Shvngbe mvdvm Gvray mongzøl lòng laqtuqdaq! Ya lvban nø Angwa Nár (19) Nár wànár svng gòng bø’shà.
Ya lvban taq nø, Pán vshat caò we dvzømshú dø wáshì lúnlvm rvt, ‘Kà shvbóng’ mvshøl taqkèní Vkangpè Yesuí shvngøt dètú í we Nár lvban angni tiqni gø íe.
Wisdom 18:6-9
Hebrews 11:1-2,8-19
Luke 12:32-48
Mongkà ciqrì…
(1) Hpaji Byeng-ya 18:6-9 ……. Hebre vsvngrì í, Dìngman vsvngrì í chutchvng lòng svng vtoshì lúnlvm vlømshì nø mvrøtnòe.
Hebre 11:1-2, 8-12 ……. Gvray gvsangí shvzōò yangà nvmlat nvmpvng Dø’ngvng we wamà svng vlømshàì sórí mvrøtnìe.
Luka 12:32-48 ……. Namaqí medømnøng we rvtø, me dèdvmnøng we rvtø rì taqø, vsvng Angcè pè nø dì daq we í rvt, nashat nøng taqsórí degø’shì da nøng.
Hkristu vdòng taq vpø’ íwe pèmè vnvmchvngmaq Dèni Gvray móngkà ciqrì svng dvdvm vjáng taqsórí (5) mvtú taqkèní nònggùn zí mvyøngè.
(1) “Pán vshat caò we dvzømshú”
Vkangpè Yesu shøn we taq,
Wervt nø namaq gø tvlú dègǿshinø̀ng. Pàwálv́m wani namaqí Ang tuq daqe mèlv́nnøng rvtø̀ taq Vsvng Angcè Pè nø di daqe,” a:lòe. Mvdøng vchvk we nø, pán vshat èwáshìnøng nø ècānøng, wà Kà íe.Vkangpè Yesu shø’nè,’ wè rvtø’ nø yaqdøng rvwe í lú:ng mà? Dvngúgi Vsháng tut i lúng mà? Kà dvgvp, Ka rvtø tuqdaq we mvsháshì. Wè mvsháshì lòng nø, Bāsha rvzvngcerì dvpvt shøn lòng ie. Dvtut Vkangpè Yesu shøn we taq, Ka rvtø taq Vkø’ nø tuqdaq we mvsháshì. Angí sháò nìnø Vkø’ mvgòng dø vsù:ngshì na íe. Wè pàdø nøngmaq í gø mvdø’mì we rvtø rì taq Vsvng Angcè pè nø tuq daqè, dì daqè, wà Kà íē.
(2) “Vkangpè Dvkv’mè. “
Vpø’ íwe pèmè vnvmchvngmaq, Nøngmaq Kadø wā dvgø’shì lvm dang, Rø bø’shà we Luka dvbùshvng mongkà taq vbá we dvkv’m Kà rì í nø nøngmaqò lvpat kaq svng shvngøt dvtúè. Vlē a:mì we Nár vdòng taqø tálúnì we móngkà ciqrì taq nø, mvgam pè dø mà:pnønt dvnzøng we laqya nvng cúnshì yangì lvpat cvnshì lvm tvle, nøngmaqí vtōshì lúnì we pø’ zaqshøp ìshøt ìgvn rì svng ra vchvk vsvngrì kaq svng èzínøng, wàe. Tiqdvng vsvng kaq tùbùm dvbvng lvm rvt Vkangpè Yesu nø Shvrúngè. Tvn dvgá ni Gvray gvsang Muqlang móngdàn, Pvlàcè móngdàn dvpvt pø’ zaqshøp ènang shinøng, wā shvngøt dvtúè, Dvkv’m we móngkà íe.
(3) “Vlømvmdaq we Dvzømshú dø ” wáshì lúnlvm shvdømè.
