( Angwa Nár (17) Nár Sunday Homily)Yesuí nø Dvzvrì svng ‘Vjurøt Kà ‘ tiqbaq cv’nào dang
Gvray móngkà ciqrì nø;_
Nvmlat nvmpvng 18:20-32
Koloshi 2:12-14
Luka 11:1-13
Vpø’ íwe pèmè vnvmchvngmaq,
Gvray vdòng taq rvtø vrvm cúnshì nø Vkangpè mvkok dvdí Shóngnønt svng vlømshì taqsórí Gvray nvng vzø’m vzàp lúnlvm dvpvt Nønt mvsøn vjang laqya shvlá taqkèní dvgø’shì dvzvr we, røtnímshì we Lvban angni tiqni gø íe.
Mongkà taq;_ Gvray gvsang kaq Abraham røtnímshì lòng nvng Vkangpè Yesu í shvngøt we Vjúrøt Kà svng dèdvm lúngò dvgvp, Gvray kaq Vjúrøt tvleshì we í vnvpshì lòng nø Gvray gvsang kaq Noqngøm we wa mø-í nø, Nønt dvt, Nøntcv’m, Cìpshì we í Gvray jèjú vdòng taqø Nønt vwángshì nø Gvray gvsang nvng vzø’m vzàpmì lòng íe.
(1) Nvmlat Nvmpvng Mongkà(18:20-32) taq;. Gvray kaq Dìngman dø nóngpà Shvrúngshì lòng nø kūnga vzàm nvng Dòngnønt mvsøn kèní cìpshì lvm lòng ínø, ya v-ní lòng nø gvzà ni ra vchvkngè, wā shvdømè.
Abrahamò vjúrøt shaq kūnga lòng ínø Gvray gvsangò Nønt svng vlíng lúnlvm dvpvt mø-í, Abrahamò Nønt mvsøn vdòng kaq Gvray gvsangò Dvrá mongkà í shvdø’ng shvngvng lvm dvpvt le íē. Abraham dø, Gvray gvsangò dvshá zā mvkok dvdí shóngnønt lòng svng nøngmaqí dvdvm vjáng í lòng mvdvmø, téwa rvnaqè walòng svng dvdvmì taqsórí, nøngmaq í gø Tiqdvng vsvng dvpvt, denila mvzvn rvt, ang dvja angdang dang rvt dvshà mvhøt vhø’mò rì dvpvt vjúrøt tvleā we taqgø Nøntlúm lúm vjúrøt dvbvng ràe, rip ma lún ra íe. Vpø’ íwe pèmè vnvmchvngmaq,
(2) Koloshi shvngømré rì kaq svng Dvzvr Polo í shvri we móngkà taq nø;- Vjúrøt ni lòng nø Vkangpè Yesu Shì lòng yv’ngkèní Jór á:mì lòng rvt wā bø’n búng lúngì we íe, wàe. Vkangpè Yesu Hkristu shì yv’ngkèní Zuná:mì ang jór dvgùng pòngbang lòng ínø nøngmaq svng Nønt vlømshì ra mà-vl, Nøntdvt, shvraqshì lvm yv’ngkèní shelut nìnø Gvray gvsang mvrdvng yv’ngø langgá mvrshvmì rip lún høq dèbvng íe. Nøngmaqò vjúrøt we kūnga shaq rì svng Gvray gvsangí ètáā i nø, nøngmaq nø Vkangpè vdòng taqø cúnshì lúnì rvt íe, wàe.
Dvbùshang Mongkà taq;_ Vjúrøt lòng nø rvtø v-rvm v-toq v-tìp vzø’m vzàp, vpnóng tvleshìlvm lòng ni íē. Vkangpè ínø nøngmaq vjúrøt shàì we kūnga shaq svng rvtø vrvm táā nø vtà:nàe. Íni gø nøngmaqí dvdvmì lòng, vlømshàì lòng taq vlíng dø gø Gvray gvsang ínø shvmv’nàe, dvgø’āe walòng svng yv’nglúnshìe.
