“Angkàng Angsimaq, lvpat gø’ngzøl rì nø vlømshì lòng svng shvkse wáshì rì íe.”
Svrabín Koqkvm Leo (14) nø Nár ni v-yv’ng mvlùng vjúrøt Noqngøm shì mèpvng Dvzvr. Piter Noqngøm Chøm tøm yv’ngø vl we Vjúrøt shì rì kaq dèni nøngmaq ínø (5) baq wà baq Mònggvn Angkang Angsimaq nvng lvpat gø’ngzøl gø’ngyang rìo angni svng wa ìe. Dènøng dvdvm vjáng shøpshì lvm Dvrá Mongkà nø ‘Blessed is the one who does not lose hope’( Vlømshì mvnggá mà shvmv’ngshì mvcatshì vsvng rì nø Ìshøt ìgvn lúnè) wàe.
Svrabín Koqkvm pè nø vle a:mì we July (10,2025) í Mònggvn Angci Angkangmawò angni dvpvt ‘ shvring Kàru ‘ svng dvkvng bø’à we íe. Angkàng Angsimaq, lvpat gø’ngzøl rì kaq vlømshì ra lòng svng mvrøt we shvkse wáshì rì ku dvgùng shvring vpø’ ràe. Lvpat shvr cerì dvpvt Gá lòng svng dvtánà, ríā rì íē. Wè rì kaq svng ti mvlv’n gvl shì we mø-í dø Missa Noqngøm we taqgø, vjúrøt we taqgø lvlúm ra dø tùbùm dvbvng ràe.
Zilangré rìo jubilee Mvzvn bø’n we Mònggvn Dø’ngtáng rvgaq rì dvpvt Mongzøl lòng lúnlvm rvt røtním dvbvng taqsórí Mònggvn Dø’ngtáng yv’ngkèní Zilangré jubilee dvpvt Roma Myoq taqø dvkø’m shì nø tuq ráì we Zilangré rì kaq svng dvbù Nøntní Pamvra wā vtō bø’à. Wè mèpvng nøngmaq vkvtdø mv-ngushàì lòng nø namaq kaq Kristu Gvray nvng vhø’m lúnlvm rvt, Àng mèpvng cvn lvm vpnóng tvleshì we Namaqò lvpat Dø’ngdø’ng Ngvng ngvng vl cvndvgøm lúnlvm rvt Kristu Gvray ínø nøngmaqò Kvmnønt lòng svng kūnga vzàm zí lvm rvt vlún vkvng tiqlòng í dang dvkv’m bø’ì.
