“Dvzvr Piter nvng dvzvr Polo ínø Bóy angni “

Yalvban rø vdu we Gvray móngkà ciqrì vzàng shá dvzvr mvyø’ we taq,
(1) Dvzvr 12:2-11
(2) 2 Timothy 4:6-8
(3) Mati 26:13-19

Dèni nø, Dvzvr Piter nvng Dvzvr Polo nío Kvmnønt svng shvgùn shvring we bóy angni tiqni gø ínø, nøngmaq shvngbe Pvlàcè Kvmnønt nònggùn kūnga lùshì dvzv’r we bóy angni tiqni gø íe.

Vpø’ íwe pèmè vnvmchvngmaq,

(1)” Vkangpè Yesuí coqcvnri svng Ka røtnòe”

Vkangpè Yesu nø, Àng Kagø’ í we dang (identity) svng coqcvnrì í shvlá wā síngràl lúnòe mà? wā Kà røtnòe. Vsvngrì í ang kaq Kagø’ íe lvnò lòng svng vzàng røtnòe. Wè mèpvng coqcvnrì í vrá kadøwā dvdu:t dang svng rø:tnòe. Vkvtdø røt Kà røt lòng nø, Yesu àng bøng svng kadv’ngte bøng shv’nge walòng svng shá mvyø’ rvt rø:tnò lòng nø mø-í. Dèni nøngmaq gø’ vrvm nvng gø singè ( personal) ku vtan shì lúnlvm dvpvt Vkangpè í nø nøngmaq kaq svng røt Kà í røtnè, walòng svng vkvtdø yv’nglúnshìe. Àngdeò Nønt mvsøn vdòng kèní léshì we vtán Kà nø mvdøng gvzà vchvkngè, wà Kà íē. Vsvngrì shøn rvt wā ká:mè, vsvngrì wáshì rvt wā wáshì:ngè wàwe mø-í dø, àngde tiqgóng taqkèní gundvtøp cvndvgøm nø Nønt rvt shìlvm nø mvdøng ínø, Dø’ngvng lúnlvm gø vlē, wa Kà íē.

2″ Na nø, Cúnshì we Gvray Angcè pè Kristu e íe” wā Dvzvr Piter vtánshì Kà tá lúnìe.

Yalòng nø Simon Piter vtánshì Kà íē. Simon Piter nø Yesu svng
Messiah, Gvray gvsang Angcè pè e íe, wā vtánshì bø’ì. Yesuí nø Simon Piter svng àng Dòngnønt Kvmnønt kèní vtoshì lún rvt shvgùnòe. Vkvtdø vtánshì e lúnò we nø, Muqlang kèní Ngà Vpè í dvtan rvt í dang, dvtá nø shønòe. Tatut Vkangpè Yesu shøn we taq, ” Na nø Piter e íe, yachang lòngdøng mvdvm taq, Ngào shvngømré ( Church) svng ngàí shvzønglvm íe. Shì lòngí mvdvng ké lúngè.” wā dvkv’mòe.

3″ Muqlang taqlapmō shv’msòpuq ngàí Na kaq tvle lvm íe” wàe.

Mongkà taq shv’msòpuq ( saw si ) svng gømlā ku lángshìe. Du mvgám nvng vmìng vkang dang (power and authority) svng shø’nòe. Vkangpè Yesu shøn we taq, Muqlàng móngdànò shv̀msòpuq nø, Ngà í nà svng tvlēlvm íe. Rvgaq tø̀m taq nàí èdù:ngò we kapà ínìgø, muqlàng taqlapmø gø vdóngshaq ív̄me. Rvgaq tø̀mø nàí shèlà:ngò we kapà ínìgø, muqlàng taqlapmø gø shvlángshaq ív̄me,” a:lòe.
Shvlà:nglvm nvng Dù:nglvm vmìng vkang, kūnga vzàm, shvngømré meò vgo pè Piter kaq tvle yangà. Yalòng nø Pvlàcè kvmnønt Tvrào vmìng vkang lòng svng shø’n mvyø’ dang íe.

(4) “Yesu í vmìng vkang svng zi we “
Vkangpè Yesu angí ni, “Shvlà:nglvm nvng Dù:nglvm vmìng vkang bvnlì døngja”
(Binding and loosing) svng Dvzvr Piter nvng dvzvr mvdò svng zí yangà. Yadang Gvray gvsang móngkà ciqrì taq vkvtdø yv’nglúnshìe.
Mt 16:19,Mt 18:18,Yh 20:23 taq nø ‘ shv’msòpuq wàwe Kàru chang ma bá. Kàgvp angli kàdvtutshú Esaya 22:22 taq nø,
Dawi rvp vyā ang shv̀msòpuq nø Ngàí ang raqpù taq hapmò nø, a:ngí tàn bǿò lòng svng kagǿí gø cøt mvlún lú:ngò. A:ngí cøt bǿò lòng svng tán ngu:tnò we kagǿ gø màvl long, wàwe Kà gø ínø bvnlì døngja tvleòe wànø gø shøn shvlàe…