Yesuí nø Dvzvrì svng ‘Vjurøt Kà ‘ tiqbaq cv’nào dang
Vkangpè Yesu nø tiq shvra yv’ngø vjúrøt shìe. Ang vjúrøt dv’ngshì bø’ì kvt, Angò dvzvr tiqpè nø, Vjúrøt Kà cv’na lvm dvpvt Yesu yv’ng svng røtnímshìe. Wekvt Yesuí kadø wā vjúrøt shì lvm dang shvngøt dvtúòe. Wè vjúrøt Kà svng ‘ Vkangpè Yesu vjúrøt Kà ‘ wàì nø angdùngce ku shøni, lòng gø íe. Luka dvbùshang Mongkà 11:1-13 ciq vdòng taq Yesuí Dvzvrì svng shvngøt we Vjúrøt Kà, Tiqdvng vsvng tiqgø’ dvshá zā røtnímshì we mvshøl ‘ Kàshvbóng,’ í Nøngmaqò vjúrøt Kà svng Gvray gvsangí jø’ngjøngni ètáā ì lòng svng ká:mlvm shvngøt dvtú we móngkà gø íe.
Vjúrøt we taq;
Gvray gvsang nvng vpø’ Nønt shóngnøntní Kà shø’nìē.., v-toq v-tìp dvmanì we tvrà íe. Dvdvm vjáng nø shøn mvyø’ we taq, nøngmaqò Nønt mvsøn Pvlàcè svng dvbúng nø Gvray gvsang mèpvng Nønt mvsøn tiqgóng shvngbe tuqlúnlvm tvleshì nø v-toq v-tìp, vzø’mì we tvrà íe, wā shø’nlúnshìe. Vjúrøt shàì we taq nøngmaq nø Gvray gvsang nvng muqhøm wáshì nø vzø’mì lòng gø íe. Wervt vjúrøt shàì lòng nø nøngmaqò kūnga àng shaqni íe. Vsvng tiqgø’ taq gønshaq cúnshì lúnlvm dvpvt nø Àngshaq wàwe vlvm gvzà ni vchvkngè. Wè dø tiqdvchá, Gvray gvsang nvng v-toq v-tìp vzø’m we gønshaq lvpat taq gø kūnga shaq taqkèní cúnshì lúnlvm rvt vjúrøtshìe walòng nø gvzà ni vchvk we íe. Shànshér pè Padre Pio í nø, vjúrøt shi lòng svng Pvlàcè dvcún we àngshaq (oxygen of the soul) wànø ang bøng svng tø’ yangà we íe.
Vpø’ íwe pèmè vnvmchvngmaq, Dvdvm vjáng nø nònggùn zí mvyøng taq;-
(1) Abraham í vsvng mvmè dvpvt vjúrøt dvbvng yangà pàdø Nøngmaq ígø Tiqdvng vsvng rì, Denila dvshà mvhøt vhø’mò we àngnvm angchvngrì dvpvt shóngnøntní vjúrøt dvbvng ra íe.
(2) Gvray gvsangò Mvkok dvdí dvshá zā shóngnønt svng vlømshì lúnlvm rvt shvdømè. Gvray ínø nøngmaqò vjúrøt kūnga shaq svng rvtø vrvm táā lúnè . Nøngmaqí dvdvmì we, vlømshàì we dang v-rvm svng Gvray ínø ìshøt shvmv’nàe.
(3) Tiqdvng vsvng Mvra chutnà taqsórí vzàng kaq dì lúnlvm shvdømè.Vkangpè Yesuí zi we lutshì lún we Dvrá, chutchvng we tvrà taqø Na, Ngà nøngmaq shvngbe nø rvtø v-rvm cúnshì taqsórí shvkse wáshì nø dí laqlúnì, tvleshì vpnóngshì laqlúni wvng shvdøm nø nònggùn zí mvyøngè. Shvngbeí Vkangpè Yesu Vjúrøt Kà o Shvmv’n jèjú vtoshì laqlúnì, shvngbe svng oqā.
