” Ngà vtì bále, dvng bøngà”
Pope leo XIV taqkèní ya lvbán vdòng Yohan kàru taq vru shaq íwe Yesu wurgáng mvdàm kéní shøn vtàn ráà we ” Ngà vtì bále, dvng bøngà” wawe kà kèní dvtú bøà.
Yesu svng wurgáng mvdàm ø vtaq bøà we rvtø dvshà mvhøt vtang vhø:mò we ínìgø we rvtø nø bashà rì dvpvt gálòng tvrà svng pvngshì we rvtø gø íráì. Wurgáng mvdàm taq Yesu àngí vtàn ráà we kà 2 kà nø àng nø Gvray àngcèpè vjøng íwe dang vtàn ráà wegø íe.
Welòng nø Yrsuí bashà rì mvdàm dvsháza shóngnøt vtà:nò we gømla tiqlòng gø íe.
” Ngà vtì bále, dvng bøngà” wawe Yesuí vtàn ráà kà welòng nø bashà rìò shìwvt mvrà rì shvngbe svng dvshérā bøà we nvng chutcháng we tvrà svng jórlún we àng lvjø, mvtú svng vtànò we íe wanø Svrabín koqkvm Pope Leo XIV taqkèní pøn nø dvtú ráà we íe.
Yesu Kristu nø àngò làngdøm røtkà íwe vtì bále wakà nø mvrà døng kèní shèlut ráshà we nøngmaq bashà rì kaq dvsháza shóng nøt vjøng, kèní dvzøm dvzi kelvm laqyà svng shvngøt dvtú wegø íe.
” Ngà vtì bále, dvng bøngà” wa kà taq àngò dvsháza shóngnøt kèní dvshà mvhøt tvrà døng taq chutchvng we bvnlì tvrà svng vdvngá:mì wawe mvtú svng pønā we íe.
Chutcháng we tvrà wawe nø kvmnøt tvrà svng svre nøt mvvl, dvsháza shóngnøt kèní màshvlawe tvrà svng kù:ngàí gvsat we íe.
Wervt Gvray àngcèpè nø mvkøm mvzøp we lvpat kèní vdu vbóng we dvrá tvrà rì svng shvdøng shvngángā ráshà we nvng chutcháng we tvrà vdòng taq Gvray àng nvng vzøm vzvo lúnlvm tvrà svng gø ètóngā ráshà we íe.
” Ngà vtì bále, dvng bøngà” wawe kà yalòng nø Gvray yvng svng nøngmaq shvngbe kaq eshøl ìwe tvrà tiqlong ni íráì.
Pope Leo XIV taqkèní nonggwòn ziwe kàtaq nøng maq shvngbe nø Kristu vdòng taq vnvm, vchvng rì íshà we nvng døngmvn we tvrà kèní mòngzøl we lvpat rì svng vrang dvzaq shàì Gvray yvng svng vjúrøt dvzaq shì lvmgø laq màtiqì wanø lvpkà kèní dvtú ráà we íe.
