“Svrabín Koqkvm Francis Pvlàcè kvmnønt tvrà taqø nònggùn lùshì we Cardinal gvba pè mà-vl bø’ì tvrà “
Mvrà vroqā Táā lòng nvng Pvlàcè tvrà taq dvzaq dvkvngshì dang taqø Svrabyin Koqkvm pè Francis ni Pvlàcè kvmnønt nònggùn kūnga lùshì bø’ì we Cabochin Dvrá shvdik mvdò Cardinal Luis Pasgwādvri nø 30 Jun 2025 nøng poinòs Irvt taqø lvpat (98) nøng nø Vkangpè Yesu vdòng mà-vl bø’ì.
July 2 ni 2025 taqø àng 2007 nøng dvgvp narshì yangì we bùmpi Maria lúng puq vl we shvra taqø angí lang rá a we shagóng vnang rvda Vjúrøt Kung svng wàlvm í bø’ì.
Svrabín Koqkvm Francis cúnshì we lvpat taqø cardinal Dari nvng singdø ” Ang nø dvgùng gùngshàng pè íe. Dvshá zā shóngnønt dvnzøng pè, shvbóng shvmvtshì kūnga lùshì lvm tiqpè íe. ” Mvrà vroqā we bvnlì rvtø rì mvmè vlé høqshaq wáshì bø kvt ang shøn we Kà nø Mvra chutnà we bvnlì svng gvzà wáshì bø’ì, Vkangpè nvce pè kaq svng naroqangà, Vkangpè íni vkvtdø dvnúng lvm ècvnà yanshà, ” wā shøn we Kà vl dang, shvngkà rì taq vkvtdø dvtanò lòng svng yv’nglúnshìe.
Cardinal Dari nø (1927) nøng April (17) ni Argentina móngdàn Fatrazium taqø shøq yangà. Cardinal Dari nø Kvmnønt gvzà vl we Døngku taqkèní dì daqì pè ínø angnøngnvm (9) gø’ vl yv’ngkèní ( pè wà pè gø ínø, 1945 nøng Cabochin Dvrá shvdik mvdò kaq cv’ngshì yangì. Ang lvpat svng Shànshér pè Dare Pius nvng Leo Pòqmín Dvt maqò vjang laqya yv’ngkèní shvbóng shvmvtshì lùshì nø lvpat taq cúnshì yangì pè gø ínø,
Ang lvpat yv’nggùng Sasvna bvnlì wàwe Pvlàcè tvrà dvtú we Shvrúngshú tiqpè ku angnøng mvmè bvnlìrì svng rí nø dvnúng yangà.
Svrabín Koqkvm Francis ínø angkaq Cardinal vya dvtvng svng 2023 nøng taq vya zí nø kàmshì yangì.
Ang nø cardinal ku bvnlìrì luq we vdòng yv’ngkèní Mvra vroqā we bvnlì svng rvtø vrvm dvnúng yangà. Vkangpè Kàgvp tøngnø mvr taq Rvtø Nayi mvmè vjúrøt na we, àngò lvpat taqø Cìpshì lòng nvng dvshá zā we taq zø’m shì gø íwe dang dvtánòe.
Nga kaq Mvra vroqshì rì dì pàdø Ngà gø Mvra vl vsvng tiqpè øngà we dang, tiqlvng mà le shøn dang svng vkvtdø shøp nø dvtan bø’à.
Cardinal Dari shøn yangì we taq ” Ngà yv’ng kapa Vsher Degree vmō gø mà-vl. Íni gø Ngà lvpat
ní nga svng mvmè nònggùn èzøngè. Nga nø dvshà i we Døngku lvpat yv’ngkèní egvl eshøq daqngà. Wervt dvshà vsvngrì nvng tiqdø Ra vchvk rì svng dvshá zā nø tùbùm dvbvng lvm, àngmaq nvng tiqdø nitvp dø vl lúnlvm ngà í nø shóngnønt svng vtoshì lúnòe. Ngà kaq dì vsvng tiqgø’ ígø síngà we mvlúnò, vtō we mvlúnò Kagø’ gø búng mvdaq ” wā shøn yangà tvrà svng dvtánòe.
