Yesuí vjúrø:tnò we
Dèni tashì nø nònggùn vzí ké lvm Gvray Mongkà nø, Yohan 17:20-26 vdòng taqkèní íē.Vpø’ íwe vnvmchvngmaq, Dèni tálúnì we Yohan dvbùshang Mongkà taq, Vkangpè Yesuò vjúrøt Kà svng vrá tiqkvt tálúnìe.Yalòng vjúrøt Kà taq Vkangpè Yesuí nø mvtuqdaq we Rvtø angni rì vzàng kaq tvlú yv’nglúnòe, walòng svng yv’nglúnshìe, shø’n shvlàe.
Vrá nø vzàng kaq Angò dvzvrì, dvzømshú rì wáshìlvm í we nøngmaq kaq svng gø tiqnønt tiqyung í v-rvm vrá vl dvzvr mvyø’lòng svng Vjúrøt Kà taqø tiqnvmshá dvtanò lòng svng yv’ng lúnshìe. Íwe shvngømréo lvpat mvshøl yv’nggùng svng èyang lúngò dvgvp shvngømréo nvmlat mvpvng yv’ngkèní Kristuò dvzvr í sha we nøngmaq rvzvngce rì nø dvdvm Nønt màbóngì, shaqbāì rvt àngmvdò mvdò cerì mvmè dvkaqshàìe.
Vkvtdø dvkaqshàì, vwálshàì lòng nø Vkangpè Yesu Kristu àng Nønt Shvrúng lòng svng bvttut vgá:mì lòng íe, wadang svng gø dvdvm shvlàe. Kristuò chutchvng we Gvray dvbùshang Mongkà svng dvshang we taqgø vkvtdø dvdvmnønt màbóng yv’ngkèní vwálshàì lòng nø Mònggvn yachang dvpvt màbóng màtuk, mànvp we ‘Hādaq’ shvngkà bø’nsháòe. Wè mvdvmø Laqni mànvp vtv’ng tiqlòng nø chutchvng we tvrà svng shvtin gvyaqshì lòng íe.
Dèni Vkangpè Yesuò vjúrøt Kà svng nøngmaqí tálúnì dvgvp dvdvmnønt màbóng lòng svng shvmv’ng ra bø’ì, walòng svng dvdvm vshat ra á:mì. Dvdvmnønt rì vshatvpá:nì yv’ngkèní Nønt rvt shì lòng svng chaqdvp dvtan nø dvnúng lúnlvm, dvzaqshì nø cúnshì ra bø’ì. Vkvtdø dvzaqshàì lòng nø Kristu Àng Nønt Shvrúng lòng svng dvbú dvzvrì lòng gø íe. Wervt nøngmaq tiqgø’ nvng tiqgø dvhø taq dvdvmnønt rì, v-møl v-màq vbør vkvng sháò we Vcha nønt, Dvgoq nønt, Mvlá nønt, Shø’m nønt, mvrà cìp lá mvyø’ we Nønt rì svng nøngmaq vdòng kèní dvshérà bø’ì.
Vrá nø nøngmaq tāsvng tālè vzø’m vzàp muqhøm wáshàì nø dèni la nøngmaqò Mònggvn rvgaq yachang svng shvnvp shì ra bø’ì. Mvdøng ra vchvk we Mongzøl lòng nvng vrá tiqkvt v-rvm vrá lvm lòng , Dvrá rà:prālvm nvng vsvng shvdaq tāsvng tùbùm dvbvng ké lvm rì, téwa nø Cvm vtv’ngrì í we nøngmaqò vnvmchvng dvsháhoq rì kaq svng laqya shvlá mvkok dvdí shóngnønt dvtan nø vpnóngshì taqsórí Vkangpèo móngdàn, Gvray móngdàn dvpvt shvkse wáshì lúnì nìnø, Nøngmaq shvngbe tiqnønt tiqyung wáshì nø v-rvm vrá lúnì ninø Vkangpè Yesu Kristu Ang Nønt Shvrúng lòng svng kømzøp dvtan lúnlvm í a:mè.
Vrá nø, V-rvm vrá muqhøm wáshì lòng nø tiqdvtàng jór nònggùn kūnga zi we “Dvla hang” gø íe. Kristuò dvbùshang Mongkà svng shini mvsháò vsvngrì kaq svng íni gø, Tá lúnò taqsórí vnáma:nò rì kaq svng íni gø Kristuò dvbùshang Mongkà svng dvshvnglvm rvt shvlá vtv’ng í we nvng Vløm a:m ra vtv’ng tvrà gø íe, wā mà-vl bø’ì we ( Svrabín Koqkvm pè Bernadet(16)). taqkèní gø shvngøt dvtú yangì we íē.
Wervt Vpø’ íwe pèmè vnvmchvngmaq, dèni tá lúnì we Vkangpè Yesu Kristuò Mongkà kèní nøngmaq kaq svng dvshat nø shvdøm dø tiqdvchá Vkangpè Yesu Kristu Ang Nønt Shvrúng lòng svng kømzøp dø dvtan lúnlvm rvt kvmnønt, shóngnønt Døngman lòng taqkèní nònggùn kūnga lùshì taqsórí shvkse wáshì laqlúni wvng shvdøm dvshat mvyøngè. Shvngbeí Vkangpè mongzøl lòng vtoshì laqlúnì. Shvngbe svng oqā.