5. “Dvzvr Polo shvring Kà ” svng tálúnshìe.
   Vngàé, Gvray Ang zit rálnøt nvng paqzí bvnya shòní pv̀n kadvngshìni pǿng nø rvnaq ráìé!
   Vl dv́ngte shvngbe nø, Ang yv́ng kèní bung daqì we í nø, shvngbe nø, Ang taq kèní wa íe. Ang nø dvciq lvpat dvgùng laqvl. Yadø laqí daq, wā shvringò lòng svng yv’nglúnshìe.
6. “Piter wàwe lòngdøng” svng dvtanòe.

Yesu nø kagø’ í we svng, Piter í gvzà shvla v-du dø vtánshì bø’ì. Vkangpè Yesu í gø àng svng shvgùn shvringò nø, vkvtdø vtánshì e lúnò we nø, Muqlàng taqlap v̄l pè Ngà Vpèí dètan we íe, wànø a:lòe. Simon wàwe bøng chang svng tvlíngò nø,. Piter wàwe bøng chang svng tø bø’à. (Aramai) dvci kapvn í ( Rock) wā tø’shì nø Latin Kà taqkèní Petru wā tø’shìe. Greek kà í nø (Cephas) wàwe ínø, Angò lvjøm nø lòngdøng wàwe íe.

Vkangpè Yesu shøn we taq, yalòng lòngdøng mvdvmø, Ngào shvngømré (Church) svng ngàí shvzønglvm íe. Zùpvng dāng ang jórnònggù:ní* shvngø̀mré svng mvdv́ngké lú:ngò. Ngàí muqlàng móngdànò shv̀msòpuq nø, nà svng tvlēlvm íe. Dvzvr Mati dvbùshang Mongkà taq Piter svng shvngømréò mvpvng angké vgo (Foundation) í dang mvsat yangà. Wè dø tiqdvchá, Dèni la shvngømré meò vgo pè Dvzvr Piter tvle (267) pè, wà pè Svrabín Koqkvm Leo XIV í Móng Dø’ngtáng vl Vkangpè Yesuò shvngømré rvzvngcerì kaq svng roqgār nø mongzøl dø èshø:lì lòng gø íe. Dø’ngvng lòng gø í nø,Vkangpè Yesu í zi we lvksan vmìng vkang gø íe, walòng svng yv’nglúnshìe.

Dvzvr Piter nø AD 67 nøng taqø Gvray Dvrá Mongkà rvt shvt vhø’m yangà nø, Vaticanò shigung Neru Koqkvmò sun kurwang vdòng taq paqzúng wurgvng mvdvm hap nø shvt yangà. Wè mvdvm, Gønshaq dvbø’mshì nø Dvrá Mongkà dvpvt shvkse wáshì yangì. Dvciq lvpat gønshaq Gvray ngórdvgung pòngbang svng vtoshì lún yangà.

Vrá nø, Dvzvr Polo gø, Neru Koqkvm Wur taq Dvrá Mongkà rvt tvp nø, dūng shvrúng we vhø’mò we mvdvm, AD 67 nøng taqni Roma myoq vtv’ng lvp yv’ngø vgo bvttutnò nø shvt yangà. Gønshaq dvbø’mshì we í Vkangpè Gvray gvsang móngdàn dvpvt shvkse wáshì yangì.

Vpø’ íwe pèmè vnvmchvngmaq, Dèni nøngmaq gø’ vrvm kaq svng gø, Vkangpè Yesuí Dvzvr Piter mvdvmø shvzøngò we shvngømré vmìng vkang svng vpø’ shvring nø Ang móngdàn dvpvt shvkse wáshìlvm, Kvmnønt shvdø’ng shvngvngshì nø cúnshì lúnlvm ego íe. Kristu Lòngdøng (Piter )mvdvm vrvng shaq í we shvngømré vdòng taqø dvzvrì muqhøm wáshì nø Kvmnønt shvdø’ng shvngvngshì yangì pàdø nøngmaq lvpat taqkèní gø dvzvrì dø, Kv’m vsvngrì dø tiqdvciq Kvmnønt shvdø’ng shvngvngshì nø cúnshì taqsórí shvkse wáshì laqlúni…. wvng shvdøm nø dvshat sórí nònggùn zí mvyøngè. Shvngbeí Vkangpè Yesuò mongzøl lòng vtoshì laqlúnì, shvngbe svng oqā.

” Yalòng lòngdøng mvdvm Ngào shvngømré svng vrvng lvm íe.”( Mati 16:18 )

https://youtu.be/NL7W0aXwU74