“PAMVRA” (Library) Kàru Chøm Àngshvr Poq Bóy

Putao Myoqnē, Zion mvring taq Myitkyina Catholic Diocese Education Comission(DEC) Paqzi rúng kèní tùbùm dvbvng we taq Mvring vsvngrì gø shølshú vgo rì í shøl we vdòng muqhøm wáshì nø wá dv’ng bø’à we “PAMVRA” (Library)
Kàru Chøm àngshvr Vjúrøt Shvmv’n poq bóy svng (22-6-2025) Nár ni dørøm (2:00pm) rvtø taq mongzøl dø wáshì bø’ì.

“PAMVRA” (Library) Kàru Chøm
àngshvr vjúrøt shvmv’n poq bóy taq Putao Jau Gwørwang øp Shvrúngshú pè Fr. John Byin Tu Awng í shøl we vdòng Myitkyina Diocese Education Comission rúng kèní bvnlì angkang Svra Awng Seng nvng svra rì, Zion mvring taq vl Shvngømré vrvm kèní Pongøp svra rì, Øpkang rúng kèní shaqré rì nvng Mvring cerì(50) rvzé kømngøm bø’ì. Myitkyina Catholic (DCE) Paqzi rúng kèní bvnlì angkang Svra Awng Seng shøn we taq (Library) Kàru Chøm poqshì lòng ang mvnggá nø Dvci, Shvngømré mà rvweng vzàng lvp Cvmré cerìo lvpat Paqzi vháng vlúnlvm nvng v-rvm vrá we í mongzøl lúnlvm rvt íe, wā nònggùn zi kà shøn bø’ì. Shvrúngshú pè Fr.John Byin Tu Awng taqkèní gø nònggùn zi kà shøn we taq, Kàru rø shì vsvng nvng Kàru mvrøshì vsvng Nønt mvsøn vjang laqya gø màbóng we íe. We pàdø Paqzi mvkø’m mvdø’p, Síngràl Nyan Bvnya, V-rvm vrá lvm tvrà rì taq gø màbóng we íe. Wervt Kàru rø shilvm dang svng vpø’ shvring ìnø, Gvray jèjú rvt vtoshì èlún bø’shà “Pamvra” Kàru Chøm svng gø dø’ngvng dø roqgār lúnlvm dvzaqshì ràe, wā paqzi dvkøm nø nònggùn zi kà shøn bø’ì.

Mvring Shaqré Pè Vshaq. Mana Pi Dvng taqkèní gø Nøngmaq Ziún mvring taq vle a:mì we rvtø rì kèní (Library) Kàru Chøm lún mvyø’ í we íni gø wá mvlúnì. Íni gø vkvtdø Gvray jèjú vdòng taq
Myitkyina Catholic Diocese Education Comission(DEC) Paqzi rúng kèní tùbùm dvbvng we taq “PAMVRA” Kàru Chøm àngshvr tiqlòng vkvtdø vtoshì lún bø’shà rvt gvzà dvbù íe, wā oqā Kà shø’n taqsórí dvgùng shvring nø shvring gønpaq tvle bø’à. Lvngdøm taq Pongøp Svra gvba Wa Dvm Kong Pong (COC) taqkèní Kømzøp vjú nvng lìpong dvtø’m vjúrøt nø “PAMVRA” Kàru Chøm àngshvr poq bóy svng mongzøl dø wálún shì bø’ì.