“YESU MUQLANG KAQ NGVNG WÈ BÓY”
Shvngbe mvdvm Gvray mongzøl lòng laqtuqdaq. Yalvban nø Vkangpè Yesu Muqlang kaq vbūn bø’à we bóy ni íe.Dèni rø vdu we Gvray móngkà nø;-
Mongkà (1)ciq Dvzvr 1:1-11… Vkangpè Yesu nø coqcvnri mvr kèní Muqlang kaq ngāngá:mì, dang tá lúnshìe.
Mongkà (2)ciq Efesu1:17-23… Gvray gvsangí nø Yesu svng shì yv’ngkèní dvzun bø’à nø, Muqlang taqlap, Gvray vbàng pa taq Shvrúngòe.
Mongkà (3)ciq Luka 24:46-53….. Vkangpè Yesu nø Muqlang taqlap kaq ngāngá:mì. Coqcvnri nø Yerusalem taqø lang ráà nø, Shànshér Pvlàcè làshì daq lòng svng cāò dang tálúnshìe.
YESU MUQLANG KAQ NGĀNGÁ:MÌ
Yesu nø shì yv’ngkèní Zuná:mì mèpvng, Angni (40)ni vhø’m ráì dvgvp, àng jór dvgùng nvng Muqlang kaq ngāngá:mì.” Coqcvnri mvr taqø rvmøtní Yesu svng wú:pm bø’à”(Dvzvr 1:9). Yesuí nø lvngdøm taq coqcvnri kaq svng dvkv’m Kà, lvpkà rì í shvngøt dvtú dv’ng bø’à mèpvng ” Namaq Mònggvn Dø’ngtáng svng èdìnøng taqsórí vsvng dvci pvn vrvm kaq svng Gvray dvbùshang Mongkà deshvng bø’nøng” wā Talen tvleò nø dvzv’ròe. Vkangpè Yesu nø Muqlang kaq ngāngá:mì nø Vpè Gvray gvsangò vbàng pa taq rú:ngá:mì. Yalòng nø Muqlang taqlap yv’ng Vkangpè Yesu nø vháng vtv’ng, ring vtv’ng dø shvgùn shvring bø’à, walòng svng yv’nglúnshì we àng lvjøm íe.
YESU Í DVZVRÌ SVNG BVNLÌ ZÍÒ WE
Vkangpè Yesu nø Muqlang kaq jór dvgùng nvng ngāng lvm wáshì vzàng kaq, coqcvnri svng shvngøt dvtú dvkv’mò nø bvnlì zíòe. ” Namaq edìvmnøng nø, Vpè, Angcè pè, Shànshér Pvlàcè bøng kèní àngmaq svng Tìløp (baptisma) èzínøng nø, Ngàí Namaq svng dvkv’m bø’shà dø, dvkv’m Kà rì shvngbe svng cvndvgøm laqlúnò, àngmaq svng shvngøt dètúnøng” a:lòe.
Wervt Tiqmvràl nvng tiqmvràl Shvngømré vsvngrì í yalòng Vkangpè dvkv’m Kà shvngøt dvtú lvpkà rì svng cvndvgøm lún ra íe. Kvmnønt nònggùn kūnga lùshì nø shvkse wáshì ra íe.
YESU MUQLANG KAQ SVNG NGĀNGÁ:MÌ ÀNG MVNGGÁ
Rvgaqtøm taq, Vkangpè Yesuí wá ra we bvnlì mvtúrì shvngbe svng wá dvdv’ng bø’à rvt, Muqlang móngdàn kaq ngāngá:mì. Angí rvcvng bø’à we Dvzvr pè la svng bvnlì shvriòe. Dèni nøngmaq í gø Vkangpè Yesu ” Muqlang kaq ngāngá:mì”(Ascension)tvrà svng mvsat dingsat wàì lòng íe. Wè dø tiqdvchá Nøngmaq gø’ vrvm lvpat mvnggá rì svng gø dvtan shì lòng íe. Wervt Muqlang kaq ngāngá:mì mvnggá tvràrì, wā shø’n shvlàe. Wè rì nø;-
(1) Yesu shì ra we jór dvgùng pòngbang svng vtōshì lúnlvm dvpvt
(2) Nøngmaq dvpvt vl ra dvgø’ā lvm rvt (Jn 14:2b),
(3) Nøngmaq dvpvt vjúrøt tvle a lvm dvpvt
(4) Shànshér Pvlàcè dvzá:rà lvm dvpvt (Jn14:26),… yarì íē.
