Nigeria móngdàn taq Catholic shvrúngshú tiqgǿ shvt vhǿm bǿà we
September 19. 2025 ni Nigeria móngdàn Nsukka taq Shvrúngshú Matthew Eya nø àng rungwe St. Charles gø̀rwang svng di we modo tvrà taqø vsvng tiqmvdoí shvt vhǿm bǿà we svng shálún shìe.
Nigeria móngdàn nø vsvng dvcì pv̀n kø̀m nø màbóng we kv́m nøt tvrà àngpv̀n pv̀n, màbóngwe tóng laqyà rì vdòngø mvngushì nø vlwe móngdàn tiqlòng gø íe. Nv̀mløp Africa móngdàn rì dvhø̀ vchvk we móngdàn tiqmóngdàn gø íe. Ínìgø móngdàn vdòng taq vtang kèní mvrø̀ we, kø we, vsv̀ng shvt we, bv̀nlì màdá vsvngrì, dvshà vsv̀ngrì gø gvzà vlnø shømløm tvrà mv-vl we tiqmóngdàn gø íe wanø̀ shálún shìe.
Móngdàn zìdang vhángwe tiqmóngdàn wawe taq móngdàn vdòng taq vsv̀ng gorø luqwe, móngdàn taq dvcøp shvnvp ràwe bv̀nlì rì luqwe móngdàn vsv̀ngrì mvdàmø vré shìwe vsv̀ng mvdò rì luqwe rvt shìwvt rì vkǿn we móngdàn tiqlòng gø íwe svng shálún shìe.
Móngdàn vsv̀ng go rø rì taqkèní tiqka dángte nø Muslim vsvngrì ínø̀ Christian vsvng rì gø luqwe íe. Muslim dvcì rì taqgø Soni Muslim dvcì nø tewa go rø luqwe íe. Christan rì dvhø taq nø Catholic Sasvna shvngø̀mré vsvngrì téwa luq we ínø dvgá Evangelicals nvng Pentecostals shvngø̀mré rì gø vl we móngdàn íe.
