Dvrá dvgø:mò we(Matthew 5:20-26)
Dèni Nònggùn vzí ké lvm Gvray móngkà nø , Matthew 5:20-26 vdòng taqkèní íē. Vpø’ íwe pèmè vnvmchvngmaq Vkangpè dvkv’m we taq,…. Namaq nø dvrá svrarì nvng Farisirì angmaq døngman lòng mvdv̀m mvzv́n mèdøngmannøng kvt kèní nø, kadø ínìgø namaqí muqlàng móngdàn góng mèlúnnøng, wàe.
Yuda vsvng pvn rì taqø dvkv’m Kà Dvrá nvng Upvdi rì svng cvndvgøm vtv’ng rì nø Dvrá svrarì nvng Farisirì í lòng svng gvzà shø’n nø mvra. Íni gø dvkv’m Kà Dvrá rì nvng Upvdi Dvrá rì svng àngmaqí cvndvgømò lòng nø mvdvm shvlē wā luqe walòng svng yv’nglúnshìe. Vdòng Nønt taq pa Dvrá gø zø’m mvdvng dang yv’nglúnshìe. Àngmaq taqkèní nø dvkv’m Kà Dvrá rì nvng Upvdi Dvrá rì svng vdòng Nønt mvsøn kèní Nønt lúm we íni gø, Nønt mvlúm we íni gø cv’ndvgøm lú:nì jò a:mì wā dvdvmòe. Wervt Mati 13 tut taq àngmaq svng vchàq nø shvngøtnò dang svng yv’nglún shìe. Wè shvra taq Vkangpè ínø mà léò wā nøngmaqí shø’n gø shønìe. Jø’ngjøng vlé gø mà léò. Nonggupmì nø Gvray, Gvray wà we Wur nø zú zú wàe, wā pàdø tiqdvtàng shøn ké lvm vlē.
Íni gø vkvtdø shøn ké lòng nøngmaqò vjang laqya rì, cúnshàì we lvpat taqø vhap ra dvgvp àngde yv’ngkèní kadø wā vtánshì lvm, wà ì nø dvdvmshaq v-li mà? Nøngmaq lvpat taq gø Gvray gvsang Dvkv’m kà rì, Lvpkà Dvrá, Upvdi dvrá rì mvdvmshvlē taqwā cvndvgøm we íni nø , Dòng Nønt mvsøn kèní cvndvgøm mvlúnshì we dang rì vhø’m v-duè. Tāsvng tālè na roq ké nøng, wā Tiqdvng vsvng kaq dvshvngì ni gø, àngde nvng sing ra dvgvp vroqā lúnbø’shà mà? Shóngnøntní Tiqdvng vsvng kaq tùbùm dèbvngshìnøng wā shøni we íni gø, Angde Nønt mvsøn tiqgóng shvngbe kèní vrá svngpvn dvci, shvngømré mà rvweng shóngnønt gvl nø tùbùm debvngshì lún bøngà mà? Shv’mná rí mvdaq tønshì ràe wā Tiqdvng vsvng kaq shøni we íni gø Angde taqkèní gø tønshì lún bøngà mà?
Kristu mèpvng cvn i we nøngmaqí Gvray gvsangò lvpkà Dvrá rì svng mvdvm shvlē hang vdòng taqkèní wā v-li lòngí nøngmaq ká:mbø’shà wā shø’n mvlúnshì. Dòngnønt mvsøn língshì nø dòngnønt mvsøn kèní cvndvgøm øpshì lún kutwa Angde Jò lòng nvng Mvjò lòng svng jø’ngjøng vtoshì yv’nglún lvm vlē. Wervt Kristu shøn we taq, Namaq nø dvrá svrarì nvng Farisirì angmaq døngman lòng mvdv̀m mvzv́n mèdøngmannøng kvt kèní nø, kadø ínìgø namaqí muqlàng móngdàn góng mèlúnnøng, wā nøngmaq kaq svng dvkv’m nø shvngøt dètúyangshà we íe.
Wervt Vpø’ íwe pèmè vnvmchvngmaq Dènio dvbùshang Mongkà taq, Vkangpè Yesuí dòngnønt mvsøn vjang laqya rì língshì nø dòngnønt mvsøn tiqgóng shvngbeí cv’ndvgøm nø Pvlàcè kvmnønt jór kūnga lùshìlvm dvkv’m dø cúnshì laqlúnì wvng dvshat nø nònggùn zø’ng mvyøngè. Shvngbeí Vkangpè Gvray yv’ngkèní shiqshan mongzøl, Dìngman lòng vtoshì laqlúnì. Amen.
