“Gvrayí vsvng vrvm kaq zi we dvgùng svng shvkse wáshì lúnlvm rvt Svrabín Koqkvm í dvkv’m we”
Svrabín Koqkvm Leo XIV nø (2025)’Day for Life’ (Lvpatnò angni) wā Kà vgo vzíshàq vdòng vsvng Gønshaq svng kupgār we, Cvmré mà dálvm vgám we, Cvmré shvmv’ng we svng vgám we bvnlìrì taq vbá rì nvng tiqdø vl dang dvkv’m bø’ì.
Vkvtdø dvnúng shì we bvnlìrì svng England, Noel, Scotland, IRA móngdàn rì taqkèní Catholic shvngømré Svrado gvba rìo angké me rúng kèní dvnúng shì nø wáshì bø’ì.
Yalòng bvnlì svng nøng vrvm dvnúngshì we íe. Vkvtdø dvnúngshì lúngì wenø vsvng lvpat dvpø svng ang dvtàng tàng ( Cvmré góng pvngshì yv’ngkèní, shøqlvm rvtø gøgø’m
lvpat ) nvng ang dvja dang vrvm taqø vpø’ shvring lúnlvm rvt dvnúng shì dang íe.
Dènøngò dvnúng mvnggá Kà vgo nø Jubilee nøngò dvnúng mvnggá Kà vgo vl dø ‘Vlømshì lòng nø Nønt cv’m màdvzvr. Dvsha lvm vdòng yv’ngkèní anglvjøm svng lá èmvnøng’ wā St Paul (Roma 5:5-6) vdòng taq dvtanshì lòng svng lushì dang íe. Rvzvngcerì vrvm Vløm shàì lòng nø cvndvgøm we mà-vl shvlá lòng yv’ng lúnlvm wā mø-í. Nøngmaq tiqdø v-li we Gvray gvsangò ngørdvgùng mvdvmø Dø’ngvng we Kvmnønt vl lvm rvt dvdutnè. Ya Vlømshì lvm lòng nø vsvng Lvpatnò dvshà mvhøtlvm pvn vtv’ng ri gø tønzv’n Nøntní rí lúnshìe.
Dènøng dvnúng shì we wáshì we ‘Lvpatnò angni ‘ tvyø taq shvri lúngà we shvri móngkà taq dvshà mvhøt vhø’mò rì dvpvt vjúrøt dvbvng lvm rvt nvng tø:lvm vhø’mò Samaritan vsvng pàdø dvshà mvhøt vhø’mò rì nvng tiqdø v-lálvm rvt, vrá tiqkvt tvle mvlún shì we dvpø svng shvkse wáshì lúnlvm rvt Livapo Gaíchuk Sasvna Svrado John Sherrington taqkèní vkvtdø dvkv’m bø’ì. Jubilee nøngò dvnúng mvnggá íwe vsvng shvngbe svng øp lún we dvshà mvhøt lvm lòngò anglvjøm svng vsvngrì í nø lá lúnlvm rvt, vkvtdø lá taqsórí Gvray jèjú rvt dvshà mvhøt lòng nø nøngmaq nvng Vkangpè tiqdø v-li dang í lòng svng shá lúnlvm vtoshì lúnlvm i dang Svrabín Koqkvm í dvkv’m bø’ì.
Svrabín Koqkvm í dvtut vsvng vrvmì Gvray gvsangí zi we dvgùng svng shvra lvm mà-vl dø shvngbe shvkse wáshì lúnlvm rvt, zā yv’ng rvnaq dø vhø’mò rì kaq Vkangpèo mvkok dvdí shóngnøntní vzø’m vzàp v-toq v-tìp lúnlvm rvt, vsvng mvdò vrvm kèní mongzøngcerì kaq svng mvshá dvpéshì we mø-í dø Dìngman we shóngnønt, dvshá zā Nøntní kupgār lvm, chutchvng lvm dvnúngò vsvngrìo dvnúng mvnggá rì shvngbe svng Paqzi angkangme rúng íwe Vmè Maria kaq vp tvle nø shìlvm lòng yv’ngkèní ngørdvgùng pòngbang nvng jór á:mì we Vkangpèo vzaqshi kūnga, byōlvm lòng nvng mongzøl lvm lòng jèjú ìshøt íwe àngò dvbùshang mongkà ìshøt jèjú zi taqsórí Mongkà svng dvtø’mbø’à.
