“Svrabín Koqkvm Leo (XIV) vsvngrìo mongzøl lvm lòng dvpvt dvkv’m “

Nvmshvr rvwe dung taq vchvk we dvkv’m Kà shvngkàrì dvtut duq sháòe. Téwa nø Iran kèní íe . Israel nvng Palestine rì vbá we ya bø’n a:mì we taq mongzøngcerì téwa Gasa nvng Mvzvn bø’n we móngdàn v-ní lòngò rvgaq dvrit nvng sing we rvgaq taq vl mongzøngcerì laqni mà shvlá vtv’ng dvsha mvhøt mvbøn rì ni vrvm vhø’m v-duè. Vnálvm lòng svng gø, vsvng shvdaq nvmlat ra vchvk dang rì svng tiq dvsha i rvtø vrvm rvmshi nø, ra lòng svng luqtvm dø zí mvlúnlvm lòng svng gø dvdvmshie.

Dvgá dø rvtø rì mvdvm denial vpat nø vsvng mvngpòngò Dø’ngvng mongzøl lvm lòng svng dvshá zā røtnímshìe. Mongzøl lòng dvpvt røtnímshì we taq bvnlì lùshì lvm nvng cvndvgøm we vl lvm rvt, lvngdøm wàò we lvknak rìò svre dvkut we vdòng taq gø, Kà taqkèní øpshì we vdòng kèní banchvk svng dvbungò lòngrì taqø mà løplvm vchvkngè.
Mònggvn mvdò vrvm kaq Mvzvnò angké rúng svng narlvm rvt, mø-í nìnø gvzà dam we vkung kvroq pàdø mvzvn nø dvtøm lúnlvm mø-í.

Vsvng dvgùng nø tvle zí shì pvn bø’n ra nìnø banchvk rì nø tvrà tiqgán gø dí mvra. Mvzvn lòng ínø banchvk rì svng pø’nà we mà-vl. Téwa le rvmshi sháòe. Naqciq riq màshvla we zá vhø’mlvm rì svng wā rvmshi we dang vsvngrì lvpat mvshøl taqø shangshang wā yv’nglúnshìe
Vkvtdø í we zá vhø’mshì rì dvban lúnlvm rvt nø, vzàng kaq lvpat àngshvr rì Cvmrérì gvzà vl ràe. Cildvpmò jór lòng nø angdèo kèní cømá:mì we angcø angcè rì dvpvt dvshá vhø’m bø’à we Cvmré angmèmaqò dvmmá svng dvcømà mvlúnshì. Nønt dvmmá lún bø’à we Cvmrérìo vzàng lvp mvnggá rì svng luā mvlúnshì. V-toq v-tìp kønmvng rìò tùbùm dvbvng shì lòngí Mvzvn rì tiqdvshaqí mongzøl dø laq narshì a:m. Móngdàn vrvm taqø angdèo vzàng lvp mvnggá rì svng v-tu vgám we, Shvwi shórshì lòngí mø-í dø mongzøl lòng svng Háng dvnúng vrvng lúnlvm rvt Svrabín Koqkvm Leo (XIV) í vlē á:mì dørøm rvtø Angelu vjúrøt Noqngøm tvyø vdòng taqø dvkv’m bø’ì.