Angwà Nár (16) Sunday Homily(July 20)
Shvngbe svng pàmvra. Deni deyaq høq roqgvl mvkok shawe shóngnøt angkàng Gvray kaqsvng oqà waì. Ya lvbvn nø angwa nár (16) lvbán wa nár svng hòng bø’shà.
(1) Nvmlat nvmpvng 18:1-10
(2) Koloshi 1:1-10
(3) Luka 10:38-42,
Zaqle vtoshì yvng kení ìshøt ìgvn pǿng we dang,
Vsúya vsvng gvba tiqgø gø’ wamà mvring rvgaqø tuqráì kvt v’maqlvm dvgø’āì nø gvza dvbū sórí pàmvra wa vtoìe. 2018 nøng Myanmar móng taq Catholic shvngømré mvloq nìgø Svrabín koqkámpè tuqráì kvt svng gvza dvbū sórí pàmvrácè vtolún bø’shà. Deni mòngkà taqkení shvdúme, shvngømré í, vtolvm nø dvgá mví, Kàngpè Yesu nø nøngmaqò ngàngdøng we zaqle gvba ídang svng shvdúme.
@ Nøngmaq rvcángcèrì chøm døngku vrvm dvpvt zaqle gvba íe.
@ Nøngmaq gø’ vrvm dvpvt zaqle gvba íe.
Mòngkà (1) Nvmlat nvmpvng (18:1-10) taq Abrahamí zaqle vshø̀m gǿ svng vtoò we
Vyáng nv̀m gáng rvtø̀ taq, Abraham nø shìyat bv́ngkà chit yv́ngø rūng we svng yvnglún shìe. Vsvng vshøm gø’ angyáng dìrá we yàng bø’à dvgvp vba tø̀m svng kǿngkupshì taqsórí Ngà Vkàng pèá, nà mv́rdv̀ng taq ngàí jejú lúnò we í kèní nø, nà vshuqpè ngà yv́ng kèní mènàlēni, wv̄ng røtshø̀nge. Tì cvmaq leq lv́ngāvtnøng; namaq hí zv́lshì dv̀ng shǿngtø̀ng lv̀ngpvngø ènārshì ránøng wa røtshìe. Tiq dvshaqí Sara yv́ng svng vjèrá:mì nø, “Bvbò zōng tvnøt vshø̀m dvwv̄m dègø̀ò nø nàkø:nò dá:ngí, zidòng èyēò,” Wekvt a:ngí nōngdvchit, nìnà nōngtì nvng a:ngí dvgø̀ bǿà we nungwàcè shā gø lv́nga:tnà nø angmaq svng shvám shvaqòe.
Abraham yáng didaq we vsvng vrvm kaq vkvtdø vtoò we dang svng shálún shìe. We angyáng dìrá we vsvng vshøm gø’ nø Muqlvng dvzvr vní gø’ svng shøla:tnà we Gvray ni íwe svng Abrahamí shá bø’à. Vbrahamí gvza nøtlømsórí Gvray nvng Muqlvng dvzvr vní gø’ svng vtoò rvt tévtvng we jejú gømpaq lúnòe. Gvrayí dvkámò we nø èyà:ngò, Nvpnǿng yarvtø̀ vhø̄m rā kvt, nvchø̀mmè Sara nø angcè tiq pè vdá daqe,” a:lòe.Mòngkà (2) tut Koloshi (1:24-28) taq, Poloí Koloshi shvngømré vsvngrì kaq shvngøt dvtúò we nø Akvt mv̀ng nø, namaq dvpvt ngà dvshàngv́mà rvtnø ngà dvbònge. Kristu Ang góng í we shvngø̀mré dvpvt, Ang dvshà mvhøtrì mvgø̀ mvgø̄m lòng nø ngà shagóng taq ni dvgø̄m bǿà we íe, wae. Ngà dvpvt dvshà mvhølòng nø pàgø mví, Tòng taq rùng we chøm taq vldø ni lvnshønge. Wedø ínìgø Gvray mòngkà dvshvnglvm dí mvlúnò rvt té dvshà mvhøtlvm dvki vrè we vhøm ngòe.
Shvngømré rvcángcèrì tiqmaq svng mvgām we shvngøtshú rìí shvngøtnò rvt, vdèò kámnøt svng là:ngòrì vl rvt dvshà mvhøtlvm vhøm ngòe, wae. Kàngpè Yesu nø nøngmaq shvnvng gwør høm taq dàlvm mvshø’l pvrá nvng tiqdø v:le. Poloí Ngàní lvngàí gø Ang dang dvshvngshò nø, vsvng gǿ vrv̀m svng dvshat dvzitshò sórí, zitnøt shvngbe zø̀mshò nø, vsvng gǿ vrv̀m svng shvngøtshòe. Yadø wàshò lòng nø, vsvng gǿ vrv̀m svng Kristu vdòng taq, kø̀mgøm høq tétǿng dvzv́r nø, Gvray mv́rdv̀ngø dvtuq lúnlv́m dvpvt íe.
Mòngkà (3) Luka dvbū shvng mòngkà (10:38-42) taq, Marta nvng Maria í, Yesu svng ang chøm taq vtoò we dang svng yvnglún shìe.
Yerusalam shvnvng Bethany mvring taq vlwe Martha nvng Maria níínø, Kàngpè Yesu svng angwà dvzøm vtoò we chøm tiqrvp íe. Kàngpè Yesu nvng coqcvn tiqsé vnígø’ dvpvt vmlvm aqlvm dvgø’āò dang nø yòl we mví. Martaí dvzøm bvnlì waò we dang nø gvza shvla jò we bvnlì íe, ínìgø Mari, nø Vkàngpè hí yv́ngø rūng nø Ang mòngkà tashìe. Iwe Marta nø dvzøm bv̀nlì luq nø, nøt shok lú:ngì rvt Yesu yv́ng di nø Ngà svng dvbv̄nglv́m èv̄lāngà,” a:lòe. Vkàngpèí vtà:ngò nø, “Marta é, Marta é, nà nø bv̀nlì mvme luq rvt góng dègīshi nø shv̀mná mègø̀re. Iwe zǿmdv̀ng lòng nø tiq pv̀n wa v̄le. Mari nø welòng rvcv̄ngshì bǿì. Welòng nø ang yv́ng kèní lúālv́m mø̀í,” a:lòe.
Vkvtdø Kàngpè Yesuí Marta, Marta shøn wenø Marta svng ngànò we mví, ang dvzøm bvnlì waò nø vtoshì rvt shvmán dvgø’ngkà mvng íe. Gvray nø nøngmaq yvngsvng dirā tuqrā wenø vhóng mví, Kàngpèò mvréza we gømpaq nø nøngmaqí dvzømshì we mvdvmø téloq pø’ng we svng shá dvzvre. Kàngpè nø nøngmaq chøm dvpvt rvtø vrvm zaqle íe. Tiqrvp vsvngrì døni sòn dvzvr we íe. Gvray nø rvcángcèrì gø’ vrvm dvpvt zaqle mvdøng íwe svng gø shvdúme.
