Zitnøt láò rìí lú:nò we gønpaq
Ngàcèá, ngà kà svng nàtōshì nø, Ngà dvkv́mkàrì svng nà nøt taq èshøpshì. Nà vnà nø zitnøt svng èyuqshi. Nà nø:tní gø cíngrálnøt kà svng ècà:nò. Nà nø rvwv̄n shánøt lún høq èkórshi nø, cíngrálnøt v̄l høqshaq nàtírshì nø èrøtshì. Gv̀msùng svng láò dø zitnøt svng èláò nø, má yà:ngà we pø̀bø̄m dø èláò nø nàjá:ngò kvt kèní nø, Gvray svng vpǿ svrēnøt nø nàí rvwv̄n èshá lú:ngò nø, Gvray kaq shánøt lá èlún lú:ngòe. Pawá wani zitnøt nø Gvrayí zi daqe. Shánøt nvng cíngrál kà gø Ang nònggøp kèní bunge. Nøt mvdóng rì dvpvt nø A:ngí shvlā we gvcvt bvnyā rvdāāòe. Nøtdøng rì dvpvt Ang nø dvgà íe.
