“Svrabín Koqkvm Leo (XIV) Italy Wunjichuk kaq Vtō nø vhøm we”
Svrabín Koqkvm Leo (XIV) nø vle a:mì (Nár vshøm)ni Vsháng tut taq Italy Wunjichuk
Giorgia Meloni kaq Svrabín Koqkvm pèo rúng taqø vtō nø vhøm bø’ì. Vkvtdø vhøm lòng nø Italy Wunjichuk ku Dvrá shàng vhøm lòng íe. Wunjichuk nø Jun (24-25) ni høq The Hague Myoq taq wà bø’à we Nēdú lìpong kèní vrá tuq lúngì lòng gø íe.
Wè lìpong me taq Cil mvzvn rvt lvng v-du we mvcv’ngrì tvrà svng vrashì bø’ì.
Nár vshøm ni taq gø Svrabín Koqkvm dvpvt gvzà tvyø rì luq we angni tiqni gø íe. Pàwàlvm wàni Svrabín Koqkvm nø Nár vshøm ni vrvm Vjúrøtshì mvdò nvng Dvzvr Piter Noqngøm tømø vhø’m nø vjúrøt we, Mongkà taqkèní shvgùn shvring shvta we vle. Wè ni taq Svrabín Koqkvm nø Cardinal rìò tvrà dang dvnúng we Comission bvnlì angkang Cardinal Luis Antonio Tagle, Ukraine Catholic Sasvnaò synods nvng sing we Svrado rìo mvdò bvnlì angkang
Paul Emil Tscherrig, Turkey móngdàn Dàmmvdaqò Døngku me Emine Erdogan maq nvng gø vhø’m bø’ì.
Vaticanò Shvngkàdvp rúng kèní shvngkà dvkang we taq, Italy Wunjichuk nø Svrabín Koqkvm nvng vhø’m bø’ì mèpvng Vaticanò bvnlì angkang íwe Cardinal Piero Parolin, móngdàn vrvm v-toq v-tìp lvm nvng móngdàn mvdò vrvm nvng sing we rúng bvnlì Gaíchuk Svrado pè Paul Richard Gallagher maq nvng gø vhø’m bø’ì.
Vkvtdø vhøm we taq, Vatican nvng Italy dvhø taqø vl we shvla we v-toq v-tìp tvrà dang, Ukraine nvng nvmshvr rvwe dungò Mongzøl lvm tvrà wá dvnúng lúnlvm dang, Gasa rvgaq taq vl vsvngrì kaq dvshá zā tùbùm dvbvng lvm, vkvtdø í we tvrà rì svng vhø’m nø vrashì bø’ì dang nvng v-ní móngdàn dvhø zvndvtut dvnúng nø wàlvm mvtúrì, shvngømré tvrà nvng Italy móngdàn svngpvn dvci rìò tvràrì svng gø v-toq v-tìp dvman bø’ì wā shálúnshìe.
