Svrado rì wawe nø Yesu Kristu ò vjúrøt we bvnlì nvng cipshìwe tvrà svng cvndøng we vsvngrì íràe

Ya lvbán vdòng Rome taqø Svrado rìò lìpùngmè taq kømngøm ráì we móngdàn vrvm kèní Svrado àngshvr rì kaq svng Pope Leo XIV taqkèní Svrado rì wawe nø Yesu Kristu ò vjúrøt we bvnlì nvng cipshìwe tvrà svng cvndøng we vsvngrì íràe wanø dvkám we mòngkà kèní dvtú bøà we íe.

Svrabbín koqkvmpè ò nvnggwòn zi mòngkà taq “nàmaq nø kvmnøt tvrà, vsvngrì ò dvzvr shvlá rì wáshì lvm dvpvt Gvrayí ego bøshà we vsvngrì nvng àngò dvzvr rì èínønge. Àngò jejú rì nø dvbùshvng bvnlì tvrà dvpvt ni íe”.

Dvbùshvng bvnlì tvrà taq vsvngrì dvpvt dvzvr bvnlì wae walòng nøYesu àngí shvngøt dvtú ráà we nøt laqya ku bashà vsvngrì kaq Yesu nvng tvpní shìlún lvm tvrà svng dvzøm dvziā we nvng tubúm dvbangā lvm bvnlì íwe svng dvkám we íe.

Gvray nø nøngmaq bashà rì dvpvt ngór dvgùng gùngshvngrì taqkèní tuq ráì we møí Kàngpè Gvray ò dvsháza shóngnøt kèní mvng tuq ráì we íe.

Dvgùng vlwe rúngtàng svng shóngshì we coqcvn rì kaq Yesuí shvdøm nø dvkám ráà wedø Svrado rì àng vdè tiqgóng svng gø Yesu àngò dvzvr rì íshàe walòng svng kadvgvp gø màná shì lvm St. Augustine taqkèní vtàn ráà we íe.

Wervtnø vjúrøt dvzaq shì lvm nvng cipshìwe nøt laqyà rìí we tvrà taq dvzaq lvm Yesu àngò dvzvr rì dø shvbóng shvmvt shì lvm shvdøm we íe.

Bashà vsvngrì ò chutcháng we tvrà, kámnøt tvrà taq ripā we Svrado rì nø shvngømré vdòng taqø gø shvlá vtang øp shøl nø dvbùshvng mòngkà dvshvng lvm wáshì ràwe svng dvkám we íe.

Mònggvn dvjà àngpvn pvn, mvjànrì, toniò dvjáng àngpvn pvn dø íwe yaklvm shìwvtrì vkøn rawe rvtø kámnøt tvrà wawe chutcháng we tvrà, nøt shvløm rà rì taq shvngømré vdòng kèní tuqrawe vsvngrì shvngbe kaq svng bvngkà kadvgvp gø tánā lvm dvgø shì lvm dvkám we íe.

Kám vsvngrì, àngnvng àngchvngrì shvngbe dvpvt, shvrúng shú rì shvngbe kaq svng øpshøl we, àngmaq shvngbe ò vlømrà íwe vyvng roqshú shvlá bøn lúnlvm dvzaq shì rà longe wanø Pope Leo XIV taqkèní dvtú bøà.