Nà svng røt ra we kagǿ svng gø èzíò.
Ngà kà ètánøng rì namaq svng Ngàí v̄la:tnìni, namaq nvng ngv̀nshà í rì svng èshóngshinø̀ng. Namaq svng shvngōshì rì kaq nø shvlā we èwáānøng. Namaq kaq shèyǿm mètv́nvtnøng rì svng shvmán dègǿngānøng. Namaq svng mèyv̄mkévtnø̀ng rì dvpvt vjú èrøtnanøng.
Nà mvwā tiq pa napaqvt gǿ svng nø wápā gø shènáshi. Nà belaq mvdv̀m dùng ètølvm bø gǿ svng nø vdòng dùng gø màzí mèwāni. Nà svng røt ra we kagǿ svng gø èzíò. Nà dvzøm dvrèrì èlv́ngāvm bø gǿ kèní gø mègùnni. Vsa:ngí namaq svng kadø lvwáa rā dø èshòngnøng nìnø, namaqí gø wedø tiqdvchá angmaq svng èwáānøng, wàe.
Vpø’ íwe pèmè vnvmchvngmaq, Namaqò Vnē, v-na, Dòng Nønt mvsøn vjang laqya rì Gvray gvsang nvng màcar lvm rvt nayáshìnøng nøng Svrabín Koqkvm Leo 14 í dvkv’m dø tiqdvchá Dèni Luka 6;27-38 vdòng taq gø Dòngnønt mvsøn vjang laqya dvcøp vdv’ngshì nø shvla we bvnlìrì wàlvm rvt dvkv’m dang tálúnshìe.
Vrá nø, Shvngømré vrvmò shvngøt dvtú lòng taq chaqdvp cvndvgøm lvm rvt mvmè rvnaq dø shvngøt dvtú dang rì vbáè. Dènio Vkangpè dvbùshang Mongkà taq, àng mèpvng cvn lvm rì cvndvgøm vpnóng tvleshì lúnlvm rvt mvdøng (4) mvtú taqkèní dvkv’mè. Cvndvgøm lúnlvm mvtú v-ní lòng nø, ngvnshà rì kaq shóngshì lvm nvng Vshér øp kvng Dvrá, vyáshì lvm v-ní mvtú nø, vtánshì lòng nvng Tiqdvng vsvng kaq Kà rvt lòng íe. Cvndvgøm lvm Dvla rì nø mvbø’n wàwe mà-vl, rvzaqè. Vkangpè Yesu angí ni cvndvgøm nø dvtán yangà pàdø Kvmnønt Shvre Shànshér vsvngrì taqkèní gø bø’ndaq lún dang svng shvkse dvtán yangà we íe. Rvgaqtøm taqø dvshá mvhøtlvm rì mvmè vhø’mshì yv’ngkèní lúnshì lòng nø téwa ring nø vpø’ we íe. Wervt vpø’ íwe vnvmchvngmaq nøngmaq gø Shànshér Pvlàcè Gvray kaq jèjú Ìshøt rì røtnímshì taqsórí Gvray gvsang shóngwámshì we Dvrá Mongkà rì svng cvndvgøm nø, tvleshì sórí dvzaqshì laq lúnì, wvng dvshat nø nònggùn zí mvyøngè. Shvngbeí Gvray ìshøt, mongzøl lòng vtoshì laqlúnì.