NØNT SHVLØM NÒNGGÙN ZI WE MONGKÀ
Muqlàng kaq ngānglvm shvngøt dvtú we lvpkà shø’n rvt, Dvzvrì Nønt yòr, Nønt mvbyō shaqcvmè. Wervt Vkangpè Yesu í Nønt shvløm móngkà svng shøn bø’à. Vpè Chøm taq vl ra shvra mvmè vlē. Namaq dvpvt vl ra dvgø’ā lvm rvt le, nga lō ngvmè. Nga vl shvra yv’ng Namaq gø vl lún høq, Ngà vtv’ng rang nø, Namaq svng ngà vl yv’ng shøl lvm íē. Namaq svng dvrvtce dø ngàí mvgúrì, Namaq svng vrá Ngà tiqkvt dìngdaqè. Namaqí nø Yórlvm nàhø’m daq nøngè, íni gø, namaqí yórlvm nàhø’m nøng lòng nø dvbùlvm lòng vpōvmè. Èyangnøng, Rvgaq yachang vlēvm nī høqshaq, Ngà nø nøngmaq nvng tiqdø tiqdvciq vl lvm íe, wàe.
GVRAY GVSANG KAQ SVNG NOQNGØM SHVGÙN NI E
Nøngmaq nø Gvray gvsang kaq shvgùn shvring, Noqngøm lvm rvt Noqngøm Chøm svng dì íe. Kømngøm we shvngømré rvzvngcerì nvng tiqdø Cúnshì we Gvray gvsang mongkà svng tashì nø cvn shàìe. Vkangpè Yesuò Vm-aq bóy taq lúm lúnìe. Gvray gvsangí zi we Pvlàcè Vmpa nònggùn kūnga vzàm svng vtoshì lúnìe. Dvtut Gvray bvnlì Talen zi lòng svng nøngmaqí vtoshì lúnì dø tiqdvchá tiqdvtvng Shvkse wáshì dvtan lúnlvm gø gvzà vchvkngè walòng svng yv’nglúnshìe.
‘ Taq Muqlang kaq vdàqdvng wā dvja ‘ nø rvtø dvbé mvrà. Nøngmaqò lvpat, lúnì we rvtø rì taq sasvna bvnlìrì wàì dvgvp rvtø lvngcha svng yèl nø rvdoq rvwvn sórí wàlvm gø gvzà vchvkngè. Vsvng tiqgø’ v-ní gø’ í wā wádv’ngshì pvn mø-í. Shvngbe lúm ra we, shvngømré bvnlì íe, walòng svng Nønt mvsøn vdòng kèní síngràl lún ràe. V-rvm vrá we í Hang Dvla svng gø dvtan lún ràe, wá lvm mvmè vlē. Shvngbe svng tiqkvt í wā wá mvlúnshì we íni gø ang dvja tvrà vbóng vtuk dø dvnúng nø wá ràe. Vmìng vkang sher dø vp tvle we (Empowerment) wá lúnlvm gø gvzà vchvk ngè, walòng svng gø dvdvm shvlàe. Kømzøp dø dvtan mvlúnshì we íni gø dvdvm vjáng taqsórí dvshat nø nònggùn vzí ké i dang gø íe.
Vpø’ íwe pèmè vnvmchvngmaq, Vkangpè Yesu Muqlang kaq ngāngá:mì, vbūn bø’à àng jór dvgùng pòngbang nø dvtut mvril laril døngàng lòng nøngmaq taq laq vldaq. Amen.
“A:ngí angmaq svng wedø dvgǿng shvmánāò la:ngí, Ang nø angmaq yv́ng kèní rv́lshì nø̀, muqlàng svng vbūn bǿà.”
(Lk 24:51).
