Mònggv̀n móngdàn vrv̀m kèní Zìlàngré (1000000) rezé gǿ Rome myuq taq kø̀m ngǿm nø̀ Zìlàngré Missa wá lún bǿì we
3 August 2025
Vrúm vsv́r we mònggv̀n móngdàn vrv̀m kèní Zìlàngré Jubilee bóy mè svng kø̀m ngǿm ráì we nø Gvray àngò dvsháza shóngnøt jejú ni íe.
July 28 kèní 3 August 2025 ni høq wáshì bǿì we Mònggv̀n zìlàngré Jubilee bóy mè nø Roma myuq taq mòngzø̀l dø wá lún bǿì we svng vrìng vtnà. We Bóy mè kaq Svng Svrabín koqkv́mpè (Pope) Leo IV gø tuq ráì nø̀ mònggv̀n zìlàngré rì nvng shaq shaq wa vhøm nø dvmv̀n we, nònggwø̀n ziwe tvyø rì gø wá lún bǿì.
Yalòng nø màbóng we mònggv̀n móngdàn rì, svngpv̀n dvcì rì tasvng vpǿ shvring kewe kv́mnøt lv̀ngdūn tiqlòng íwe mvtaq Gvray yv́ngkèní shvmv́nā we ìshøt jejú gø íe.
Màbóng we sv̀ngpv̀n dvcì rì vzø̀m nø̀ tiqnøt tiq mvyùng kèní Gvray dvgùng svng shvring we svkse wáshì lúnwe nø zìlàngré rì taqkèní wa dáng we kù:ngà vshøp:me.
Catholic shvngø̀mré wawe nø̀ mònggv̀n døngtv́ng nvng sing we (Universality) wawe kàciq taq ripwe gø íe. Welòng (Universality) ò àng lvjøm nø (One) tiqlòng wáshìwe, (Holy) shv̀nshér we nvng (Apostolic) dvzv́r rì yv́ng kèní vrang ráà we shvngø̀mré wawe lvjøm svng wáshì we íe.
Tuq rawe 2027 nǿngò Mònggv̀n Zìlàngré bóy mè (World Youth Day) svng nø Korea móngdàn Soul Myuq taq wáshì lv́m íwe rvt Rome myuq svng gø yaboq taq Korea kèní Zìlàngré rì àngyá rezé gǿ kø̀mngǿm bǿì wegø íe.
