2025 nø’ng Mònggvn Toniò Kurwang Angni( “Plastic Shøqshè Banchvk Dvsherlvm “)
2025 nøng Mònggvn Toniò kurwang angni, Mònggvn kaq banchvk zi ” Plastic Shøqshè í zi we banchvk dvsher lvm” Kà vgo í Korea Dàmmvdaq móngdàn taqkèní Chøm angkang ku vtō nø wáshì bø’ì.
Jun (5) ni svng Mònggvn Toniò kurwang angni ku Mònggvn Toniò kurwang nvng singdø Mònggvn wùnpóng angké mvdò kèní 1974 nøng dvgvp kèní mvsat yangà nø, móngdàn póng (150) rvze kèní lúm nø dvnúngshì we mvdò me íe.
Nø’ng vrvm Kà vgo angpvn pvn zø’m nø wáshì bø’ì we taq denøng 2025 nøng dvpvt nø, Vtì vdòng, Vmlvm aqlvm rì vdòng, shagóng vdòng kaq góng sháò we ” plastic ò banchvk dvsher lvm” Kà vgo í Korea dàmmvdaq móngdàn taqkèní Chøm angkang ku vtō nø wáshì bø’ì.
Plastic shøqshè lòng svng Dikban Hang dvla shvkse dvtan nø plastic lángshì lòng svng mà to we, shvyúm we, recycle, vrá lángshì we tvrà nvng plastic láng lòng svng vrá tiqkvt dvdvm nø dvnúngshì lòng nø Móng Dø’ngtáng nvng sing we banchvk rì í rvt shvngbe muqhøm wáshì nø lúm ra dang, plastic lángshì we nvng plastic láng lòngò vjú dvtut nø shøqshè luq we, nvmbøng mvsher we, rvgaq nvng Nina rì krvtshø’m we, lvngcha vlíng we vkvtdø í we mà shvlá lòngo vjú rì tuq sháòe. Mònggvn Dø’ngtáng nø’ng v-rvm plastic shøqshè Dānchying 1.wvn rvze tì vdòng svng gur we vlē.
Vyu’ng kvnyvng zànglvm taqgø plastic rì svng lángshì we, plastic rì rvgaq vbà yv’ng løpshì lòng rvt rvgaq vbàcó vdòng plastic luqmvnshì sháòe.plastic shøqshè shøq lòng ínø vsvng kurwang nvng Toniò kurwang nvng singdø lángshì rì nø nø’ng v-rvm dollar 300 Bilian nvng 600 Bilian dvhø lángshì lòng vlē.
Plastic shøqshè shøq banchvk nø Mònggvn shiqshan tvrà, wurlaq tvrà nvng vsvng Vm-aq tvrà rì svng vtøp v-na banchvk rì bø’nsháòe. Íni gø welòng banchvk nø Tonio kurwang nvng singdø we banchvk rì vdòng kèní pvranà lún we bvnlì tiqlòng gø íe. Plastic lángshì lòng mvtú shvngbe gurshì høqshaq àng tvrà hang vdòng taq wa lánglvm rvt Vsuyaq rì nvng company rì, vsvng gø’ v-rvm taqkèní dvzaqshì lúmà lvm rvt UNEP kèní dvshat bø’ì.
2025 nø’ng Mònggvn Toniò kurwang angni svng Mònggvn svng banchvk zi sháò we ” plastic shøqshè shøq banchvk dvsher lvm” Kà vgo kèní Korea dàmmvdaq móngdàn í Chøm angkang ku vtō nø wáshì bø’ì we mvnggá nø ” Banchvk vl we, zø’m mvdvng we plastic rì, Toniò kurwang svng banchvk mvzílvm rvt yv’nggúng døngàng lòng í tvle láng lúnlvm rvt mvnggá gvlshì nø wáshì lòng íe.
