(2025) Mònggvn Zìlàngré Jubilee bóymèò mvshø’l pvrá vl we dang
Shvngbeí sháì dø (2025) Jubilee nøng Zìlàngré Jubilee bóymè svng July (28) kení August (3) Ni høq Italy móngdanò Roma wamàmè taq mòngzøl dø wálún bø’à we íe.
Jubilee bóy kàgvp nóng we svng Roma myoqò shønggvn íwe Tor Vergata dám ba taq Svrabín koqkámpè Leo (14) í shøl nø wálún bø’à. We vdám ba taq Svrabín koqkámpè St. John Paul (2) wur taq gø Mònggvn Zìlàngré angnī svng wà yv:ngà we íe.
Mònggvn móngdan (145) móng kení Zìlàngrérì nø July (28) ni, Roma myoqò taq tuqráì. July (29) ni dørøm (7:00) nayi rvtø Roma myoq taq tuqráì we Zìlàngrérì svng vtoò we misa kàgvp svng Cardinal Rino Fisichella í, shøl nø wálún bø’à we íe.
July (30-31) ni taq angmaq yup we Jau gørwàng shvngømré vsvngrì nvng vzøm vzvp we dang rì wáshìe. August (1) ni taq mvrà roqā Sacraments svng Roma myoq hóngò Circus Maximus taq vtoshìe. August (2) ni vtvng taq Svrabín koqkámpè nvng Zìlàngré Jubilee bóymè svng vtopà:ngò we vjúrøt lipong waòe. August (3) ni nø, Jubilee bóymè angnī, Zìlàngré Jubilee misa kàgvp nóng noqngøm we svng Svrabín koqkámpè í, shøl nø wálún bø’à.
Misa kàgvp nóng we taq Svrabín koqkámpè nvng svrado (450), shvrúngshú Jaòrì (7) kíng, Zìlàngré (1000000) rvzé gø køm ngøm lún bø’à. Zìlàngré Jubilee nø Svrabín koqkámpè Leo (14) dvpat mònggvn Zìlàngrérì nvng nvmlat wa poq vhøm we íe.
Vsvng gvza køm we írvt lungchøngyé nvng shiqshvnlvm dang dvgá dang vrvm taq dvbvng lúnlvm jetcheni (1200) rvzé gø dvbvng shìwe íe.
Svrabín koqkámpè í, Svrabín koqkámpè Francis nvng St. John Paul (2) ò, mòngkà nvng nvnggùn zì we tuqrā September (7) ni taq Shvnshér we vsvng dang lvm íwe làngré vní gø’ Carlus Accurate nvng Pier Giorgio Frassati ní nvng sing nø nònggun zìe. Misa taq Svrabín koqkámpè nø, tuqrā we August (3-8, 2027) nøng tibo Koria myoqdo Suo wamà Zìlàngré angnī taq vrá vhøm lvm vringòe.
Jubilee bóymè vdùng Igyp Zìlàngré taqkení svmaré tiqgø nø nvrøm vjáng nø Shi bø’ì we íe. Vrá tiqgø’ nø Speing móngdan taqkení svmaré tiqgø nø tvrà shvngnvng taq Shi bø’ì we íe. Ang nø vzvng kení shiqshvn we mví. Zìlàngré Jubilee gøí, Jubilee nøng gø írvt nvnggùn dvkáng shì sórí tuq lùng we íe. Jubilee bóymè bønlvm dvpvt vsvng (20000) rvzé gø taqkení (2) nøng dvgø’ dvzøp shìwe íe.
Vkvtdø Jubilee bóymè taq tuqwe Zìlàngrérìò (68) yawet nø Urupa móngdan taqkení tuq we íe. Cìl mvjàn rvt dvshà mvhøt lvm vhømshì we móngdan Lethbanon, Iran, Myanmar, Ukraine, Cyria nvng dungsudan móngdan rì taqkení Zìlàngré kosvlerì tuq we íe.
