Pèmè Bóy(St. Joachim nvng St.Ana Pèmè Bóy)
Dèni St. Joachim nvng St.Ana Pèmè Bóy angni taq Angpè angmèmaq svng dvgùng shvring we mvtú (18) mvtú taqkèní dvshat nø, nònggùn zí nø dvgùng shvring shvta mvyøngè.
Vpø’ íwe vnvmchvngmaqe….
Angpè angmèmaq svng shvgùn shvringshì lòng nø gvzàni vchvkng we íe. Jèjú ìshøt rì svng oqā wá, shøn mvtømshì.
Angpè angmèmaq svng shvgùn shvringshì lòng nø;-
(1) Lvpat gø’ngzøl nø vháng vlúnlvm tvrà íe.( Efesu 6:2 )
(2) Tiq lvpat Gvray pàdø nvpè nvmè maq kaq svng vpø’ ràe, wàe.( Dvrá dvshat 5:16)
(3) Ìshøt ìgvn rì nø Na mèpvng Na è vl shvra yv’ngø rvtø vrvm cvn ràe.
(4) Angpè angmè wàwe nø angcø angcè rì dvpvt Gvray gvsangí zi we shvdún mvlúnshì we Gønpaq tiqlòng íe.
(5) Angpè angmèmaq Kà ta lòng nø, Dìngman dø shvlá vtv’ng lutshì lún lòng gø íe.
(6) Angpè angmèmaq svng vpø’ shvring shì lòng nø, Mvra chutnà lòng svng vtoshì lúnè.
(7) Angpè angmèmaq svng vpø’ shì lòng nø, Døngku vdòng tiqnønt tiqyung v-rvm vrá mongzøl byō lúnè.
(8) Angpè angmèmaq kaq svng Na pø’ò lòng nø, Chøm vdòng langgá lòng nvng mongzøl shøtshú bøløm lòng í dvnzøng lúnè.
(9) Angpè angmèmaq kaq svng dvkùm nø vsù:ngshì lòng nø, bvnlì døngja shvjv’n mø-í, Gvray í zi we vlún vkvng gvba tiqlòng íe.
(10) Angpè angmèmaq kaq svng vpø’ shvring shì lòng nø, Mònggvn taqø dvgùng zíshì rì yv’ngkèní vháng vtv’ng dvgùng shvringshì lòng íe.
(11) Angpè angmèmaq Kà svng vpø’ shì lòng nø, angcø angcè rì dvpvt shvlá vtv’ng Dvrá mongkà shvdik shì, cvndvgømshì lòng gø íe.
(12) Angpè angmèmaq nvng tiqdø è vl we angni, rvtø rì svng na pø’shì. Angmaqò shóngnønt, ang dvpø’ jèjú rì svng sùn mvdv’ngshì rvt íē.
(13) Angpè angmèmaq svng vpø’ shvring shì lòng nø, vzàng kaq mvlúnshì we, Kūnga àngshvr tiqlòng svng vtoshì lòng íe.
(14) Angpè angmèmaq svng dvgùng shvring zíshì lòng nø, lvpat àng mv-rìl àngdvtvng tvng taqø ìshøt vrì lvm vle, walòng svng v-na mvdaq.
(15) Yalòng nø, Tv’n dvgá ni angcø angcè rìo Lvpat høqshaq vjú zílún we pø’ (zaqshøp) íe.
(16) Gvray gvsang a:ng nønt Shvrúng lòng nø, angpè angmèmaq kaq svng vpø’ shvring dvgùng zí lvm lòng íe.
(17) Angpè angmèmaqò Putbøm wàwe nø, Mv’ngsherè, Mongzøl Bøløm nø Nøntshøm dvbù lúnè.
(18) Lvpat svng vpnóngshì nø èshøq we Vmè a …. Lvpat svng vpnóngshì nø dèkum dèté we Vpè a …. Nvce gvzà oqā wvngè.
Vpø’ íwe vnvmchvngmaq,.. Angpè angmèmaqò jèjú rì svng Dvdvm rø:n nø, jèjú vtv’ngshì lún we Vpø’ we angcø angcè rì wáshì laqlúni,…. wvng shóngnøntní dvtit tvlengò taqsórí … St. Joachim nvng St.Ana, Pèmè Bóy angni taq shøq Pèmè ní svng Oqā wvng dvgùng muq shvringòe. Shvngbe svng Oqā.
