Shvnshér we Mari svng muqlàng móngdan kaq tvm vbun bø’à we bóy lvbán niAugust (17),
Shvnshér we Mari svng muqlàng móngdan kaq tvm vbun bø’à we bóy lvbán ni
August (17),
Shvngbe svng pàmvra. Deni deyaq høq roqgvl mvkok shawe shóngnøt angkàng Gvray kaqsvng oqà waì. Ya lvbán nø Shvnshér we Mari svng muqlàng móngdan kaq tvm vbun bø’à we bóy lvbán ni íe.
(1) Dvtvn 11:19, 12:1-6,10,
(2) 1kor 15:20-26,
(3) Luka 1:39-56,
Shvnshér we Mari svng Gvrayí muqlàng móngdan kaq tvm vbunò we yadang svng bóy waì nø Gvray Gvsàng kaq oqà waì nø shvring shvtaì we íe. Mònggvn mvdvmø taq cúnshàì we shvngømré rvcángcèrì gø’ vrvm muqlàng móngdan kaq Gvrayí tvm vbun vhø’mlvm wa íe. Kám we rvcángcèrì gø’ vrvm Gvray mòngkà taqkení dvtú shvngøt we dvrá cvn dvgøm we dang vrvm Gvrayí tvm vbun we vhø’mlvm ídaqe. Gvrayí tvm vbun we mvíninø vde nòngguní muqlàng móngdan kaq ngàng lúnlvm mví. Kámnøt vlwe rvcángcèrì gø’ vrvm, muqlàng móngdan kaq tvm vbun we vhø’mlvm dvpvt nøntløm shàìe, kámìe we kámnøt tvrà svng tubūm dvbvnglvm yabóy svng waì we íe.
Gvray mòngkà taq Elia nvng Enok ní wa muqlàng móngdan kaq shvngàng vbunò we vru shaq íe. Mòngkà taq Shvnshér we Mari svng muqlàng móngdan kaq ngàng we tvm vbun bø’à we mvyvng shì, ínìgø Dvtvn mòngkà taq shøn we Svmàré mè nø Kàngpèò ang mè Mari íwe svng shálún shìe. Jøm mòngkà vruòrì í, Mari svng kadø Shi yvngà, kadø bønyvngà wa nø tiqgø’ ígø vru dvtvn we mvyángshì, ínìgø Dvtvn mòngkà taq shøn we Svmàré mè nø Kàngpè Yesuò ang mè Mari svng dvtú dvshvt we íe. Yadang svng vtoò nø kámlvm 1950 nøng taq shvngømré í, shvdøng dvtú mvsat yvngà we íe.Shvnshér we Mari svng muqlàng móngdan kaq tvm vbun bø’à we bóy lvbán ni
August (17),
Wekvt muqlàng rāmø, vtvngshaq dàlv́m mvshv́lpvrá tiq lòng bung lú:ngì. Nà:mí rvdupshì nø, ang hí lv̀ngpvngø shvlá gø̀m vl nø, ang vgo taq nø kurnip tiqcé vní chv̀ng dvcaq we koqkv́m vmō Moshi we svmaré tiq mè yv́ngshìe. Ang góng taq cv̀mré ríò nø, cv̀mré gv̀llv́m rvt puqnøn za nø vkiq lú:ngì. Vrá, muqlàng ramø shálv́m mvshv́lpvrá shø̀ngshāng tiq lòng yv́ngshìe. Ku, Bø̀rin mvshé gvbà tiq go nø, vgo shvngøt chv̀ng nvng vrø̀ng tiqcé táng yo nø, ang vgo rì taq koqkv́m vmō shvngøt chv̀ng mōshìe. Ang nīgū:ngí nø muqlàng kurnip vshø̀m wál tiq wál svng shǿ:mò nø, rvgaq tø̀m svng dvjá bǿà. Wekvt Bø̀rin go nø, cv̀mré gv̀llv́m dá:nò we svmaré mè mv́rdv̀ngø, angcè gv́l dv́ng bǿò kvt angcè kaq kélvm rvt ripme. Wekvt svmaré mèí lvngà shvdv̀ng tiq pè gv̀l daqà. Wepèí nø shv̀m tv̀ngngúlí vsvng dvcì í dv́ngte svng øplv́m pè íe. Inìgø angcè we pè svng nø, Gvray nvng Ang koqkv́m rúngtv̀ng yv́ng høq tv̀m vbun bǿà (Dvtvn 12:1-5). We Svmàré mè nø shvngømré mèò ang svkse gø íe.
