Angcè pè vmíng vkv́ng
Yh 5:17-30
Kristu vdòng taq vpǿì we vnvm vchvng maq dèniò mòngkà taq Lòngzàpè Gvray ò vmíng vkv́ng dang tálúnì we íe. Mòngkà taq nárni taqø Yesuí zá yv̀ng shvzǿmā ò we svng mvrà shvriò we ínìgø Yesu nø nár ni vdòng taq ínìgø vsvng rì mvdàm dvsháza bv̀nlì wawe nø rvtø̀ àngni rì svng yv̀ng we mǿí nø àng taqø vmíng vkv́ng vl we dang yv́nglún shìwe gø íe.
Kàngpè Gvrayí wàò we dø tiqdvchá ni lòngzà pèí gø wàòe. Welòng nø Àngpè nvng àngcè pè shòní gø nø tiq dvcháni íwe rvt záyv̀ng shvzǿmā lún we døni wálún we vko vkáng gø vl we svng dvtan we íe. Wervtnø Yesu Kristu dvpvt nø rvtø̀ àngni rì rvcang shì mvrà we tvrà svng yv́nglún shìwe íe.
Nár ni taq ínì gø Gvray àng taqkèní shvla we dvsháza bv̀nlì rì wálún we íe. Wervt nár ni taq nøngmaq bashà rì taqkèní Gvray àng yv́ngsvng nøt mvsø̀n tiqgóng wáshì nø shvrà zí lv́m dvzaq shàì. Gvray àngí nøng maq kaqsvng roqrim kup gvr lv́m nøngmaq dvpvt laq ni vchvk we íe.
