Shóngnøt dvrøt
shóngnøt wawe nø vsvng shvngbe dòngnøt taq vshøp we dvzà tiqlòng íe. Tiqgǿ nvng tiqgǿ vzø̀m vzvp we, vtoq vtip we gømla tiqlòng gø íe.
Ínìgø vsv̀ng tiqgǿ taq welòng shóngnøt welòng svng nøt za, nøt dvtvm wekvt vdè tiqgǿ wa vsv̀ngrìò kùlwàng kèní yilshì vmwe gø íe. Shóngnøt walòng nøt zá, nøt vtøpvm dvgvp svre nøt, mvwám shì nøt laqyà rì nvng vzer shìwe nøt rìí mø kebǿò we gø bǿn sháò we íe. Shóngnøt walòng svng bvttut nøt vtvngvm we gø íe.
Yesu Kristu taqkèní gø àng coqcv́n rì svng dvbùshvng bv̀nlì dvzv́rò dvgvp “Wechø̀m taq mòngzø̀l lòng lún vpǿ we vsvng vl nìnø, namaqí shèmána bǿshà mòngzø̀l lòng nø wechø̀m mvdv̀m tuq daqe; màvl nìnø namaq svng vwv́ng rae.” wanø̀ lvpyv̀:ngà we shv̀nshér kàru taq yv́nglúnì wegø íe.
Yalòng taq vdè taqkèní èzíò we gø̀mpaq tiqlòng svng àngmaq shóngshì nø̀ vtoshì kvt kèní nø àngmaqí lún daqò nø̀ la mvshóngshì nø̀ màto lú:ngò dvgvp vdè yv́ng svng ni vtv́ng longwe svng vtàn ráà we íe. Mòngkà wetut taq dvdam lv́m vlwe nø mòngzø̀l lòng wawe kà svng yv́ngshìe. we mòngzø̀l lòng wawe nø shóngnøt kèní bø̀nbung we tvrà gø íe.
Shóngnøt dv̀nzø̀ng we tiqgǿ vrv̀m taq mòngzø̀l long wawe gø àngmaq dvpvt ni íā lú:ngòe. Vsv̀ng tiqgǿ taq nøt bùm lv́m tvrà pàgø mv-vl vmwe kvt mòngzø̀l long nø wedøni tuqrawe íe. Vsv̀ng nøt wawe nø vdè kaqsvng tiqdv́ng vsv̀ngí shvnip shvnvr vmwe vhǿm shì bø dvgvp vrá tvle teqshì mvyǿì we vsvng wa íshàe.
Ínìgø Gvrayí dèkv́m ráshà we taq vsvng shvdaq daq “kà:ngé kewe wá mvdaq wanø̀ dèkv́m ráshà. Wervt wedø írawe tvrà svng gvrshì lv́m wawe nø̀ tiqdv́ng vsv̀ng kaq shóngnøt dvtvnā we, shóngnøt zíā we tvrà tiqlòng wani shvlá vtvng íwe svng dvkv́m we íe.
Wervt tiqdv́ng vsvngí vdè yv́ngsvng mà shvla we nøt laqyà wáshì rawe dvgvp gø welòng svng vdè tiqgǿ taqkèní màto shì lv́m vchvk we íe. Tiqdv́ng vsvng kaq shóngnøt gv́lshì we nø mà shvla we nøt laqyà rì shvngbe nø vdè yv́ng svng tuqlv́m màpǿ dø vdè tiqgóng svng gvr shàì wegø íe.
Wervt vdè góng vdè shóngnøt zø̀ngwe vsv̀ng tiqgǿ ku cúnshì ràì we íe. Vsvng rvtnø̀ vdè ò nøt laqyà mvgám svng màpo lv́m dvzaq shì ràe. Vdè tiqgóng svng shóngnøt wawe kùlwàng dvrøt kwvng shàì nø vl lú:ngì wekvt mòngzø̀l lòng svng gø vtoshì lún lú:ngì we mvtaq tiqdv́ng vsv̀ngrì kaq gø dvzà dø íwe vsv̀ngrì kaq vjú zílún we vjúrì vto shì lv́m ílonge.
