaqò lvpat mèpan mvshøl rì yv’ngkèní dì dang nvng mà ya mvpmàshì, táā lòng nvng vrashì lòng svng Mvkokngà lòng svng gø shø’n mvyø’e wā vpø’ Nøntní shøn bø’ì.

Wè lòng nø ‘ Bāsha, Vsvngrìo dvgùng nvng nøngmaqò vzøm vzapmì dang nvng Vsvng mvngpòng Toniò vtóng svng kádvgvp gø métiq taq gvl lvm’ rà vchvk dang shøn bø’ì nø, shvngømré v-rvm v-toq v-tìp dvman we bóy taq lúm lòng nø shvngømré nø vsvng Ang gø’ ku zidvng nvng v-toq v-tìp mvr v-ní lòng taqø àng dvpø’ vl dang svng vpø’ shvring shì lòng ínø, shvngømré wàwe Kàru chvngni ‘ Bāsha vsvng dvci rìo Nvmlat mvpvng dvgvng ku vl lòng svng dvnùòe’ wā mvtú svng dvdvm dvzvrè.

Wervt Døngman dø shvlá vtv’ng kupgār vzúngshì nìnø shvngømré chíp kèní nø tiqgø’ nvng tiqgø’ v-toq v-tìp tvrà svng téwa hángà lún nø vsvng mvngpòng nvng vsvng mvdò vrvm taq gø vbóng vtuk dø vl lúnlvm tùbùm dvbvng lún dang ‘ vsvng shvdaq tāsvng tālè v-toq v-tìp we Tvrào àng dvpø’ nvng vchvk dang svng dènila rvtø rì taq vpø’ taqsórí dvtán lvm gvzà vchvk dang vpø’ shvring nø shøn bø’à.

Svrabín Koqkvm Leo (14) nø Vsvng shvngbe dvhø vrashì dvman lòng nvng vpø’ shì lòng svng há:ng lúnlvm rvt vkvtdø dvnúng shì we bvnlìrì dvpvt oqā wa dang lvngdøm dvtøp taqsórí

shøn bø’ì nø, wè rì nvng wè àngmaqò bvnlìrì mvdvmø Gvray gvsangò Shvmv’n jèjú ìshøt zì shvlang nø Shvmv’n dvgø’ng lòng svng wa bø’à.

Tvlíng We- Svra David

News- Vatican News