“Nào lvpat svng gòng lvm rvt bv’ngkà vkoq nø caò we Gvray kaq vtōshàì.”
Nár vrvm vsvng mvngpòng nvng v-toq v-tìp dvman we nvng v-yáng mvlung Angelu vjúrøt lòng svng ya Nár taq nø Rvngtung Svrabín Koqkvm narshì we Castel Gandalfo yv’ngø wa bø’à. Svrabín Koqkvm Leo ínø vkvtdø vhømì lòng nø Tá shá lúnlvm nvng zaqle vtō lvm dangò vchvk lòng svng dvkv’m bø’ì.
Svrabín Koqkvm Leo ínø dèni rø shì we Kàgvp anglí Mongkà kèní Abraham nvng Døngku me Sara nío tvràrì nvng Kàgvp Àngshvr kèní Vkangpè Yesuò vsvngrì í we Martha nvng Maria maqí dvtanò we zaqle vtō we tvrà svng dvdvm vjáng nø dvshvngòe.
Mvhøt lòng, Mvkok vpø’ lòng nvng vjang laqya vnvp lòng nø zaqle vtō dang taqø vbá we íni gø, Cìpshì lòng gø gvzàni vchvk we dang, Nønt mvsøn vjang laqya shvla we Maria nø dvzøm shì we bvnlìrì taqwā dvzaqshì nø, ring we Gvray gvsang nvng vzø’m vzàp vhø’m lòng, àngò Mongkà tashì lòng vlún vkvng svng àng nønt shø’m bø’ì.
Àngde mvdvmø vchvk lòng àngdeò lvpat svng gòng lúnlvm rvt tánshì nø vtoshì ràe, àngde mvdvmø te lòng svng vtoshì lúnlvm rvt cvnshì lún kvtwā lvpat nø kømzøp lúnlvm vlē. Yalòng í wā byōlvm lòng nvng kømzøp lòng kaq svng shøl lúnè. Martha angnvn me Maria í mvng nø Vkangpè Yesu kaq vtō we wā mvtaq, Àng Mongkà svng gø táshì lúnlvm gvzà vchvkngè wā shálúnò lòng íe, wā Svrabín Koqkvm Leo í bø’n nø dvshvngòe.
Shvla dang svng lùshì lúnlvm rvt mà léshì lvm rvt lvpat taq tashì lòng nvng nāmcè vlvm lòng svng Vmè Maria taqkèní shvbóng shvmvtshàì. Zaqle vtō shvrúng lòng svng rvtø vrvm cvnshì lúnlvm, Tiqdvng vsvng kaq vtoshì lòng nø àngde svng vrá vto we lúnlvm rvt vmìng zí shì lòng íe. Gvray nvng na høm we íni gø, àngde nvng nitvp gø’ nvng na høm we íni gø vkvtdø nàhø’m lòng nø Gvray gvsang i zí we té vtv’ng jèjú íe, walòng svng dvdvm rø:tlvm rvt Svrabín Koqkvm Leo í nø nònggùn zí bø’ì.
