Nònggùn Cì (10) Pvn
Vpø’ íwe pèmè vnvmchvngmaq Dèni Tong laqya lvmvng tvyø taq nø, nònggùn lùshìlvm (10) pvn taqkèní dvtit tvle nø nònggùn zí mvyøngè.
Vpø’ íwe vnvmchvngmaq, Nøntcvm lvm rì vhø’m shì ra dvgvp yalòng nònggùn ci(10) pvn svng dvdvmì nø nònggùn lùshì laqlúnì. Nvmlat;..
(1) Tiqdvng vsvngrìo mvr vzàng kaq ètuqvm dvgvp, Na nø tvrà svng shø’ò gø’ mø-í lvm, tvrà dvtú gø’ le wáshì lúnlvm dvpvt dvzaqshì ràe.
(2) Jór lú:nè walòng nø rvtø nvng ang shvra rì taq mvdøng dì we mø-í. Vsvng mvmè í Vløm vmdaq gø’ wáshì lún høq dèzaqshì kvtwā nào bvnlì wang taq Kv’mvm daq gø’ í lú:nè. Nào tiqlvpat Dø’ngvng lúnlvm nø dvzaqshì lòng taqwā mvdøng dì we íe.
(3) Krvtshø’m lvm rì nvng vhø’mshì ra dvgvp Na nønt è cvm e mà? Wè krvtshø’m lòng yv’ngkèní èlún bø’ò we Paqzi lòng nø tvn tiqbaq Na dvpvt nø vmyat tiqlòng è íàe. Pàtaq íni gø Nønt mecvmnì. Yvklvm vhø’mshì ra dvgvp dvbù Nøntní vtōshì ràe.
(4) Shøn kélvm, Vbø’n kélvm rì svng sēre mà? Àngde nø angdèo Dòngnønt sher lòng taq Nønt shø’m dvbù lvm vl nø, Nà nø nà tvrà taq dvtut dí èmanshì. Tvrà yv’ng gū we vgi vrvm svng lúng í èwa:pmòni nø Na dí mèyø we tvrà mvnggá yv’ng svng Na í tuqlúnlvm mø-í.
(5) Pvlà vbá we Nina, Røng yō we Nina, vjang laqya dvdvm Nønt shaqcvm gø’ wè vshøm pvn svng Nàí èyvng bø’ò dvgvp vcar dø èyilshì . Wè Vshøm pvn ínø Na kaq neci shvwi vla dvzvrè.
(6) Ma:pnønt te gø’, Kv’mvm yor gø’, Ánā sháò gø’, dvshá zā sháò gø’ mø-í lvm vyáshì sórí dedvmò. Wè rì nø Vsvng í yùmvm we bvnlì taq mvmè vhø’mò rì íē.
(7) Vlvm dø mà shv’m rvt bø’n maì døce me vl ni. Lúnlvm rvzaq we lvpat angni tiqlòng svng Na í vpø’ mèsheringò nìnø, vsvng lvpat walòng Na è cømbø’è.
(8) Angdèo gá lòng í nø angdèo lvpat tvrà svng langgáhøq dèzaqshì. Ìshøt jèjú Vtoshì lúnlvm rvt byō lvm lòng mvdvmø, Tiqdvng vsvng kaq zí lún rvt byō lún gø’ wā byōlvm lòngò mvdøng, vjø’ng svng vtoshì lúnò lòng íe.
(9) Angdèo byōlvm lòng nø Tiqdvng vsvngò neci rì mø-í lvm gvzà vyáshì ràe. Wá mvdaq walòng svng Vsháshaq mvdvmø tiqlvngce dvpvt byōlvm rvt wā nvmlat gvlshì nø wáshì bø kvt téwa Nønt dvshà lvm, mvhøt lvm rì vlē.
(10) Nào mvrshvm yv’ng Hè lvyitce dètanshì. Byōlvm, Jór lvm rì dvpvt wáshì lòng, dvnúngshì lòng nø gvpshi we dv’ngvp tiqlòng bø’n búngè.
Nào Nønt mvsøn vdòng taq Nønt dvshà lvm rì vhø’m v-du ra dvgvp Helvyitce wáshì lúnì, Na nø Nøntdø’ng we tiqgø’ è í bø’ì.
Nà nø rvgaqtøm taq ring vtv’ng, vsvng dvci vrvmò mvsøn nvrøm taq shvlá vtv’ng Nønt vl nø cúnshì ràe.
Rvgaqtøm taqø Nønt rvt vjú mvzí we dvshà lvm rì vhø’mshì pàdø, Nønt rvt jèjú ìshøt vdá mvgvm lvm gø lúnshìe.
Vpø’ íwe pèmè vnvmchvngmaq, Mashvla Nønt lòngí øpshì bø kvt nø, yalòng nø mvjor walòng svng sháshì nigø angdvtvng tvng vya taqsórí vleshì v-duè. Mvrà gvba rì wá v-duè. Vkvtdø í dang rì taqkèní nøngmaqí gø rvnaq dø vzàng kaq dvdvm lvm nø, Dvdvm nønt rì vháng vlúnlvm dvpvt yalòng Kàru tiqyvngce í dvshat nø nònggùn zí mvyøngè shvngbe svng oqā.
