“Vatican Radio Shvngkàdvp rúng kaq Svrabín Koqkvm Leo XIV dì nø vriq we “
Dènøng Jun 17 ni taq nø Svrabín Koqkvm Leo XIV Shvrúngshú vya kàmshì we (43)nøng nønggøm ni gø íe. Dèni Svrabín Koqkvm Leo XIV nø Svrabín Koqkvm rúng me nvng sing we vsvng mvngpòng nvng v-toq v-tìp rung vl Santa Maria di Galeria taq vl Radio Shvngkà angdùng dvshvng dvp kaq dì nø vriq bø’à.
Wè Shvngkà dvshvng dvp vl bvnlì wà dvzømshú rì nvng vhø’m bø’ì nø, Shvngkà shvlángà we rúng kaq svng gø dì nø vriq bø’à. Wè Shvngkà angdùng dvshvng dvp svng Svrabín Koqkvm Tiqsé v-ní pè Pius í 1957 nøng taq vrvng nø poq bø’à we ínø, 1991 nøng taqgø Svrabín Koqkvm John Paul ll dì nø vriq bø’à dang shøptan gø vl bø’ì.
Dvtut Svrabín Koqkvm Leo XIV í Latin America nvng Africa móngdàn rì taqø Sasvna wà dvgvp Shvngkà angdùng Lin kèní Vatican Radio shvngkàdvp rúng taqkèní dvshvng we shvngkà rì svng tálúnshì we mvdvmø sūn mvdvngshì we jèjú rì lúnshì dang, yalòng nø Sasvna wáshì lòngò vsvng mvngpòng nvng vhø’m nø v-toq v-tìp dvpø vl tvrà i dang shøn bø’à we íe.
Zvndvtut yv’nggúng gung Nøntløm lømí Shvngkà dvkvng we taq dvzøm dvzaqshì rì shvngbe svng gø oqā wā dang dvman taqsórí shø’n bø’ì we mvdvmø, rúng bvnlì wà dvzømshú rì mvdvm taq gø shvmvn dvgøng kà shvlang nø zí bø’à.
