Tvle teqshì we, mvdø̀ng mvdaq móngdàn kèní shvlu:mò we nvng dvki vrè we tvrà vhǿ:mò vsvng rì dvpvt lvpat tvrà shìwvt rì
Pope Leo XIV taqkèní Gaza rvgaqø dvshà mvhøt vhǿ:mò vsv̀ngrì nvng àngmaq kaq svng tubúm dvzaq shìwe dvsháza mvdò rì kaq svng mòngzø̀l lv́m tvrà dvpvt røtnímā we nvng oqà wawe kà dvtú bǿà we íe.
Gaza rvgaq taq dvsha mvhøt vhǿ:mò vsvngrì kaq tubúm dvbangā lv́m dvpvt dvzaq shìwe vsvngrì, Holy Land taq øpshøl we shølshú vgo rì taqkèní Tvle teqshì we, mvdø̀ng mvdaq móngdàn kèní shvlu:mò we nvng dvki vrè we tvrà vhǿ:mò vsvng rì dvpvt nònggwon ziwe nøt shvlø̀m kà dvtú bǿà wegø íe.
“Vsvng wawe nø cømsaq mòngzø̀l we tvrà svng jø̀ng jǿng ni rà vchvkwe íe wervt we mòngzø̀l lv́m tvrà svng mv̀ng vrang dèzaq shìnøng wanø Svrabín koqkv́mpèí dvkám bǿà we íe.
Shóngshø̀ngwe vnvm vchvngrì Gaza rvgaq taq shvnip shvnvr vhǿ:mòwe vsvngrì kaq tubúm dvbangshì nø dvsháza bv̀nlì taq dèzaqshì nøngwe vnvm vchvngrì shvngbe svng shvngø̀mré kèní vtangshaq dvbù nø:tní oqà waìe wanø̀ dvtú we íe.
Pope Leo XIV nø mònggv̀n rvgaq cømsaq mòngzø̀l lv́m tvrà svng shóngshì we nvng we tvrà dvpvt bv̀nlì pv̀nyv̀n wawe íe. Vsv̀ng tiqgǿ vrv̀mò àngmaq lvpat, dvgùng rì svng vpǿ shvringā rawe dang kadvgvp gø dvkv́m we íe. Shvnip shvnvr we bv̀nlì rì svng vgám dvzaq shì nø̀ Gaza rvgaqø dvshà mvhøt vhǿm bǿà we Palastine dvcì rì kaq dvsháza nøt bùm we dang svng gø vtànòe.
Gvray dvkv́m kà íwe vsvng lvpat svng mèshvtni wawe dvkv́m kà kèní vsv̀ng tiqgǿ vrv̀m, tiqgǿ nvng tiqgǿ tasvng vpǿ keràwe, dvsháza nøt gv́l shì ràwe dang vtànò nø shvrv́m shvrá shìlv́m mvjàn rì shvngbe svng nvr lv́m dang svng gø røtním bǿà we íe.
