“Shì lòng Dvrá svng vgám mà shvla Cúnshì we Dvrá taqø dvzømshì taqsórí dvciq lvpat gønshaq svng vtoshì lún ràe”
Nár ni v-rvm vsvng mvngpòng vhø’m mv-ngushì lòng nvng v-yv’ng mvlùng (Angelus) vjúrøt lòng svng Rvngtung Svrabín Koqkvm narshì ra Castel Gandalfo yv’ng wà bø’à.
Lutshì ra kvtøm yv’ngø Svrabín Koqkvm nvng tiqdø v-yv’ng mvlùng vjúrøt lvm rvt Roma Myoq shvnvng shigung rvgaq kèní vjúrøt kvmnønt vl vsvngrì nvng kømngøm rá ì we vsvng mvngpòng rì kaq Svrabín Koqkvm Leo (XIV) í dvbùshang Mongkà ciq ” Cúnshì Gvray dvciq lvpat gønshaq vtoshì lúnlvm dvpvt pa svng wá ràe mà” wàwe Mongkà ciq svng mvtú nø vsvng mvngpòng kaq dvshvng bø’à.
Svrabín Koqkvm Leo (XIV) í nø yalòng røt Kà yv’ng wè vsvngò rvnaq we mvsøn nvrøm vdòng kèní Shi lòng, mà shvla lòng nvng Krvtshø’m lòng yv’ngkèní lutshì lún nø dvciq lvpat dø’ngvng lòng wàwe lúnshì we Shvrúng nønt svng dvtan shì lòng íe.
Dvciq lvpat gønshaq svng mvlún lunhøq dvkvngshì we, v-toq v-tìp dvmvn nø lúnshì we yadø íwe tvrà rì kèní kádvgvp gø mvlúnshì, zaqshøp vtoshì lòng yv’ngkèní wā lúnshìe. Dvciq lvpat gønshaq wàwe nø angpè angmèmaqí cvmrérì svng zaqshøp zíò pàdø Gvray gvsang tiqgø’ taqkèní wā zí lún dang, Gvrayí nøngmaq kaq svng èzí bø’shà we zaqshøp íe.
Angí zi we zaqshøp svng vtoshì lúnlvm rvt Ang Nønt shvrúng lòng nø Dòngnønt mvsøn taqkèní Gvray kaq daq v-tu ká:m nø shóngshì lvm rvt, àngde nø angdè tiqgóng èshúngshì pàdø tiqdvng vsvng kaq shóngshì lvm rvt íē. Yarì svng dvnúngshì lòng nø Gvray gvsang i nøngmaq kaq svng zi we shóngnønt tvrà svng vrá vtv’nà lvm lòng íe.
Gvray gvsang nø dvciq lvpat cúnshì pàdø, Àng Nønt Shvrúng lòng svng cúnshì Nønt shvrúngì lòng íe. Nøngmaq Bāsha rvzvngcerì dvciq lvpat gønshaq cúnshì lúnlvm rvt Angò longzapè svng dvzvrà nø chutchvng we í Angò mvkok dvdí shóngnønt dvnzøng lòng svng dvtánò lòng gø íe.
Vkangpè Yesu Kristuò lvpat nø shóngnønt Dvráò angdvtvng tvng kømzøp dø dvtanò we lvpat íe. Shóngnønt ínø shvrúng we í zìe. Rvtø v-rvm vroqàe. Ang dvpø gø te pàdø nøngmaq yv’ngkèní gø kádvgvp gø vcar lvm mø-í.
Vkangpè Yesu Hkristu taqkèní wā vsvng shvngbe kaq svng Gvray nvng nitvp dø èshøl bø’shà pàdø nøngmaq shvngbe gø gurgur taqø vl rì kaq svng gø dvshá zā mvkok dvdí shóngnønt tvle ràe. Mònggvn yachangò chutchvng Gvray Vkangpè Yesu shøn yangì pàdø Nønt dvt Nøntcv’m rì, kūnga shaq vnø’n vsvngrì dvpvt Nønt shvløm nø nònggùn zí we nvng Vløm ra lòng svng dvtit tvle ā lvm rvt nøngmaq nø Gvray í go lòng svng vtoshàì rì í shàe.
Dvciq lvpat gønshaq lúnlvm rvt Shì lòng dvrá svng vyá wáshì nø máshì lòngí, yilshì màshvla Cìpshì vpnóngshì lòng í wā dvciq lvpat gønshaq svng vtoshì lúnè. Vsvng mvngpòng nvng vhø’m mv-ngushì we taqø vkvtdø dvshvng bø’à.
