“Ring we Svmaré shvlá tiqgø’o angdvpø”
Dèni Døngku Lvmvng tvyø taq nø, “Ring we Svmaré shvlá ang dvpø ” wàwe Kà vgo taqkèní nònggùn zí mvyøngè.
Vpø’ íwe vnvmchvngmaq, ” Ring we Svmaré shvlá tiqgø’o ang dvpø ” wàwe ang tvrà svng shini mà dvshvng shì vzàng shvngømré Dvrá me(10) vdòng dvrá me (9)taq, Tiqdvng vsvng døngku me, pè kaq svng shóng we wá mvdaq wā dvkv’m lòng svng yv’nglúnshìe.
Vpø’ íwe pèmè vnvmchvngmaq, Ring we Svmaré shvlá tiqgø’o ang dvpø nø, angkang vdá vsvng nvng mashúshì lvm, màzømlvm lòng íe.
Àngdeò lvpat ang dvpø (mø-í ni) àngdeò dvgùng svng vpø’ shvringshì we Svmaré gø’ vrvm nø angkang vl vsvng kaq mv-dø’m lādømce shóngnøntní dvja vyùq we mà-vl, walòng íe.
Svmaré wàwe nø,.. Øpgarshì lvm rì, Vyáshì lvm rì mvmè vl taqsórí cvndvgøm lvm Hang rì gø, lvngaré rì mvdvm mvmè luqè.
Àngdeò dvgùng, àngdeò lvpat, ang dvpø svng vpø’ shvringò Svmaré gø’ vrvm í nø, àngdeò dvgùng svng vcat sháò we àng dvpø vjá sháò we bvnlìrì svng vyáshì yilshi lúnòe.
Rvgaqtøm taq Byōlvm tvrà rì taq angdèo dvgùng, angdèo dvpø vjang laqya shvlá rì nvng tvle we mv-wà vsvng, mà shvrúng we Svmaré rì nø ring vtv’ng vpø’ we Svmaré rì íe, walòng svng shálúnshìe, yv’nglúnshìe.
Wervt rvgaqtøm taqø dvchang gvlvng wáshì we Svmaré rì svng èyvnglúngò dvgvp Svmaré rì nø ang dvpø mà-vl wànø shvngbe kaq svng ra kéò dø shø’n mvdaq vyáshì ra íe. Pàwàlvm wàni Svmaré shvngbe nø tiqme dø wā mø-í, wa Kà íē.
Vpø’ íwe vnvmchvngmaq Àngdeò vjang laqya nvng angdèo dvgùng svng shvyø’m dvjá sháò we dang vrvm svng vgám nø àngdeò lvpat svng shvgùn shvringshì taqsórí vpø’shì we øpshì we Svmaré rì gø mvmè vlē, walòng svng yv’nglúnshìe. Shálúnshìe.
Wervt Vpø’ íwe vnvmchvngmaq, Gvray í zi we ring vtv’ng zilangré lvpat svng vpø’ shvring shì taqsórí dang vrvm taq Vháng vlún we dvgùng vl we rvzvngcerì wáshì laqlúni wvng nònggùn zø’ng mvyøngè. Shvngbe svng oqā.
