” Noqngøm Chøm vdòng Vkangpè Kàgvp yv’ngø vjúrøtshì we Shvngømré rì svng shvnvtní wà:pmò we “
Noqngøm Chøm vdòng Vkangpè Yesu Kàgvp shvgùn shvring vjúrøtshì dvgvp shvnvtní wà:p vhø’m bø’à we Kvmnønt Shvre rìo Shvwi nø Mongzøl lòng, v-rvm vrá tvrà, àngnvm angchvng jø’nggvp Nønt nvng angdèo mongzøngcerì kaq svng shóngshì we Nønt rì vháng vlúnlvm rvt rvmshi we dvyø rì laq í dal wā Svrabín Koqkvm Leo (14) í Gonco Dvm mvdaq móngdàn vdòng vl Komanda Catholic Noqngøm Chøm vdòng wà:pm vhø’m bø’à vsvngrì nvng singdø Nønt yòr we í vjúrøt dvbvng bø’à.
Vle á:mì we Nár ni taq Nvmshvr Gonco, Ituri kayaí taqø Vkangpè Kàgvp yv’ng vjúrøtshì we Catholic shvngømré rvzvngce (40) gø’ dv’ngte banchvk bø’n we shvra taqø shvt vhø’m bø’à.
Mvsher vsvngrì nø vjúrøt shì we Noqngøm Chøm vdòng kaq svng cv’ngshì lúngì nø vjúrøt shì rì mvdvmø shø dø dvzaqò wà:p bø’à. Svmaré rì, Cvmrérì vbá dø mvluq vtv’ng (38) gø’ nø vjúrøt we Noqngøm Chøm vdòng taqø shì bø’ì we dang, dvgá dø (5) gø’ nø mvring shvnvng yv’ngø wà:p nø shvt vhø’m bø’à wā shvdø’ng bø’à.
Banchvk bø’n bø’ì we tvrà mvdvm Svrabín Koqkvmò kønmvng Vaticanò bvnlì angkang pè Cardinal PietroParolin kèní Gonco Catholic Svrado gvba mvdòo Vgo Gaíchuk Svrado pè Mugalu kaq Shvngkà zí bø’à nø Svrabín Koqkvm Leo (14) nø Gonco taq vsvngrì mvmè shì bø’ì Noqngøm Chøm vdòng vjúrøtshì dvgvp shvnvtní wàp we shvngkà táò jang vnv’n bø’ì nø, téwa Nønt mvsøn vnv’n nø nønt yòr vhø’m bø’à dang, vkvtdø banchvk bø’n bø’ì lòng nø Dvrá Mongkà rvt gønshaq vpnóngshì bø’ì, vkvtdø shønglùm shvra mà-vl we rvgaq kèní mongzøngcerìo shønglùm tvrà, dang vrvm shønglùm lúnlvm dvpvt tiqdvshaqí dvnúngà lvm dvtanò lòng i dang, Svrabín Koqkvm í vkvtdø banchvk bø’n Kvmnønt Shvre Anuarite Sasvna vdòng taq vl Shvngømré rì, góng gi nønt bùm vhø’mò we Døngku vsvngrì, shvngømré rì nvng yalòng shvngkà rvt vnv’n nø shvre vsvngrì Gonco Dvm mvdaq móngdàn kùm taq vl mongzøngcerì kaq svng Angí ìshøt zi Shvmv’n nø Nønt shvløm lòng Kàru vrùo nø zí bø’à.
Mvsher we shanglut rì Gonco móngdàn øp vmìng vkang vl rì shøn we taq, Komanda myoq vl kvmnønt shvre Anuarite Sasvna mvdò vdòng taq bø’n bø’ì we tvrà nø banchvk bø’n bø’ì we rvgaqò àng vtóng gø ínø, Democracy Kà vgo muqhøm mvdò nvng Islam Mongwál vrvng lvm mvdòo nònggùn zi kà vtoshì we mvsher we shanglut rì dvhø bø’n lòng i dang, yalòng v-tu lòng taqø Nvmshvr Gonco nvng Yugv’ndā rvgaq dvrøt kèní mongzøngcerì nø dvhø yv’ng vl rvzaq nø ngór bø’n we dang, Democracy muqhøm cildvp nø Yugv’ndā taq shvdø’ng shvngvng shì lúngì lòng nø (1990) nøng dvgvp kèní pvngshì lúngì.
Angnøng mvmè vlé ráì we Vsuyaq vmìng vkang svnit svng cat bø’à mèpvng muqhøm shanglut mvdò rì nø Yugv’ndā Vsuyaq àngshvr íwe Dvm mvdaq Yoweri Museveni kaq Muslim mvshú:ngshì rì wā yvngò nø, wè rvtø kèní pvngshì nø shanglut mvdò rì nø tiqni tiqni nònggùn vl lúngì. Íni gø Yugv’ndā rvgaq yv’ngø mà-vl lvm rvt móngdànò vtv’ng kaq svng shvlé yangà. Yani la rvgaq dvrøt íwe Yugv’ndā nvng Gonco rvgaq dvrøt yv’ngø shvdø’ng shì nø v-toq v-tìp lvm tvrà rvzaq we shvra taq vl mongzøngcerì svng mvnggá gvl Dvrá cat vsvng shvt vléshì lòng í dang dvkang bø’à.
