Àngde í naléò we Mvra rì svng Gvray gvsang mvrdvng yv’ngø māshì màshvla.
Hkristu vdòng taq vpø’ íwe pèmè vnvmchvngmaq Dèni rø vdu we Gvray gvsang mongkà svng dvdvm vjáng taqsórí nònggùn lùshìlvm, nònggùn vzí ké lvm Gvray dvbùshang Mongkà nø Mati 22:1-14 ciq vdòng taqkèní íē.
Vpø’ íwe Pèmè vnvmchvngmaq,
Rvgaqtøm taqø nònggùn kūnga shaq mà vnø’n vsvng, shaqcvm lvm nvng vcar vsvng mà-vl pàdø, Mvra mà-vl we, màlé shì vsvng gø tiqgø’ gø mà-vl. Àngde í naléò we Mvra rì svng Gvray gvsang mvrdvng yv’ngø māshì màshvla, walòng svng dènio Gvray dvbùshang Mongkà taq dvtánòe, yv’nglúnshìe.
Zvmì shvzøng bóy kaq svng vsvng mvmè dì lòng svng yv’nglúnshìe. Lúm we vsvngrì go rø gø mvmè luqè walòng svng gø dvdvm shvlàe. Pàwàlvm wàni Palastaí taqø Zvmì shvzøng bóy nø Døngku tiqlòngò Bóy wā mø-í nø, vsvng mvngpòng shvngbèo Bóy tiqlòng gø íe. Lvnga shvr Døngku pè nvng Zvmì shvr Døngku mè ní wā byō we bóy gø mø-í , angri angrvp rì, dvci cerì shvngbe byō we bóy tiqlòng íe. Vkvtdø í rvt, Zvmì shvzøng bóy kaq svng dì rá íwe, lúm rá íwe vsvngrì yv’ngkèní tiqpè svng wā rvzvngò we wàòe. Ya dv’ngte luq we vsvng mvngpòng rì yv’ngkèní tiqgø’ svng wā tiq nvmshá vtv’nglvp kaq ngvmō we wà yangà, vhø’m yangà. Wè pè nø Zvmì shvzøng bóy kaq shinī mvgòng dvgvp vzàng shvzøng shìlvm rvt Bóy belaq svng røtní:mshì nø gwáshì rà we íe. Vkvtdø mv-wáshì rvt Zvmì shvzøng bóy nvng màpø’ we vsvng í á:mì.
Vpø’ íwe vnvmchvngmaq, Nøngmaq rvzvngcerì gø’ vrvm gø Mvra vl lvpat taq wā shvngvrshàì nø Cúnshì v-du we í nì, Gvray gvsang jèjú rì svng vtoshì lúnlvm rvt mà pø’ we vsvngrì í lúnè. Wervt māshì màshvla we Mvra rì dvpvt Nønt mvsøn vjang laqya tiqgóng shvngbe vwángshì nø, língshì nø Gvray gvsangò Pvlàcè ìshøt jèjú rì svng vtoshì laqlúnì, Nønt mvsøn vjang laqya, kūnga àngshvr àngshvr lùshì nø cúnshì laqlúnì, shvkse wáshì laqlúnì wvng nònggùn zí nø dvshat mvyøngè. shvngbe svng oqā.
