“Taq røpshú pè chø̀m svng èyøtshiv̄m; Ngà kàrì nø Ngàí weyv́ng shø̀n dakngòe.
“Taq røpshú pè chø̀m svng èyøtshiv̄m; Ngà kàrì nø Ngàí weyv́ng shø̀n dakngòe,” wae.
Yeremia Mongkà taq nøngmaq gvza shóngshàì we Jømciq nø
Gvray gvsang nø Taq røpshú pè angkang í nø, nøngmaq nø Taq røpshú pè í shvzo mv’n we vsvng wv’m wàwe mvdvmø v-lie, wà Kà íē. Vpø’ íwe pèmè vnvmchvngmaq Singyór taqsórí àng lvjøm gvzà vlē. Nvmlat nvmpvng 2:7 ciq taq gø, vba dvtøl kèní vsvng shvzōòe. Wè mèpvng gø̀nshaq cúnshìlv́m shaq nø shvná taqkèní vhē:ròe, wàe. Wervt Gvray gvsang nø Taq røpshú pè angkang íe. Wv’m nø Taq røpshú pèo Wur taq àng shóngshì dø àng røp mvyø’ dø røpmòe, wàe. Ya shvra taqø Taq røpshú pè nø mvdøng øpkang pè ínø, wv’m nø Taq røpshú pè mvdvm yv’ng øp mvlúnshì. Taq røpshú pè í wàò dø wv’m nø Háng yv’ngshì lòng ínø, Taq røpshú pè ang Nønt ílòng tvyø svng tvlíngà we vzø’m mà-vl.
Wervt Dvzvr Polo í Roma (9:21) ciq taq Chúng røp lànglì gǿí nø, wv̀m tiq gv̄ng kèníni, tiqkā nø vpǿ we chúng tiq chv̀ng, vrá tiqkā nø màpǿ we chúng tiq chv̀ng, røpmò wa nìgø ang nøt wa í we mø̀í ma? wànø dvtánòe.
Íni nø, nøngmaq kaq svng wv’m ce taqkèní Gvray gvsangò angcø angcè rì dø , Taq shvlá ce dø Gvray gvsang ínø Taq røpshú pè shvzōò pàdø, ni vrvm shvzō nø nøngmaq kaq svng shvngøt dvtúè, wà Kà íe.
Dvrá dvshat Mongkà rì , kàdvtutshú Mongkà rì nvng tiqdø Gvray gvsang angcè pè Longzapèo cúnshì we móngkàrì í nøngmaq kaq svng ni vrvm shvngøt dètú íè. Íni gø tiqkvt kvt nøngmaq nø Gvray í shvngøt dvtú lòng, shøl lòng svng mà tōì nø àngde Nønt shvrúngì lòng svng wā vrù mvyø’ íe, dí mvyø’ íe. Íni nø nøngmaq rvgaqtømò Taq røp ‘Kàshvbóng dvla’ lòng nø ca:tnà nø Gvray gvsangí nø Háng Dvla àngshvr ku mv’na lúnè. Vkvtdø Hang dvla àngshvr, lvpat àngshvr svng tiqkvt kvt nøngmaq i vrá vgám shá íe. Gvray gvsangí gvsat vjø’nò tvrà lòng taq, nøngmaq ká dvgvp høq shvngvrshì, dvdólshì nø cúnshì lúnlvm í mà? Vpø’ íwe pèmè vnvmchvngmaq Na Ngà nøngmaq shvngbeí dakdvdvmì taqsórí Kvmnønt Pvlàcè nònggùn kūnga lùshì laqlúnì, shvngbe svng oqā.
