Dvzvr Tomaò Kvmnønt
Vpø’ íwe vnvmchvngmaq,
Dènio Gvray dvbùshang Mongkà taq Dvzvr Tomaò Kvmnønt lòng nvng mvkv’m lākv’m yv’ngkèní bung we Kvmnønt tvrà vjø’ng lòng svng yv’nglúnshìe.
Vkangpè Gvray nø àngde tiqgóng dvshá mvhøt vhø’m nø shì yv’ngkèní Zun lvm mvbø’n lòng svng jø’ngjøng yv’nglúnòe. Dvzvr Toma ínø Vkangpè Yesu svng Ngào Vkangpè , Ngào Gvray wā vchvng taqsórí dvtan nø dvshvngòe. Vrá Gvray gvsang nø shóngnønt íe, wā mvdø’m lādøm vtoshì taqsórí dvtanò dang yv’nglúnshìe. Vrá nø, Dvzvr Toma ínø Yesu nø Gvray í lòng svng vtoshìe, Kv’mè. Ngào Gvray wā Àng tiqgóng che:pm ku matōshì we vzàng Vkangpè Yesuò dvmmá rì svng vzàng yv’ng mvyøè. Shá mvyø lòng svng yv’nglúnshìe.
Àng shøn we taq “Ang wur taq shv̀mshi dv̄mmá yv̀ngò nø, dvmmá taq ngà wurhàm màrvzǿngshøng dv́ngte, Ang svràmpa dvmmá vdòng svng ngà wu:rí màmvnokngò dv́ngte nø, kadø ínìgø ngà mvkv́m,” wàe. Dvzvr Toma nø shvlá wā dvtøp nø Shvkse dvtan mvyøè.
Vkangpè vdòng taq vl ring vtv’ng shóngnønt pòngbang dvgùng svng vpø’ vtv’ng dø yv’ng lúnò we gømlā gø íe. Dvmmá rì svng ang wur í shù:plún bø’à kvt Gvray gvsangò mvkok dvdí shóngnønt Dvrá vjø’ng lòng svng dvzvr Toma í vtoshì lún bø’à. Wè mvdvmø Ngà Vkàngpè nvng Ngà Gvrayé,” wā dvbù shvwéshì we í shvgùn shvringò lòng svng yv’nglúnshìe.
Shóngnønt rvt Gvray gvsangí nø Kristu svng rvgaqtøm dvpvt dezv:rà bø’shà.Shóngnønt rvt Kristu nø Wurgvng mvdvmø gønshaq dvbø’mshì shì yangì. Vkangpè dvmmá rì svng Dvzvr Toma angí ni shù:plúnò lòng nø shvdun mvlúnshì we Gvray gvsangò shóngnønt svng àng tiqgóng shvngbe í dvbù Nøntní vtoshì lún bø’à lòng gø ínø, shvngbe dvpvt Nøntshøm dvbùlvm ra gø í bø’ì.
Vrá nø,(Yohan 20:29)ciq vdòng taq nø “Nàí nø Ngà svng èyv̀ng bǿngà rvtnø wa èkv́me ma? Mvyà:ngò nìgø kv́mrì angmaq nø ìshøt ìgv̀n v̄le,” wā Vkangpè dvkv’m yangì Kà svng gø tálúnshìe. Shø’n mvyø’ we taq Dvzvr Toma dø nøngmaq gø ang Dvkv’m Kà, Lvp Kà dvrá rì, Dvmmá rì nvng gømlā rì svng v-yv’ngshaq ká:mì vtoshàì taqsórí mvkv’m lākv’m kvmnønt mvdøng we lvpat taq cúnshì we mø-í lvm rvt vyáshì ràe.
Vpø’ íwe pèmè vnvmchvngmaq, Vkangpè Yesu í shøl we Dìngman we Kvmnønt tvrà vdòng taq Dvzvrì í màyvpshì dø Kvmnøntní vdv’ngshì, nònggùn kūnga lùshì nø cvndvgøm Shvkse wáshì yangì pàdø, Dvzvrì i shøl we Dìngman we Vkangpè Kvmnønt tvrà vdòng taqø nøngmaq shvngbe gø Kvmnønt tvrà taq màyvpshì dø Vkangpè Dvrá Mongkà rì svng cvndvgøm, shvkse wáshì taqsórí nònggùn kūnga lùshì lvm, Gvray dvgùng svng shvring shvta vjúrøt dvzaqshì taqsórí Pvlàcè kvmnønt nònggùn kūnga lùshì lúnlvm nø mvdøng vchvkngè, wadang svng dvdvmì taqsórí Kvmnønt nònggùn kūnga lùshàì. Shvngbe svng oqā.