Mari svng Shvnshér e, shønlvm mvdøng nø Gvray dvtú kà tāe, Kàngpè Yesuò ang mè vtoò rvt “Eyà:ngò, ngà nø Vkàngpè Ang vshuqmè ǿngàe. Nà èshø̀n dø tiqdvchá ngà taq laq í daq,” Gønshaq vmánglvm dang mvdøng nø KÀ MVTA we dang íe, Kømgøm kømzøp we cúnshì, lutshìlvm nø KÀ TĀ we dang íe. Kàngpè Yesu nø Angpè Gvray kà svng kømgøm kømzøp dø tøptøp wáshaì nø kà tā wedø, shønrà mv-vl dø tøptøp wa kà tā rvt íe.
Kà tā we dang taq mvhøtlvm dvki vrèlvm gvza loq we svng nøntdúm ràe. Vdè shóngshì we dang svng cvnlvm yòl we dø, vdè í, mvshòng mvwámshì we dang svng cvnlvm nø rvzaqe. Kámnøt tvrà vl lvm ngàngdøng lvm dvpvt dvshvt dvtú we íe. Muqlàng dvzv́r gǿí ang ang svng, “Mariá, mèsèreni; nàí nø Gvray mv́rdv̀ngø jejú èlún bǿà. Eyà:ngò, nà nø góngshvng mèí long nø, angcè tiq pè ègv̀l daqòe wa kà vto bø’à. Mari pàmvrà wa kà svng Elizabetní tá bǿà chàng, ang góng taq cv̀mré gǿ chóngshì lú:ngì nø, Elizabet í, shøn wenø, Svmarérì í dv́ngte dvhø̀ taq nàí nø ìshøt ìgv̀n èlú:nòe. Nà góng taq vl we cv̀mré cèí gø ìshøt ìgv̀n lú:nòe.
1korintu mòngkà taq Kristu svng shì yv́ng kèní jø̀ngjǿng dvzun bǿà lòng nø shi yà:ngì rì zūnlv́m dvpvt angshí vwat íá:mì. Mari nø køptøng we coqcvn dvzvr gø íe. Shvngømré ò, ang mè gø íe. Ang mè tuq we shvrà vrvm taq nøngmaq angcèrì tuqràe. Vchvk mvdøng nø kámnøt tvrà dang taqkení nøngmaq shvngbe nøtcøp nøt nvng svng dvtut cvndvgøm dvzaqshì ràe.
Akvt Marií nø angcè péí, jórlún
bø’à, Shi yvng kení cùnlúnò dø, Marií gø jórlún bø’à nø Muqlvng móngdan svng tvm vbúng bø’à we íe. Medo Mari nø muqlàng móngdan kaqsvng tvm vbúng bø’à we bóy angnī nø nøngmaq dvpvt vlø’mshìlvm dang nvng nøngmaq dvpvt tvrà shølshú shvlá íàìe. Vrá nø nøngmaq shvngbe dvpvt dvhø taqkení røtā dvbvngshú gø íe. Nøngmaq rvcángcèrì shvngbe gø medo Marií “Eyà:ngò, ngà nø Vkàngpè Ang vshuqmè ǿngàe. Nà èshø̀n dø tiqdvchá ngà taq laq í daq,” a:lò dø vto shàì nø, vde wurgáng vde baq shàì nø Gvray móngdan tuqlvm tvrà ding we dang taq cvnlvm waì. Mari svng muqlàng móngdan kaq tvm vbun bø’à dø tiq dvchá, lvngdøm angnī taq kám we rvcángcèrì gø’ vrvm muqlàng móngdan kaq tvm vbun we vhø’mlvm dvpvt nøntløm shàìe. Shvngbe svng oqà.
