Nøt shvlømwe jejú wawe nø kámnøt tvrà vdòng taqwa yvnglún shìe
Pope Leo XIV taqkèní Kristuò Jubilee nøng mvsat vjúrøt kùng taq Yesu vdòng kámnøt vtiqvm we vsvngrì, lvpat tvrà taq dvshà mvhøt vhø:mò vsvngrì chutcháng we jejú nvng nøt shvløm we ìshørì vtoshì lúnlvm dvzaq shìràe wanø dvkám we íe.
Welòng vjúrøt lìpùngmè taq kám vsvngrì 9000 rvzé gø kømngøm ráì nø wedø dvshàvhøt vhømò vsvngrì dvpvt vjúrøtā we íe.
Diane Foley tøshìwe svmaré tiqmè nø àngcèpè James Foley svng 2014 nøng taq kám vsvngrì kaq vtùwe ngànshà mvdòrìí shatā bøà we ínìgø àng taqkèní we ngànshà mvdò rì svng mvrà chutā lúnbøà we dang shvkse kámshì lú:ngì.
Lucia Di Mauro Montanino
Pope Leo XIV taqkèní gø yanilaò mònggvn dvjà taq mvhøt lvm àngpvn pvn vkønwe vdòng dvshà mvhøt vhø:mò vsvngrì kaq nøt shvløm lvm laqni vchvk we rvtø ínø Gvray kaq zøm shvngáng shìlvm nvng vjúrøt dvzaqshì ràwe dang dvtú we íe.
Yadø íwe rvtø dvjà vdòng taq kám vsvngrì tiqgø nvng tiqgø tasvng nøt shvløm nvnggwòn vzí kelvm nø vchvk mvdøng íwe svng gø dvkám we íe.
Tasvng mvrà chutā kewe nø muqlàng móngdàn ìshøt tiqlòng gø íwe nvng ngànshàpèò dvløt gvzàm we tvrà svng gø dáng lún nø Gvray yvngkèní dvsháza shóngnøt vtoshì lúnwe tvrà gø íe wae.
Gvrayí nø nøngmaq shvngbe svng rvgaq mvdàmø tasvng dvsháza shóngnøt kèní vzøm vzvp lvm, mòngzøl we tvrà svng vrang dvzaqshì lvm àng shóngshìwe nvng rvgaqò gálòng wáshì lvm dèkám ráshà we íe.
News- Vatican News
