Pope Leo XIV Vatican móngdàn taq wáshì bøì we ‘dønghku bóy àngni’ taq kømngøm bøì we
Svrabín koqkvm Pope Leo XIV nø Vatican móngdàn taq wáshì bøì we døngku bóy àngni tvyø lvmvng vrvm taqkèní mòngzøl dø vto bøà we svng shálún shìe.
We bóy àngni taq cvmré rì àngyá rvzé gø kømngøm ráì we nvng mòngzøl dø wálún bøì we íe. Ya bóy àngni nø May 8 ni taq wáshì vdu we ínìgø dvjà àngpvn pvn rvt shøt vdu bøì nø ya September shvlá taq wá vdu bøì we svng gø shálún shìe.
Ya bóy àngni taq Pope Leo XIv nø cvmré rì gorø àngkíng rvzé gø nvng tidø àngò nvnggwòn zi mòngkà taq ‘ cvmré rì nvng vnvm vchvngrì yabóy taq kømngøm ráshà we Gvrvy jejú vdò shóngnøt bvngkà rì svng tánshàì nøtasvng vzøm vzvp lvm tvrà svng tóng dvzaq shàì.Téwa Gvrayí shèmvnāì we gønshaq, lvpat tvrà taq shaq shaq wa vzø:mì nø àng dvgù:ng svng shvring shvtà lvm wàì’.
“Døngku vdòng taq dvzaq dvkáng shàìwe vsvngrì tigø vrvm kaq dvbù nøt dòngnøt taqkèní pàmvrà wange. Yabóy tvyø rvtgø oqà wange yadø Gvray dvpvt svkse wáshàì we nø dèni bat nøngmaqò mònggvn dvjà dvpvt gvzàni vnvpnø vpøwe laqyà gø íe. Nøngmaqò àngpè àngmè rì shvngbe kaqsvng gø oqà wàlvm vchvke. Døngku vsvngrì dvpvt dvzaq dvkángshì nø mvkok we nø Gvray àng shóngshìwe nvng àngí shvngøt dvtú we tvrà gø íe”.
Yalò bóy tvyø vdòng taq kømngøm ráì we shìwà vsng shvngbe Svrabbín koqkvmpè Pope Leo XIV nø vjú røt tvyømè tiqlò ng kèní lvmvng tvyø shvngbe svng shølnø mòngzøl dø wálún bøì we svng vrìngvtnà we íe.
