Yesu Wurgang taq vtaqò we
Yh 19:25-34
Kristu vdòng taq shóngshø̀ng we vnvm, vchvng maq dèni Gvray shv̀nshér mòngkà kèní yv́nglún shìwe nø rvcángcè rì shvngbeò àngmè, shvngø̀mréò àngmè gø íwe Mari dang svng yv́nglún shìwe íe.
Yesuí àng wurgang mvdàm kèní lvp ráà we kà taq “Svmaré mèá, èyà:ngò, nvcèpè, coqcv́n wepè svng gø eyà:ngò nvmè” a:loe”. Dèni Yohan kàru taq yv́ng shìwe wekà nø gvzà ni vpǿ ringwe nvng lvjøm gø rvnaq we lvpkà íráì.
We lvpkà nø wurgang lvmpvngø ripwe àngmè Mari nvng coqcv́n Yohan svng lvp ráà we kà íe. Yohaní vrá wekà svng vsv̀ng shvngbe svng lvp ráà we kà tiqlòng íe wanø̀ lvjøm kèní vsvng shvngbe svng kupgvrā lv́m Mari yv́ng svng røtním yv̀:ngà.
Yesu Kristuí wurgang mvdàm kèní lvp ráà we, we lvpkà nø kadangshì vchvke walòng svng nøt cun dvtøp shvla wegø íe. St. Alphone shø̀n yv̀:ngì we taq shǿngshí èshòng nìnø, we shǿngtø̀ng lv̀mpvng svng èdi, Yesu svng èshóngshì nìnø̀ àngmè Mari yv́ng svng èdi” wanø̀ shǿn vtàn yv̀:ngà.
Wervt Catholic Sasvna vdòng taqø Mariò bóy àngni svng wáshì we àngni taq chutchv́ng we tvrà íwe Yesu wurgáng tvrà, Yesuí dvshà mvhøt vhǿ:mò we tvrà rì shvngbe nvng Gvrayí Mari àng svng kadø íwe bv̀nlì døngjá svng rí dvzv́r mvyǿ we bv̀nlì dvlà rì shvngbe svng màtiqdø cv́n dvgøm ráà we dvdam shì nø dvgùng shvring wegø íe.
Mari taqkèní dvshà mvhøt vsvngrì kaq dvsháza vjúrøt dvbangā we bv̀nlì nø rvgaq mvdàmø àngò làngdø̀m àngni høqshaq dvzaqshì yv̀:ngì we ínø̀ àng taqkèní vtàn ráà we bv̀nlì tvrà, nøt laqyà rì svng chvpdvp taqgø cv́n dvgøm dvzaq shìlv́m wàì.
