” Svrabín Koqkvm Leo (14)í October shvlá dvnùng lvm tvyø rì dvráshang shá dvzvr we “
Cardinal Robert Francis Prevost nø Svrabín Koqkvm Leo (14) ku bvnlì rí lúngì we vkvt (4) shvlá í bø’ì we íe. Svrabín Koqkvm nø ya rvtø Italy móngdàn vdòng taq wā Gvray Mongkà shvdik shì nø móngdàn vrvm yv’ngkèní shvngømré, móng lvmvng, v-toq v-tìp shølshú vgo rì, mvdò cerì kaq svng wā vtō nø v-toq v-tìp dvman we íe.
Dènøng taq gø Jubilee nøng í dø tiqdvchá (2024 Dec 24) kèní (2026 Jan 6) ni høq vrvngò we tvyø rì svng dvnùngòe.
Tuqdaq we October shvlá taq Svrabín Koqkvm pè í kadø íwe tvyø rì taqkèní dvnùng shøl lvm lòng svng Dvráshang shá dvzvr lúngì. Shá dvzvr dø tiqdvchá October shvlá nø Svrabín Koqkvm dvpvt bvnlìrì mvmè luq we shvlá wā nvmlat taq shá dvzvrè. Íni gø tvyø rì mvmè nø Jubilee nvng sing we tvyø rì ínø Dvzvr.Piter Noqngøm Chøm tøm taq wā dvnúng nø wá ra dang íe.
1. October shvlá (5), Nár ni.
Mònggvn dvbùshang Sasvna wà rì nvng vsér v-du dvshà vsvngrìo Jubilee bóy dvpvt St. Piter Noqngøm Chøm tøm yv’ngø Vsháng Missa Noqngøm vjúrøt lòng svng wàlvm í bø’ì.
(2) October (9), Nár vbí ni.
Wè ni nø vshøm gø’ tiqlvpat Ka shvdiq zí shì yangì we Kvmnønt Shvre vsvngrìo Jubilee bóy angni gø ínø, Svrabín Koqkvm pè taqkèní St. Piter Noqngøm Chøm tøm taqø Jubilee Missa Noqngøm lòng svng wàlvm í bø’ì.
3. October shvlá (12), Nár ni.
Wè ni gø Vmè Maria o hang nvng shvbóng shvmvtshì cvndvgøm cúnshì we mvdò rìo Jubilee íe. Wè mvdò nvng tiqdø Jubilee Missa svng Noqngøm lvm í bø’ì.
4. October shvlá (19), Nár ni.
Mònggvn dvbùshang Sasvna angni íe. Wè ni taq Shànshér vsvng (7) gø’ kaq Shànshér vsvng wā dv’ngshì nø dvshvngò Missa Noqngøm rvtø svng Dvzvr. Piter Noqngøm Chøm yv’ng dvnùng nø wàlvm í bø’ì. Vkvtdø Shànshér vsvng wā dv’ngshì rì yv’ngkèní Gaíchuk Svrado Ignatius Choukrallah Maloyan gø vbáè. Àng nø Mardin yv’ngø Dvci gùn shvt we Mvra dam gvba wá vléò (1915) nøng la taq Dvrá Mongkà dvpvt gønshaq dvbø’mshì yangì we American Kvmnønt Shvre tiqpè gø íe.
Tv’n dvgá tiqpè nø Papua New Guinea móngdàn kèní Mongkà Svra Peter ToRot lvnshi pè íe. Wè pè gø (1945) nøng taq Dvrá Mongkà dvpvt shvt vhø’m yangà. Wè rvtø we rvgaq svng øp dvkvngshì we Japan vmìng vkang vl rì í àng kaq svng Gvray dvbùshang móngkà mà dvshvng lvm rvt dvkv’mò we íni gø, cvndvgøm we mà-vl dvtut dvshvngòe. Ang nø Papua New Guinea móngdànò Nvmlat Kvmnønt Shvre Shànshér vsvng í lúngè.
Shànshér vsvng wā dv’nglvm rì yv’ngkèní Kvmnønt Shvre Shvrúngshú dvzøm me la (3) gø’ gø vbáè. Wè rì nø, Kvmnønt Shvre Vincenza Maria Poloni, Kvmnønt Shvre tiqpè gø vbáè. Ang nø, Maria del Monte Carmelo Rendiles Martínez nvng Kvmnønt Shvre Maria Troncatti maq íe.
Kvmnønt Shvre Vincenza Maria Poloni nø beronica dvzømshú mvdò svng vrvng yangà pè íe.
Kvmnønt Shvre Maria del Monte Carmelo Rendiles Martínez í gø Vkangpè Yesuò dvzømshú mvdò svng vrvng yangà pè íe.
Kvmnønt Shvre Maria Troncatti nø tiq lvpat vpnóng Kà shvdiq zí shì we dvzømshú tiqme íe. Ang nø rvtø v-rvm tùbùm dvbvng sháò we Medō dvzømshú mvdò vsvng íe.
Shànshér vsvng dv’ng lvm (7) gø’ yv’ngkèní àng wa, shvngømré rvzvngce (2) gø’ gø vbáè. Wè gø’ ninø, Kvmnønt Shvre José Gregorio Hernández Cisneros nvng Kvmnønt Shvre Bartolo Longo maq íe.
Kvmnønt Shvre José Gregorio Hernández Cisneros nø Binizela móngzøng vsvng doctor tiqpè íe. Ang nø St. Francisò Pvlàcè kvmnønt Dvla hang svng cvndvgømo gø’ gø íe. Ang nø dvshá hoq vsvngrìo Svra pè wa shvring vpø’ò pè gø íe. Pàwàlvm wàni Ja gvmsung màdá vsvngrì kaq Cì svng dvpø’ màdá lvjv’ngào pè gø íe.
Kvmnønt Shvre Bartolo Longo nø Italy móngdàn, Bungbe Medō Noqngøm Chøm svng vrvng yangà pè íe. Gvray Vmè Maria svng gvzà vpø’ shvringò pè gø i dø tiqdvchá Italy mongzøngcerì gø Bungbe Medō Noqngøm Chøm kaq svng dvbù vshò we í dì nø Vmè Maria kaq vpø’ shvringò lòng svng dvtánòe.
5. October shvlá (26), Nár ni.
Svrabín Koqkvm nø Sasvnaò dvgvng angdang dang taqkèní lúm we synod mvdò rìo Jubilee bóy me Missa svng Dvzvr.Piter Noqngøm Chøm tøm taq Noqngøm nø wàlvm í bø’ì.
6. October shvlá (27) , Nár tiqni.
St. Piter Basilica Noqngøm Chøm me yv’ng Roma Myoq vdòng taq vl Svrabín Koqkvmò Wur lvngpvng taq vl college zong mangrì nvng tiqdø Missa Noqngøm we í àngmaqò Paqzi cvnshì nøng àngshvr nvmlat pvngshì lvm dang shá dvzvr lúngì.
Tvlíng We- Svra. David
