Vchvk we dvzv́r kà( Luka 24:46-53 )
46 Vrá A:ngí angmaq svng, “Kàru taq nø q yadø vrū yà:ngà. Kristu nø dvshà mvhøt tø̄nshì nø, vshø̀m ni wani taq nø shì yv́ng kèní vrá zun ràe. 47 Vrá nøt língshì rā rì mvrà chutnā
lún we mvshǿl nø, Yerusalem wamà kèní pv̀ng nø, Ang bø̀ng taqkèní vsvng dvcì í dv́ngte svng, dvshv̄ng rà longe, wa nø vrūshaq íe. 48 Yadv́ng pv̀n dvpvt shvkse nø namaq èínønge. 49 Etánøng, Ngà Vpèí vdv́nashaq lòng nø namaq mvdv̀m svng Ngàí ni dvzv́rā daqìe. Iwe muqlàng taqlap kèní jórnònggùn namaq svng mèdègwā daqnø̀ng dv́ngte namaq nø wamà vdòngø shini ècā dánøng,” a:lòe.r
Muqlàng kaq ngāng we
50 Yesuí angmaq svng Betani mvrìng tvnū yapā høq shø̄l bǿà nø, Ang wurtángní hángshì dá:ngí, angmaq svng dvgǿng shvmánāoe. 51 A:ngí angmaq svng wedø dvgǿng shvmánāò la:ngí, Ang nø angmaq yv́ng kèní rv́lshì nø̀, muqlàng svng vbūn bǿà. 52 Coqcv́n rìí Ang svng køtngǿmshì noqò dá:ngí, shaqshaqwa dvbù taqsórí Yerusalem svng vtv́ngá:mì. t 53 Angmaq nø Noqngø̀m Tø̀ngnø taq ni vrv̀m dvkǿmshì nø Gvray kaq shvring shvtàòe.
Gvray nø shuóngnønt íe. Shóngnønt nø Kristu íe. Kristu nø Gvray íe.
Shóngnønt ínø Kristu kaq svng svngzacè ku rvcv’ng yangà. Shóngnønt ínø Kristu dvsha mvhøtlvm nvng gønshaq dvbø’mshìlvm tvrà svng rvcvngshìlvm dvpvt nònggùn kūnga shaq zí yangà. Yalòng shóngnøntní wā vsvngrì shvngbe dvpvt vrá tiqkvt Zun lvm lòng bungá:mì.
Yadang taq Shvkse wáshì lúnlvm rvt Gvray gvsangí nø Na Ngà nøngmaq gø’ vrvm kaq svng ègo bø’shà lòng íē. Nà Ngà lvpat taqø kadø wā cúnshì lúne mà? nī vrvm , rvtø vrvm , wáshì we dvnúng shì we dvmu bvnlìrì yv’ngkèní Gvray gvsang nø shóngnønt íe, walòng svng nøngmaqò lvpat taqkèní shvkse wáshì ra we íe. Vkangpè Yesu Hkristu Muqlang kaq ngvng á:mì lòng nø nøngmaq kaq svng èlang bø’shà lòng mø-í, Mònggvn rvgaq gúrtù:ng vrvm kaq svng Angò shóngnønt dvsher lún lvm dvpvt àng mèpvng cvnri kaq jór nònggùn kūnga zí ráà lòng, èzí bø’shà lòng gø íe.
Wervt Nà Ngà nøngmaq gø’ vrvm lvpat taq gø yalòng shóngnønt nònggùn kūnga shaq svng vtoshì lún bø’shà mà? shóngnønt nònggùn kūnga shaq svng dvsher nø shvkse wáshì lún bø’shà mà walòng svng dvdvm vjáng dezv’rìe. Dvdvm vjáng taqsórí nònggùn kūnga lùshì laqlúnì wvng nònggùn zø’ng mvyøngè. Shvngbe svng Pàmvrà.
