“Shvre lvshap naqciq riq màshvla rì, mà dvrá rì nvng Neci vlào we Mònggvn yachang dvpvt shø’mwāce vjúrøt dvbvng rì “

Mònggvn yachang mvdvmø mà dvrá rì, naqciq riq mashvla rì nvng dvdvm vbèo rì rvt yor Neci vlào rì mvmè vlē. Vkvtdø mvhøt lvm lòngí shvnìp shvnarò we Mònggvn yachang dvpvt, Zimbara móngdàn vl dvsháhot rì í we St. Cale Shànshér mvdò gaí vl rvzvngce dvzømshú rìò Gala gá Hang vngvt mèpvng lvp yv’ngø shø’mwāce Gvray nvng mv-ngushì vjúrøt dvbvngshì lòng nø vsvng shvngbèo lvpat rì mvdvmø tuq bø’ì lòng dvtánàe.

Yalòng mvdò taq vl rvzvngcerì dvzømshú mvdò rì nø angdèo lvpat svng Gvray kaq Noqngøm we Vjúrøt we bvnlìrì taq vpnóngshì rì íē. Àngmaq taqkèní vjúrøt dvbvng lvm røtnímshì rì dvpvt Nønt shvløm we, tvrà dvtú we, Nønt zá vhø’mò rì dvban we jèjú vtoshì lúnlvm dvpvt nøngmaq nø vsvng í shvring lòng taq dvbù we mø-í dø rvtø mvmè dvsha vsvngrì dvpvt pvnciq tūshì nø vjúrøt dvbvng íe.

Àngmaqò vjúrøt dvbvng lòng nvng vjúrøt we lvpat nø dvshá vhø’mò rì, nønt cvmlvm vhø’mò rì dvpvt Vløm ra nvng nønt shvløm vtoshì lúnò lòng í gønshaq tì bor bø’n a:mì. Vrù ra pvn rìò vdòng taqø shvnìp shvnar vhø’mò rì, vsvng nvmvm vhø’mò rì, bvnlì mà dá dvshá vhø’mò rì nø yalòng dvzømshú mvdòo vjúrøt tùbùm dvbvng rvt lvpatnò Vløm ra, Nønt shvløm lòng nvng Gvray gvsang kaq vwángshì vsvng rvm manshì lúngì.

Téwa nø vlømshì ra mà dá vsvngrì, vzàng lvp lvpat Dø’ngvng mvlúnò rì dvpvt dvhø kèní vjúrøt dvbvng rì íē. Dvshá hot íwe St.Cale ò angnvm rì dvzømshú mvdò gaí svng St Cale í 1212 nøng taqø vrvng yangà. Spain móngdàn kèní wè mvdòo dvbùshang dvzømshú mvdò rìò tùbùm dvbvng shì lòngí 1985 nøng Zenah móngdàn taqø dvzømshú mvdò zong tiqlòng vrvng bø’à nø Sasvna bvnlì svng dvnúng nø wáshì bø’ì.

St Cale o angnvm angchvngrì rì, dvzømshú vsvngrì, rvzvngce dvzømshú rì nø vsvng í shá mà dvzvrshì , Gala gà Hang vngvt mèpvng lvp kèní vjúrøt dvbvng we mvdò rì í rvt vsvngí gvzà mvsháò nigø, àngmaqò Sasvna bvnlìrì nø vsvng mvmèo lvpat kaq svng vjú zí lúnè.

Rvgaqtømò Pø zaqshøp, vsher gvmsung dvsha we íni gø vjúrøt we nvng Pvlàcè lvpat taqø vdá mvgam rì íē. Àngde tiqgóng dvshá Kvmshì nø Tiqdvng vsvng dvpvt vjúrøt dvbvng we àngmaqo bvnlì nø vsvng mvngpòng dvpvt, shvngømré mvdò vrvm dvpvt, kvmnønt tvrà dvpvt ring vtv’ng vpø’ vtv’ng shvkse wáshì we tiqlòng íe.

St Cale o vjúrøt dvbvng lòng rvt yoga zā yv’ng dvjvng bvn rì, cì lvjvng vhø’mò rì yalòng pòngbang gømlā rì svng shvbóng shvmvtshì nø St. Cale o mèpvng cvn nøngmaq dvzømshú mvdò rì í dvtut vjúrøt dvbvngì dang íe, wā mvdò angké shølshú vgo wáshì bø’ì we Sister. Agnes Mupunga i shøn bø’à.

Àng dvtut shøn we taq, nøngmaq kèní vjúrøt dvbvng i lòng, dvtú i lòng røtnímshì rì luqmvnshìe, wā shøn bø’ì. Nár vrvm US dolla 700 lvng nø cancel cì túshì rì Svmaré rì dvpvt lvngaré pè taqkèní Sister rì kaq svng vjúrøt dvbvng lvm nvng dvtú lvm rì røtnímshì rvt Gvray jèjú rvt cancel cì túshì rì svng maná dø lvjvngà jèjú lúnì rvt oqā wadang gø shøn taqsórí shvkse wáshì bø’ì.

Svrabín Koqkvm Leo XIV í gø Mvzvn rì, mashvla tølvm lòng, mvdìng mvman rì rvt zā vhø’mò we nøngmaqò Mònggvn yachang Gvray gvsangò shóngnønt nvng mongzøl we Shvngkà svng tálúnlvm rvt ràe,
Shvngkà svng tálúnlvm dvpvt tiqdvshaqí dvnúngà gø Zimbabwe móngdàn waterfalls vl dvshá hot St Cale o angnvm rì Gvray dvzømshú mvdò gaí dang svng dvkv’m nø shøn bø’à.