Vkangpè Yesuí nø ‘ Kà shvbóng ‘ tiqlòng dvshvngò nø tvlú wáshì lvm nvng tvlú dvgø’shì lvm dang shvdøm nø shø’nè. Angdèo angkang Zvmì shvzøng bóy yv’ngkèní vrá vtv’ng ra nø, bv’ngkà vkoqa:tnò dvgvp, Àng svng wèlvng chàng tánà lúnlvm rvt dvgø’shì we dvzømshú ce rì nø Kv’mvm v-rvm we dvzømshúrì íē. Wè angkàng pè tuq ra kvt pàn vshat ca daò dvgø’shì vsvngrì í nø Ìshøt ìgvn lúnè. Yaqdø̀ng vnírí warí taq í nigø, mø̀íni vshø̀mrí warí taq tuq ra nìgø, wedøni vshat nø ca dáò we svng, a:ngí yv̀ng bǿò nìnø, vshuq werìí nø ìshøt ìgv̀n lú:nòe, wā shvdømè.
(4) ” Yadang svng ( Dvdvmì ) dèdvmnøng “
Vkangpè Yesu Hkristuo Mongkà taq shøn we nø, Ka rvtø taq Vkø’ nø gòng ra we Chøm angkang pè í sháò nìnø àng dvgø’shì nø, ang Chøm vdòng kaq mvgòng dø angí vgám lú:ngòe, wàe. Nøngmaq shvngbe svng shvdøm we móngkà nø, nøngmaqí mvsíng mv-ràlshi mà dvdvmshì rvtø rì taqø Vsvng Angcè pè nø tuq ràe. Wervt pvnvshat dvgø’shì ra íe.
(5) ” Bāsha rvzvngcerì gø’ vrvmì vhø’m v-du we tvrà”
Mònggvn yachang taqø dø’ngvng lúná:mì wàwe pà tiqlong gø mà-vl walòng svng nøngmaq shvngbeí shá lúnìe. Vsvng gø’ vrvm nø, yalòng Mònggvn rvgaq yachang kèní tiqni mø-í ni, tiqni taq nø léshì ra lòng svng shálúnshìe. Wervt lvngdøm taq vhø’m lvm mvbø’n rì (Four Lasting Thangs) svng dvdvm vshat ra íe.
Wè rì nø:-
(1) Shì lòng nvng Zun lvm lòng dang (Death) íe.
(2) Ka:ngé we dang íe.(Judgment)
(3) Muqlang móngdàn dang íe.(Heaven)
(4) Supvng móng dang (Hell) yarì íē.
Mònggvn taqø dø’ngvng lúnè wàwe mà-vl walòng svng shálúnie. Mvdøng nø, Vkangpè Yesu Hkristuo dvzvr tiqgø’ ku, Vkangpè Yesu svng dvzøm we nvng Tiqdvng vsvng kaq dvzøm we taq nònggùn vzàm kèní kūnga lùshì nø dvzaq dvkvngshì ràe. Dvgø’shì ràe wàwe taq, àngde Cúnshì lvpat ni la, wáshì bvnlìrì svng lvngdøm dvtøm dvtán lún høq dvgø’shì dvzvr we àng lvjøm gø íe. Shvzøngkūng bóy yv’ngkèní tuq ráì we Vkangpè svng dvzømshú rì í vtō lúnò pàdø, Rvtø v-rvm dvgø’shì lún we dvzømshú rvzvngcerì, Kv’m vsvngrì wáshì lúnlvm dvpvt dvzaq dvkvngshì ra bø’ì.
Vpø’ íwe pèmè vnvmchvngmaq, Nár v-rvm lvban Noqku Nønt lúm lúm dì i we, Mvra vchvkng shì we, lvban Vlu cv’ng dvzaqshàì we, Vjúrøt dvzaqshàì we, dvshá zā bvnlìrì taq tùbùm dvzaqshàì we, Døngku nvng Gvrayí zi we Cvmrérì kaq svng Pvlàcè kvmnønt tvrà nvng Mònggvn Paqzi tvrà taq mongzøl dø shøl lún we.. yarì gø Vkangpè vdòng taq Pàn vshat dvgø’shàì dang rì gø íē.
” Namaq juq taq juqnv́m ènv́mshìnøng nø, svmigwìn gø dèciqshìnø̀ng. Zvmì shvzø̄ng bóy kèní vtv́ng rā we angkàng pè svng cāò we vshuq dø, Ang tuq ra nø bv́ngkà vkoqa:tnò ke Ang svng chàng tánā lúnlv́m dègǿshìnøng. “
(Lk 12:35-36)
