Kàngpè Yesu dvtánshì we
Namaq nvng tiqdø dvshà mvhøt nvng móngdàn nvng Yesu vdòng taq vl we tø̄nzánnøt mvngú lúnò we, namaq nvnvmpè Yohan ngà nø, Gvray mòngkà nvng Yesu Ang shvkse kà rvtnø, Patmo tǿò we tìshvlòng móng taq v̄l dvgvp, Vkàngpè angni taq ngà nø Shànshér Pvlàcè zø̀ngv́mà nø, ngà mèpv̄nglap kèní dòdi shaqmè dø gǿng we shaq tiq lòng tángò nøngnø, yadø wae. “Nàí èyà:ngòrì kàru taq nàruò nø, Efesus, Svmørna, Pergamum, Tiatira, Sardi, Piladelfia nvng Laodicia mvrìng rì taq vl we shvngø̀mré we shvngøt lòng svng shèriò,” èv̄le.
Wekvt ngà svng kà tv́ngshì gǿ svng yv̀nglv́m ngà wv́l pongshø̀ng nø̀ngnø, shé svmigwìn shvngøt tv̀ng yv̀ng bǿngà. Svmigwìn we shvngøt tv̀ng dvhø̀ taq nø, Vsvng Angcè pè dø í we tiq pè ngàí yv̀ngòe. Ang belaq nø hízǿ yv́ng høqò we gwashi nø Ang gv̀ng ram nø shé juqnv́m tiq kø̀:mí nv́mshìe.Ang vgo nvng Ang vni nø mùng we vyv̀ng mø̄l dø í nø tvwv̀n døni mùnge. Ang vne nø svmi mv́làm dø vcōre. Ang hí tángní nø, ràdv̀ng taq dvchǿngshaq í we,* dvjǿlshaq mvshǿng dø vshv́m nø, Ang kàshaq nø tì mvme wàng vhoshi we shaq dø táshìe. Ang wur vbàng pā taq nø kurnip shvngøt chv̀ng lá:ngò nø, Ang nònggøp kèní nø vní laplap déò we shv̀m tiqkā vshv̄le. Ang mv́r nø nv̀m gvzà gáng dvgvp shór dø kvlànge.m
Ngàí Ang svng yv̀ng bǿngà chàng, shì vsvng dø Ang hí yv́ng kǿng vkupmv́mà kvt Ang wur vbàngpa ngà mvdv̀m hapshì nø yadø èv̄le; “Mèsèreni. Ngà nø nv̀mlat pè gø, lv̀ngdø̀m pè gø ǿngàe. Ngà nø cúnshì pè ǿngàe. Shí gø shø̀ng yv̀ngà. Iwe èyà:ngò, Ngà nø dvcìq lvpat cúnshø̀ng nø shìlòng nvng zùpvng dang ang shv̀msòpuq rì gø Ngàí lv́ngòe. Wervtnø̀ nàí èyà:ngòrì gø, akvt v̄lrì gø, akvt kèní kukaq bø̀nlv́mrì gø nàrūò. Ngà wur vbàngpa taq nàí èyà:ngò we kurnip shvngøt chv̀ng nvng shé svmigwìn shvngøt tv̀ng ang vmáshaq kà nø yadø íe. Kurnip we shvngøt chv̀ng nø, shvngø̀mré shvngøt lòng ang dvzv́r rì íe. Svmigwìn shvngøt tv̀ng gø shvngø̀mré we shvngøt lòng íe.”
